Aizawl April 19, 2024 : Tlawng lui fintu kawr te zawk leh lui kam te thianfaia ni 20 zet hun lo hmang tawh 'Save the Riparian Project' te chuan naktuk hian Sakhisih lama an hun hman kharna hun an hmang dawn a, he hunah hian mi tu pawh 'HNATLANGPUI' an neih turah hian anmahni tawiawm turin an sawm.

He hun hmanpui tur hian ZoTrek, Mizo Zirlai Pawl (MZP), BVP Racing Team, ZMC, D'purification, Model Veng te chuan he hunah hian telpui an tum thu an tichiang tawh. Save the Riparian te chuan tunhnaia ruahsur avangin luikawr leh a kam an thenfai te chu hnawlin a tibuai leh tawh hle tih an sawi a, an sulhnu te chhui leh viau a ngaih dawn avangin an frontline leader Roma Hmar chuan an hnatlangah hian a tam thei ang berin tawiawm se a duh thu ZALEN a hrilh.

Kal tum ten Sakhisih awmna hi hriat vek thu a cheng lo a, Sakhisih hi Model Veng Presbyterian Kohhran Biak In kawng zawhin he kawng zawh zela kal tur a ni. Save the Riparians frontline leader Roma Hmar chuan ei leh in lam hi hnatlang te tumsak thin thu a sawi a, mahse, naktuk lam hi chuan thawkchhuak tur zat hriat theih a nih loh avangin a kal tur te chu mahni inhnawhpuarna tur intum turin an ngen tih a sawi.