Sawhkhawk of the day
MP kan thlang tur hi hetiang hian ka lo thlir a. TV velah an han inlan a, mi hmaah thu an han sawi a, PRISM-in an candidate hi vote tam tak huitu a ni thei dawn a, Hriata Chhangte lah hian a hmu nual dawn bawkin ka lo ring a. He mite pahnih vote-tu turte hi kum upa lam aiin thalai an ni furin ka ring bawk a, chutah tak chuan Mipui candidate kan tih mai hi thalai huitu tur anga kan ngaih kha a ni a, a vot-tu tur tam tak hi an kiam thei dawna hriatna hi ka nei deuh reuh tlat. MNF lamin an vawrh chhuah hian a vanneih phah lel ang em tih sawi harsa tak a ni. Independent-a ding ve pahnih hi an thil sawi dan hmang leh an che zia velah hian rin aiin mi hian kan ngaihvenin ngaihnawm kan ti ru riau hian a hriat a, an tling kher lo vang; mahse, vote la hektu erawh an ni dawn chiang. - Sailo tlangval

Tun tum MP kan inthlang tur chu a chuhtute an tha tlang bawk a ni ang, kan sawi ve sek mai. PRISM-in an vawrh chhuah hi a tlin phak em chu ka ring lo na a, parliamentary affairs a hre hle mai a, vote chu a la ve nual dawn niin ka ngai. Amah hi a kum a la tlem nasa mai si a, hetiang hi kan ram chuan kan mamawh niin ka hria a, mi tam zawk hian party-in kan en leh deuh tlat awm si a; chuvangin, a tlin pawh ring lo ka ni reng a. Mahse, MP atan hi chuan kan ram tana huaisen taka tawng thei tur, kalhmang leh tih dan tur hria hi kan mamawh zual niin ka hria, MP tha chu nei ila kan ram zimte hi a LAD fund hmang pawhin tha takin a chhuah theiin ka ring a, hma kan sawn duak duak theiin ka ring a, chutiang rilru chu mipuite hian pu tlang vek thei ila a tha ngawt ang. - Beth-i

Pu Chhuanliana’n ‘KA HUANG’ a titawp ta lo chu a lawmawm hle mai. A kum zawng a tam tawh nameuh mai a, diary tha tak a neih hi ka ring a, chutih rual chuan a hriat rengna hi a tha hrim hrim mai, dam reng teh se! - Mai-a

MP inthlan hi tum dang ang lo takinMizoramah pawh a lian hlein ka hria a, hei hi CAB vang a tih theih ang a, candidate-te an that vang leh an inbeih tawk vangah pawh a puh theih ang. Kei chu kan candidate-te an kawmna leh an thu sawi hrang hrangte ka lo thlir ve mai mai thin a, PRISM-in an candidate hi a va that hmel ve, a thil sawiah a chiang si, a kawng hmang hi a dik tlatin ka hria. “CAB kan do ang,” ti liam satliah mai lovin, do dan tur kalhmang mumal leh tha tak hi a nei tlatin ka hria a. CAB chungchang chang lovah pawh thil kawnghmang a hre khawp mai, a kum ngaihtuahin a laktlak dawn riau. - Mama Hmar

Lok Sabha inthlan kan hnaih ta hle mai a, boruak pawh a nuam leh tan viau mai. Tun tum hi kan candidate-te an tha tlang bawk a, Lok Sabha inthlan kan neih tawhah chuan kan boruak a len ve ber tum a ni ang em ka ti hial a ni. A hma kha chuan Lok Sabha inthlan chu rorel lai party chan ang deuhva ngaihna kha kan nei mai thin khan ka hria a, tunah erawh eptu lam tangrualin Mizo milar, thalai zingah ngat phei chuan tun laia tla na ber tura sawi theih an vawrh chhuak a, rorel laiin tun hmaa lar tawh, pa tha an vawrh chhuak bawk a, a ngaihnawm miah miah hle a ni. Vote kan thlak tep a, tute pawh hi tling se an insawi dan atang hi chuan an tha em em vek dawn niin a lang a, an insawi ang erawh an ni lo ve thei hlauh bawk a, risk vek a ni!! - Pa Sangpuia