Sunday chanchinbu darh zau ber, ZALÊN, February ni 5-a a chunga thupui hmanga thu ziak kha ka lo chhiar a. Kan pi leh pute  Mizo Hnam Dan an hman kha tuna Mizo Hnam Dan nena a in an tawh lohzia a rawn sawi a. A tum pakhat chu Laldenga  hnam hi rinhlehkhawm taka a lan theih dan tur pawh a rawn chhawp chhuak tha hle a.

Laldenga hi kum 1961 atang khan a chanchin hi ka lo zir ve hle a. Kum 1962 atang phei kha chuan MNF party te kan dinho va. Assistant Secretary hmasa bera thlan ka ni nghe nghe a. Vawi khat chu kan titi dunnaah an hnam hming ka zawt a. “Ka nu hi Hnamte a ni a, ka pa hi Ralte Kawlni a ni a. Ka pu Tairuma Ralte Kawlni chu Sungsahunga Ngawn Pawih chuan salah a man a . A tiduhdah em em a, a ti rethei hle thin,” a ti.

A kut pawh a tuar nasa hle. Tairuma chuan fapa a nei a. Sungsahunga chuan a hmingah Langdâra a sa a. Sungsahunga sal atanga an chhuah leh hnu chuan a fapa hming pawh  chu Sungsahunga kut a tuar hnem hriat reng nan Liantuara a sa ta nghe nghe a. Tairuma hi June ni 2, Pathianni, 1930 khan a thi.

Sangsahunga sala a awm chhung khan Tairuma hi Fanai sa a phuntir a. A hnial ngam si lo va. Hnial vaih se chuan eng anga nasain nge a tih duh dah dawn Sungsahunga sal atanga an chhuah hnu-ah a tira an hnam ngai, Ralte Kawlni-ah an awm leh ta a ni.

Laldenga hnam hi Ralte nge Fanai tih hi a ri fo va. Laldenga chanchin ka ziak lai khan ziaka awm tur chuan a hnam hming hre chiang turin Pukpui khuaah November ni 9, 2004 khan ka va kal a. Suakhranga Ngente, Kaisela Ngente fapa, kum 92 mi chu ka va hmu fuh hlauh mai a. Ani nen hian nilengin kan inkawm a. A pianni champha a lo ni lehnghal a. A lawmpui nan Vitamin leina tur ka pe nghe nghe a. Ani chuan Tairuma chu Ralte Kawlni Kawltung a nihzia min hrilh chiang hle.

Pukpui khaw dintu chu a pa leh Laldenga pu an nihzia te min hrilh a.

Lunglei Town Hall-ah Zoramsangliana’n, “Laldenga hnam chu Chakma a ni. A fin dan danglamzia te hi,” tiin a sawi a. “Motor nei ila va kal a va hrilh hrep hi ka châk a. Mahni tluk loh lutuk te sawichhiat nana dâwta  inchhirh-theh hi mi rilru chhe awmdan a ni,” tih thu te a sawi a.

Heng hun lai hi chuan hnam dang reng reng Mizoramah an lo lut ngam lo. An that zel Sapho pawh an lo lut ngam lo, Tom Lewin-a ho pawh kha Lalkher ho ral run tur hlauvin an tlanchhe nasa mai a nih kha.

Mathana Pachuau Lianthung hian a tum ber pakhat chu Zoramsangliana ang bawka Laldenga chu Chakma thlah anga lantir hi a nh hmel hle. “Laldenga dam laia sawi ngam si lo leh ziah duh si lo ten a thih hnu kum tam takah a chanchin a chhe zawnga khawvel hriata puandarh an chak hi an nu leh pa te ân thiam tak an nih hmel hle”, tia kan thian L.T. Liana’n a sawi hi dik tak maw? ‘LALDENGA’ tih bu chhiar a tha, thil chinchang hre duh tan Suakhranga leh a kawmtu thlalak pawh a chuang e.