ZALEN September 13, 2026 : Sairang Rel Station hawn, September, 2025 atanga July, 2026 chhungin ILP 2,15,946 pek chhuah a ni a. ILP pek chhuah atanga sum hmuh zawng zawng chu Rs. 8,80,67,100 a tling.

Home department tar lan danin kum 2024-2025 August chhungin ILP 2,78,087 pek chhuah a ni a, hemi chhunga pek chhuah atanga sum hmuh zawng zawng chu Rs. 11,78,42,160 a tling bawk.

Hetihlai hian dan ang thlapa ILP neia hnathawk hnam dang Mizoramah mi 13,730 an awm a. ILP tawp hnu thlenga awm chhunzawm man chhuah an nih chuan Eastern Bengal Frontier Regulation (EBFR) Act, 1873 hmangin station-ah case siamsak thin an ni a, hemi hnu hian district court-ah thawnin court hian pawisa chawitir emaw, thawn let (pushed back) emaw turin an chungthu a lo rel thin.

Kum 2026 chhung hian ILP nei lo leh ILP fel lova lut mi 934 man chhuah an awm leh tawh bawk.

Tar lan tawh thin angin September 13, 2025 khan Prime Minister Narendra Modi-a’n lehlangin Mizoram a tlawh a, Rs. Vbc. 8071 senga siam Bairabi - Sairang rel kawng thar, 51.38 km-a thui a hawng a, Mizorama rel service thar pathum - Aizawl - Delhi Rajdhani Express (Anand Vihar Terminal), Aizawl - Kolkata Express leh Aizawl - Guwahati Express te a vailiam bawk.

Prime minister hian November 29, 2014 khan he rel kawng siamna tur lungphum hi a lo phum tawh a ni.