Aizawl April 20, 2024 : Tun lai hian Saitual district leh Aizawl veng thenkhatah vawk natna chi khat, African Swine Fever (ASF) a leng mek a, vawk eng emaw zat an thi tawh.

ASF vang hian Saitual khawpui chhungah vawk eng emaw zat an thi tawh a, vawk thih chhan hi ASF a ni tih finfiah a ni tawh tih tar langin District AH & Vety Officer, Saitual District chuan April 16, 2024 khan danin thuneihna a pek angin Saitual Town Area chu hri lenna hmun, ‘Infected area’-ah a puang a ni.

Aizawl District AH & Vety Officer pawhin Nilaini khan notification tichhuakin Kulikawn leh Salem vengah vawk hri, a len thu a tar lang a, ASF hi a darh zel loh nan Kulikawn leh Salem veng hi hri lenna hmun, infected area-ah a puang a ni.

Infected area atanga vawk, vawksa leh vawksa atanga thil siam reng reng phurh chhuah emaw, lak luh khap tlat a ni.

Vawk thi reng reng paih mai lova thuk takah chinai nen phum ngei ngei tur a ni a. Vawk hralh emaw, talh emaw khap tlat a ni a. Vawk thi an awmin AH & Vety Department official-te hnenah hriattir vat tur a ni tiin notification tihchhuahah hian tar lan a ni.