Aizawl June 16, 2024 : Special Assistance to States for Capital Investment (SASCI) sum Rs. Vbc. 233.31 sawrkar laipuia kir (lapse) leh chungchang-ah MNF Legislature Party (MLP) chuan, ZPM Legislature Party (ZLP) chu a tak tak a che ngam lo, mipui a thiamchan tum a che ah an puh a, ngawihbo pui mai an tum dawn lo.

ZALEN zawhna chhangin MLP secretary Er. R. Rohmingliana chuan, ZLP in SASCI sum lapse chungchang sawiho pui a an sawmna chu an pawm thlap tih a sawi a, chutihrualin, a sawihona hmun tur atan erawh Assembly House a awm thu te, chumi tur atan chuan May, 2024 chhung ngei a ruahmanna siam tura ngenna an thlen thu te a sawi.

"ZLP in min rawn sawmna kan pawm thlap a, a hun tur te pawh ruat turin min ti, MLA te Aizawl-ah kan awm reng theih loh avangin May, 2024 chhung ni se kan ti a, football khel te pawh khawlai-ah inkhel loin ground ah an inkhel a, chutiang bawk chuan an (ZLP) kuta awm mek Assembly House kan nei, ruahmanna lo siam rawh u kan ti a, an ti ta lo a ni, an Legislature Party leader in Assembly session kohin sum a hek niin a sawi a, ni khat lek a ni a, sum hekna tur a awm lo a, kan pawm lo," Er. R. Rohmingliana chuan a ti bawk.

MNF MLA te chu special assembly nei turin May thla chhung khan an inring reng tih MLP secretary chuan sawi bawkin, MLA te chu zinchhauk lo tur te, zin ngei ngei ngaite pawh englaipawh a koh theih a awm tur an inchah thu te a sawi. "Kan hmuh danah chuan public a thiamchan nan an ti mai mai niah kan ngai a, a tak an ngamlo niah kan ngai," a ti.

Tarlan tawh angin, ZPM Legislature Party chuan May ni 10, 2024 khan MNF Legislature Party hnenah lehkha thawnin, SASCI sum lapse chungchang chu common platform ah media hmaa sawipuiah an sawm a, MLP chuan ziak vekin May ni 11, 2024 khan an chhang a, special assembly session a sawiho an duh thu an hriattir a ni.

ZLP leader Lalduhoma, chief minister chuan Assembly session koh chu thil hautak tak a nih thu te, sum leh pai thahnem tak a ngaih bakah, official hrang hrangte buai phahna a nih thin avangin common platform a sawho duh an nih thu thuthar thehdarhtute a lo hrilh tawh.

ZLP leader chuan, MNF hun lai kum 2022-23 ah SASCI sum Rs. Vbc. 200 a lapse thu te, chumi hnu 2023-24 ah an chet muan avangin second installment Rs. Vbc. 233.36 a lapse leh thu te a lo sawi tawh bawk.

Hetihlai hian MLP chuan May ni 8, 2024 khan Aizawl press club ah thuthar thehdarhtute kawmin, CM in kum 2022-23 SASCI part I sum Rs. Vbc. 200 lapse anga a sawi chu thu dik lo a nih thu an sawi a, 2023-24 a SASCI sum Rs. Vbc. 233.31 lapse nachhan pawh ZPM sawrkarin dan ang thlapa hna pek contractor te chhuahsak a, an party mite pek an tum vang a nih thu an sawi.