Aizawl April 20, 2024 : Vawiin Inrinni hian "SAVE THE RIPARIAN" hmalaknain Aizawl tui tlan, Tlawng lui fintu kawr tihfai hnatlang a ni 20 nan neih a ni.

Save the Riparian hmalaknain March ni 26, 2024 atang khan, Aizawl tui tlan Tlawng lui fintu lui kawr tihfai Project hi tan a ni a. Ni 20 chhunga zawh tum ni mah se, a hautak avangin meter 2000 chuang hret tihfai hman a ni.

Lui kawr tihfainaah hian, Save the Riparian-te hnathawh hi pawl hrang hrang-in an tawiawm thin a, Sawrkar Department UD&PA, AMC leh PHE ten an sponsor a, mimal tlawmngai engemaw zatin an thlawp a, tha thawh piah lamah sum leh paia tanpui pawh an awm bawk.

Save the Riparian hian, an hmalakna hrang hranga support-tute chungah lâwmthu an sawi tak meuh meuh a. Chutih laiin, bawlhhlawh paihna mumal loh avangin kawr tihfai hian awmzia a nei thui lo hle tih an sawi a. Kulikawn leh Model Veng inrina kawrah, bawlhhlawh paihna (dumping ground) awm hi a fuh lo hlein an hria a. Tin, Septic Tank nei mumal lo, soak pit atanga kawra thli paih an la awm bakah, kawrah hian ran thite paih a ni a, hei hi mihring hriselna atan ṭha lo tak a nih avangin, ti tawh lo turin "Save the Riparian" chuan mipuite a ngen nghal bawk.

Vawiin a ni 20 nana kawr tihfai hnatlangah hian, Save the Riparian bakah, MZP General Headquarters, 2nd Assam Rifles, Zo Trek, BVP Riders Salem Veng, ZMC-a MBBS 1st Batch, Solomon's High School Kulikawn, D Purification leh mi thahnemngai engemaw zat an thawkchhuak.

Vawiin a chhun thingpui hi Hmingliani Catering ten an tum sak bawk. SAVE THE RIPARIAN te hian he luikawr hnatlang hi ala tul em avangin, la kalpui chhunzawn zel an la tum a. An hmalakna support-tute an awm zel hi an lawm a, tui luankawr a bawlhhlawh paih tawh lo turin mi tin an ngen nawn leh a ni.

SAVE THE RIPARIAN-te chuan, Aizawl tui tlan a lo thianghlim zawk theih nan, bawlhhlawh dangtu turin Garbage Trap (Thir len) dah nise an duh a. Sawrkar-in a rang lamin hmala se an duh bawk.