United States, Minnesota-a thuneitute chuan sangha chi khat, goldfish lian tak tak chu tuikawngah an man nual a, dil leh tuikhuahah an sangha khawi duh tawh loh chhuah an chin vang nia ngaiin ti tawh lo turin mipuite an ngen.

Goldfish hi football tiat laia lian thei a ni a, dila cheng pangngai sangha leh algae ei tur a ei khalh nasat thin avangin thuneitute hian heng dil vela dah hi an phal lo.

Twin Cities dai, Burnsville-a Keller Lake tui a thianghlim leh hlim loh an endiknaah tun thla tir khan 10 an lo man tawh.

Kar liam ta Thawhtanni khan a dang 18 an man leh a. An zinga thenkhat chu inches 18 (cm 46)-a sei niin pound li (kg 1.8) laia ritte an ni.

“Goldfish invulh laite kha dil leh tuikhuahah paih tawh lo hram rawh u!” tiin khawpui thuneitute chuan Twitter-ah an tar lang. “An thang lian a, tui an tibawlhhlawh hma bik a, tui mawnga hnimte an tichhe vek thei a, a cheng ve dangten ei tur an neih loh phah thin,” an ti.

Burnsville thuneitute hi Carp Solutions nen an thawkho va, anni hi company din thar niin technology thar hmanga goldfish laichin sangha, carp lian tak tak lam buaipuitu an ni.

Company hian boat electrofishing an tih chu hmangin sangha an man thin tih a dintu, Przemek Bajer chuan a sawi a. Wire hmangin tuiah electric kaltirin sanghate hi an man thin a ni.

Burnsville-ah hian sangha hi an tihlum ngai mang lo va. Goldfish leh carp hi dil tui khangah pawh an dam thei a, tui bawlhhlawh takah pawh an dam thei vek.