ZALEN December 5, 2024 : Nimin tlai khan Development of North Eastern Region (DoNER) Consultative meeting, Union Cabinet Minister of DoNER Jyotiraditya M.Scindia kaihhruaina in an thu khawm a. DoNER hnuaia North East state a hmasawnna hna thawh lai mekte thlir hona neiin hetah hian Rajya Sabha MP K. Vanlalvena chuan Sangau to Saisichhuah kawng sialna tur sum hnuhlet leh chu a rem loh thu a sawi.

Mizoram Rajya Sabha MP K.Vanlalvena chuan Parliament Monsoon session neih zawh tak ah August ni 8-a a zawhna Union Minister of State for DoNER Sukanta Majumdar-a'n Myanmar ramri panna kawng Sangau to Saisihchhuah kawng sialna atana DoNER-in Cheng Vaibelchhe 66.08 a lo sanction fel tawh Cancel a ni tia a chhanna chung chang he meeting ah hian a sawi chhuak a. Kum 2021 February ni 10 ah he kawngpui laihna tur pawisa hi DoNER-in NEC kal tlangin sanction order a tihchhuah thu leh hna thawktu atana Mizoram PWD thlang lo va BRO an thlan zawk avanga harsatna hi tawk an nih thu a sawi.

PWD te ruahmanna pawm duh lova BRO ten Pangkhua paltlanga kawngpui sial an tum avang leh Pang khaw mipui ten compensation pek an phut si avanga he project hi kal tluang lo a ni tih K. vena chuan a sawi. PWD te ruahman ang chuan kawngpui hian khawchhung a paltlang dawn loh avangin compensation ah harsatna a awm dawn lo. He project hi Khatih hun laia Mizoram Chief Minister Zoramthanga priority list-a mi a nih avangin pawisa pek tawh hnuhkir leh hi a rem loh thu a sawi chhuak bawk a ni.

Monsoon Session kal ta-a DoNER Minister of State Sukanta Majumdara'n Vena zawhna a chhan dan chuan June 2024 thlenga kawngpui laihna tur ram Mizoram sawrkarin a pek theih loh avanga he project hi cancel a nih thu a sawi bakah Border road ruahman mek Thingsai- Bualpui-Pangkhua- Sangau kawng laih tur Long term project atan BRO General Staff funding atana dah niin K. Vena zawhna hi a lo chhang tawh a ni.

Meeting Chairman, DoNER Cabinet Minister ni bawk Scindia chuan hemi chungchang hi hun dangah uluk zawka sawi dun pui turin K. Vanlalvena chu a sawm a. A tul dan anga a bawhzui tur thu a sawi bawk a ni.