May 23, 2023; Internet-a hmeichhe awmnem zawk chhaih buai leh vaukhan hi Cyber Crime lian tak a tling a ni. 

Farkawn, Champhai District-a hmeichhe pakhat hnen aṭangin facebook-a Nunpuia tia indahin messenger kaltlanga mipat hmeichhiatna hmanpuia a sawm bakah, a saruak thlalak nei anga insawiin, a dang laa thawn tura vauin, a thawn loh chuan a thehdarhsak tur thua a vau ṭhin thu leh hei hian nasa taka a rilru lam a nghawng thu complaint dawn a ni a. Cyber Crime PS Case No.22/23 Dt.01.05.2022 u/s 292(2)(a)/507 IPC R/w 67 of IT Act, 2000 ziah luh a ni.

Aizawla hmeichhe pakhatin a hriat loh phone number aṭanga mi pakhatin pawisa hlawha mipat hmeichhiatna hmanpuia a sawm thu leh, a saruak thlalak post darhsak tum anga insawia a vau thu complaint dawn a ni bawk. Cyber Crime PS Case No.26/23 Dt.01.05.2022 u/s 292(2)(a)/507 IPC R/w 67 of IT Act, 2000 ziah luh a ni bawk.

Heng case te hi uluk tak leh ngawrh taka chhui a nih hnuah leh electronic evidence te zir chian a nih hnuah heng hmeichhiate vautu hi Mungliankapa (23) s/o Zamchhuanpauva, Sesih, Champhai District a ni tih chhui chhuah niin, nimin, Dt. 22.5.2023 khan police ten an man a ni.

Hetianga Cyber Crime tuartu i nih chuan Cyber Helpline Number 1930 ah biain emaw, www.cybercrime.gov.in ah ziakin complaint i thehlut thei reng a ni.