Sawhkhawk of the day Mizo tawng ziak zawm leh zawm lohvah hian an sawisel fo cheu va, a har ve bawk a ni. Tun hnaia ka fak thar vena cheu chu chhut sual a tlem ta hi a ni. Thawhkhat lai kha chuan sawisel ngai khawpin in chhu sual nasa thin kha a ni a, tun hnaiah tan in han la tak tak a, a awm ta mang lo. In chanchinbu pawh a hlut zual phah khawpin kei chuan ka hria a ni, tan han la zel teh u. - Maawma Tunlai chu in chanchinbu chhiar a nuam zual hlein ka hria. Miin an sawisel nasat em em thin che u, chhut sual ang chi pawh kha a tlem sawt khawpin ka lo hre mai. In tan zel chuan hei aia tha pawhin intithei ang tih ka ring a, tang zel turin duhsakna ka hlan a che u. - Fakpuii Tunlai chu ‘Ka Huang’ a rawn tel khât deuh va, a khawharthlak lek lek mai. Chutih rual erawh chuan kar hmasaa an rawn tarlan ang khan, chanchinbu phek tam lo takah chhiar tur chikim tak in rawn telh zel a, ‘Ka Huang’ hi a tihlutu pakhat chu ni mah se in chanchinbu a chhiar a manhla tho tho zel mai. Han tang zel teh u. - Mr. Zalen Pathianni hmasaa Samu-a thu rawn thawh kha ka ngaihdan ve chiah a ni. Infiamna lam leh thil dangah hian kan han ti ve chiam thin tak na a, kan innghahna tak tak hi chu lehkha thiamna hi ni tlata hriatna ka nei. Pi leh pute atanga hausa sa, ei zawnna nei tha thei nghal tur tan lo hi chuan lehkha zir sana ei zawnna kawng dap hi kan tih mai tur zawk niin ka hria. Infiamna leh zai tih vela kan rama ei zawn lo tum ve talh hi chu a la harsa deuh niin ka hria. - Ama Hmara Kar hmasaa Mizo tawnga film an leha tawngkam dik lo an rawn sawi kha kei pawh ka lo vei ve khawp mai. Kan thalaite hian an en nasa ropui si a, kan Mizo tawng dik leh kan inkohna tam tak hi an hre lo chho mai dawn niin ka ngai a, a dika sawi leh inko thin turin a lettute hi inzir leh deuh se ka ti hle a ni. Chuti a nih loh chuan kan naupangte hi sap sikulah an kal nasa bawk si a, Mizo chauhvin kan neih inkoh dan bil leh thil sawi dante hi a bo mai ka hlau ve hle a ni. A lettute hian tan ha la deuh sela, mi puitling tak hlir an ni a, an hre vatin ka ring. - 8794686442 Zu chungchang ka’n sawi ve teh ang. Zalen-ah ngei pawh in ziah tawh angin zu manah hian kan inseng nasa hle tih a hriat a. Sorkar chuan zu atanga chhiah loh kalte chu a hlawkpui pawh a ni mai thei a; mahse, an sawi fo thin angin nunna hi a hlu hle niin ka hria a, zu hian a suat mek zel ni bawkin ka lo hre ve a. Kei chuan zu zawrh hi ka la thlawp tehchiam thei lo. Tin, pawisa hi a hek em em nia ka ngaihna chu, sumdawng reng reng, zu zuar tih loh chuan zu zawrh hnu leh hmain pawisa lengvel intam hleihzia leh an inhralh tam hleihzia an sawi zel mai. Zu manah kan inhmang da zo hlawm tawh a ni ngeiin kei chuan ka lo ngai ve tawp mai a ni. Ka hre sual mai thei bawk. - Muani Ralte Sorkar chuan Taxi intlanchhawk a titlu leh ta a, a lawmawm rualin tuartu chu an awm leh ngei dawn niin a lang. Private lirtheite pawhin intlanchhawk an hnaih hle bawk tih kan lo hre bawk a, a tha dawn hlein ka hria a, kawng tam takah kan kawngpui a thawl phah ngei a beiseiawm a ni. Chutih rual chuan hetiang thil kan rama a thlen chhan hi kan inrelbawlna fuh loh vangah ka puh lo thei lo. Ruahmanna fel tak neiin kan kawngpuiin lirthei a dawl zawh tawk tur permit hi pek chhuah ni se chu tun hi kan thleng lovin kei chuan ka ring tlat a ni. - Sangtea Kan Ram hi kan vannei ngawtin kei chuan ka hre thin. Khua a han lum ve deuh va, a tidai turin ruah a rawn sur zui mai a, khaw vawt tak tak lah kan tuar ve ngai bawk si lo, Pathian hian boruak duhthusam hi min pe ni maiin kei chuan ka hria. ‘A zawn chhuah ram kan ni e’ an tih pawh hi a dikna chen awmin kei chuan ka hria ka ti. - Malawma