ZALEN June 5, 2025; Tukin dar 6:30 vel khan Sairang Dinthar huam chhung, rel kawng hnuai Chengkawl luiah hnamdang mipa ruang hmuh a ni.

Ruang hi hnathawk tura kal ten an hmu a, YMA hruaitute hrilh hriat an nih hnuah Sairang police ten buaipuiin police station-ah lak a ni.

Ruang hi a tirah chuan tunge a nih hriat a ni lawk lo a, a hnuah railways hnuaia hnathawk a ni tih hriat a ni.

Ruang hi Sairang Dinthar YMA te chuan kuang an tum sak a, a ruang hi naktukah Sairang PHC-ah postmortem tih a ni ang a, chumi hnuah an khaw lamah lak a ni ang. Sairang Dinthar YMA hruaituten ZALEN an hrilh danin nimin mai a Sairang lo thleng nia hriat a ni.