Sawhkhawk of the day In chanchinbu, Zalen hi ka chhiar tanna a la rei lo khawp mai a, chutih rualin SAWHKHAWK ka bih ve zauh chang hian tun hma lama intihsual thinte a hriat ve theih ruai ruai a. ka chhiar ve chinah erawh chuan in chanchinbu hi kan rama chanchinbu chhiar manhla ber pakhat ni chuan ka hria, fakna a awm mang si lo va, thu chhiar tlak tak tak hlir in chhawp chhuak niin ka hmu a, ka fak em em che u a ni. An sawi thin, chhut sual zeuh ang chi hi chu a awm ve ang, a sawiseltute pawh hian in chhut zat hi chhu se an tisual nasa ngawt ang! Chutih rual chuan fimkhur tluk hi a awm lo, han tang zel teh u, a ngaihnawm thin a ni. - Adea Zu zalen chungchang kha kar hmasa khan a rawn chhuakin ka lo hria a, a dikin ka hria. Dan anga zu an phalrai hma ai chuan tuna dan ang taka zawrh a nih hnuah hian a in thinte hi an ngampa ta deuh sawta ngaihna ka nei ve tlat mai. Tin, zu an han phalrai tak chinah hian tun hmaa suala ngai thinte khan kan ngai ta lo hlawm deuh sawt lo thei lo va, hei hian ti ngai lo tihtir pawh a neih phah tak nual ka ring ta tlat mai bawk, mi mal ngaihdan mai a ni e. A dik vek lo mai thei a, a dikna chen erawh thui tak a awm chuan ka ring ve tlat a ni. - 8974232935 Pathianni hmasa khan ‘Sawhkhawk’-ah hian thupui vuah chungchanga intihsual ngai tawh loh thu kha a lo chhuak chiah a, in tisual nghal ringawt mai, fak indawl lo lutuk, hehe! Tak tak a, an fakna cheu hi a dik ka lo ti ve thin a, tun hma deuh, an sawisel tak tak lai cheu ngaihtuah kha chuan in chanchinbu chhiar a hahdam a, ngaihruata a awmzia man tum ang chi kha a awm tawh meuh lovin ka hria, han tang zel teh u. - Thothoa Pu Chhuanliana hian kar hmasa khan mi zawn inchuh chungchang kha a rawn ziak a, zirlaibu lamah kan lo zir leh kan lo hriat thawi thin kha a ni a, a tak ngeia tawngtuin a rawn ziak a, a ngaihnawm bik khawpin ka hria. Zirlaibua kan zir nen pawh a inang chiah lo pawh a awm mai thei a, ka chiang chiah tawh lo; mahse, kan Mizo nun tak tak a rawn pho chhuahna lai kha tha ka lo ti ve khawp mai a. Hetiang lam hi, tawng a ziah lam ai mahin kei chuan ngaihnawm ka lo ti zawk thin a ni. - 8794686442 Kar hmasaa partei thu rawn thawh kha ka ngaihdan chiah a ni. Ka Kohhran mi em vang lam a ni lo va, ka lo hriat dan chiahin a rawn ziak a. Ni e, Kohhran hi zu chungchangah hian kan sawtin an tih tur ti mai turin kan han tiel (?) vel thin a, tunah chuan a tih theih tawk chu a ti ta niin ka hria. Zu zawrh hrim hrim hi ka duh lo bur pawh a ni lo va; mahse, Kohhran sawtna remchanga kan hmang nasa lutuk hi chu tha ka lo ve thin khawp mai a. Hetianga sawt thintute hi Kohhran member tho, Pathian ring inti tho an ni ngei turah ka ngai a, chin dan mawi lo tak nia ka hriat vangin ka lo au chhuahpui ve a ni e. - 8256908695 Lirnghing na ve thawkhat takin kan ram a han sawi a, kan dawnsawn dan a inang lo hlawm khawpin ka ring; mahse, chu lam chu ka sawi tum a ni lo. Tun tum chu a hnu lamah fiamthu nana hmang zui kan awm tam ta lo niin a lang a, a hmang chhunte pawhin a nghing an hlau lutuk an awm dan an sawina vel a ni tlangpui hlawm a, hma kan sawn niin ka lo hria. Lir a han nghin tak taka hlau ber ber, mangang ber ber, chiai nasa ber berten a hnu lawkah fiamthu nana kan han hmang zui leh thin kha chu a fuh lo deuh thin ka lo ti ve mai mai a. Khatiang thawm kha a awm ta lo niin ka hria a, a lawmawm hlein ka hria, chin chhunzawm zel chi tak pawh a ni mai thei bawk e. - 9436360899 Kan ram chu lirnghingin min han sawi na ve ta dat dat khawp mai a, kan hlau hlawm khawpin ka hria. Heng lirnghingte hi Pathianin a ruahman ang veka thleng a ni a, engtik hunah nge a nghin leh dawn a, a nghing leh dawn lo em tih pawh kan hre lo va, Pathian thu thu vek a ni. Pathian tawk tura kan inpeih hi a va ngai chiang tak em! Hman zan a nghin khan, kha aia rei deuh hlek chu nghing ngat sela chuan tuna message thawn tur pawh hi ka awm tawh bik kher lo mai thei a; mahse, Pathian chuan kan chungah zah a ngai rih a, eng em kan tawk lo. Pathian tawk tur hian i inpeih ve em tih lo chhut ve teh le! - Papuii Kan ram politics dinhmun hi ka thlir ve thin a, a khel ve chin tute pawh hian pute hi an intlawnsiak ni mai hian ka hmu thin. Mi ram kan sawi a, an Chief Minister leh an ram hruaitute ropuizia, an hnathawh nasatzia kan sawi chamchi a, kan hre hlei hlui a ni. Heng kan hriatte hi kan zawm ve thei lo em ni ka ti thin. Hnam dang, Kristian ni ve lo zawk pawhin mihring thatna hmang ringawt pawha an ram an hmangaih dan ka hmuh leh ka hriat thin hian rual ka va awt thin tak! Party politics khel ringawt lo leh elpuite sawichhe ringawt lo leh, mahni tana inhaivur ringawt lo hian kan ram hi tih tak takin i vei ve teh ang u, chutichuan mi ramin kan ram hi a tha zawngin, an chanchin kan sawi ang hian an sawi ve thuaiin ka ring tlat a ni. - partei Thil dang daih ka lo rawlh ve teh ang. Tun hnaiah infiamna lamah kan ram/state a thang nasa em em tih lam a ni. Kan hriat angin ni tin chanchinbuah kan ram infiam miten ram pum huapa hlawhtlinna an chan dan kan chhiar chamchi a, a lawmawm hi ka lo ti ve thin khawp mai. A bikin football phei chu kan pian enin kan khelh mi awm tak hmuhte hian ka lo hmu ve a, tun hnaia Jeje Lalpekhlua chet that thu chhiar leh hriatte hi nuam ka ti. Thalai infiam mite u, ani ang hi in ni ve thei vek a nia! Tumruhna leh thawhrimna nen bei ula, infiamna lamah hian hei ai hian thlen thui han tum teh u, in chanchin hi a ngaihnawm kan ti asin! - Bza Mizote hi a chang chuan sual em em angin kan han inchhuah thin a; mahse, a tha zawng hi kan thlir ve thin a tha khawpin ka hria. Kan President hlui thi ta, APJ Abdul Kalam-a tawngkam takin, kan chanchinbute pawh hian kan Mizo chhiatna lam aiin kan chet thatna hi han uar deuh deuh teh u. Kalam-a pawh khan Israel a tlawhnaah an chanchinbu a chhiar a, indo reng ram leh hnam ni mah se an chanchinbuah chutiang lam a hmu mang lo va, a tha lam hlir an chhuah niin a sawi a. Kan ram pawh hian tha lam chhuah tur a nei ang, chhuah ila, chhiar ila, chu chuan mi nun pawh a tihhlim ka ring thin. - Rza