SAWHKHAWK of the day Zalen hi a chhiar a manhlain a ngaihnawm thin hle mai. Kei chuan regular-a thu rawn ziak thinte hi ka nghahhlelh chhan pakhat a ni a, feature in rawn ziah thin pawh hi a ngaihnawm thin hle a, beng a tivar a, kan hriat loh tha tak tak min hrilhtu a ni e. Chutih laiin mi dang pawhin an lo sawi tawh thin, thu ziah zawh leh zawm lohvah hian tih dik tawk lo hi chu innei thin niin ka lo hre ve a, tan han la leh deuh turin ka han chah ve cheu a ni e. - 8794222395 In chanchinbu a chhiar a nuam thin hle mai. Zalen hi Pathianni chauhva chhuak a ni bawk a, in huang pawh in tizau thiam khawpin ka hria. Chanchin thar atanga ngaihdan tha tak tak thlengin a awm a, thalaite chhiar duh zawng a awm a, kum upa lam leh naupang lamin an lawm tur thlengin in dah a, sakhaw ngaihsak deuh tan pawha han keu chhuah tur a awm lehzel bawk a. Chanchinbu phek tam lo taka hetiang zep vek thei Editor pawh a fakawm hlein ka hria. Hmasawn hret hret zel tur pawhin duhsakna ka hlan a che u. - Amah Zualtea Mi hian in intihsual hi an hre thei hi ka tia, kei pawh hian ka hmu ve ziah tho va; mahse, kei chu mahni pawhin ka tihsual ve reng tur tam tak a ni hlawm tih hi ka hria a; chuvangin, tihsual satliah hi chu ka ngaihdam thei khawp mai cheu u. Fimkhur loh vang a ni lo vang tih ka hre reng a, in lam ka tang reng e. - Zalen fan Pathianni hmasaa Zu chungchang in rawn ziah atang khan zu mana Mizo kan insen nasatzia a lang chiang hle mai. Phalna nei zu zawrh hi a that leh that loh chu ka sawi thiam ve chiah lo va; mahse, kan pawisa hi chu a lo la hek nasa hle a ni tih chu a chiang hle mai. Kan taksa tan pawh a lo tha lo hle bawk si a. Kei chuan ka fak dawn lo zel chu a nih hi. - Aputea kan ramah hian tun hnaiah jail tang tlanchhuak thawm kan lo hre ve ta a. Hei hi a mak ka lo ti ve deuh hlek a, engtinnge an tlanchhuah theih tih laiah ka lo buai a ni. Film vela kan enah chuan a vengtute tham tih te leh a taka thleng awm lo tak, awihawm loh tak tak hmangin an tlanchhuak thin a. A?tak ngeiah, chuti taka remruatna tha nei awm pawha lang si lo an han tlanchhuak thei tlat mai kha mak ka lo ti ve a ni. A thawktute fimkhur loh nge, film vela kan hmuh ang hian pa takin emaw, vengtute tilungawi velin emaw an lo che ve a ni mai lo maw ka ti ve mai mai a ni. - 9436360899 Kan Mizoramin kan châk lakna kawngpui ber, Silchar road, Rangvamuala leimin hi tih ngaihna dang a awm lo em ni aw? Lirthei tang em phei chu awm lo mah se innghah ngai hian kan awm deuh reng mai a, a awm dan en hian la min zel tur pawh a ang deuh reuh bawk si a, tihngaihna hriat vat a tha hlein ka hria a ni. - Sangtea Ka ngaihtuah ka ngaihtuah takah hian Mizoram mipui tam takin kan lawm, football leh basketball ang chia inelna sang tak kan siam hi miin fiamthua ‘Icon/Idol chu mi anglo siamna mai mai,’ an tih ang deuh hi ni deuh tlata hriatna ka nei a. Heti hian infiamna huang hi kan han ti vak a, han tih vak na na na chuan hlawhtling tawk pahnih khat, hlawh sang zawk nei thei tura tirh chhuah theih hi chu kan nei ngei mai a; chutih rual chuan chhungte tihektu mai, inkhelh uar si, an thawmhnaw pawh hlawhchhuak zo lo, an zirna leh hna tibuai bawk si, mi hriat hlawh ve ang chi ni lawi si hi kan chher chhuak hnem mai mai lo maw ka ti ve mai mai thin. Kan ram tan hi chuan lehkha zira hnathawh hi a la tha ber zel niin ka hmu a ni. Ka hmuh dan a dik lo deuh pawh a ni mai thei e, min hre thiam teh u. - Samu-a Chanchinbu pakhatah Free wifi chungchang ka lo hmu a, Aizawl khawpui hmun thenkhatah mobile tower kiangah August 15 atang a hman theih dawn an ti a, a lawmawm hle mai. Kan khawpui pawh khawpui changkang takah kan chhuah tep a ni tawh niin ka hria. - 8794686442 Kan cable TV-ah hian hnam dang film tha tak tak, kan tawng ngeia en ve theiha an leh hnu an rawn chhuah thin hi ka lo fak khawp mai a. Keini ang Mizo tawng bak thiam nei lo tan phei chuan a tha lehzual niin ka hria a. Chutih rual chuan Mizo tawng an hmang dik lo thin erawh ka lo vei ve deuh thin a, entir nan hmeichhiain a pianpui mipa ‘nuta’ kan tih thinte ‘unaupa’ an han ti tlat a; a hmeichhiatpui a pianpui pawh ‘laizawn’ kan tih thin ‘unaunu’ an han ti a; mipain a pianpui hmeichhia ‘farnu’ kan tih pawh ‘unaunu’ an han tihte hi a tha lo ka lo ti a. Tin, mipain ‘vah’ nei ang deuhva an let fo pawh hi sap leh tawng dangah chuan a dik mai thei a; mahse, kan tawngah chuan mipain ‘vah’ an nei ngai lo va, kan farnute fa hi kan ‘tu’ thin a, hmeichhia pawhin a laizawn fa chu a ‘fa’ ang a ni bawk a. Chutiang deuh chuan Mizo deuhvin let mai se mipa tan ‘tu’ leh hmeichhe tan ‘fa’ angin let mai se ka lo ti ve thin. A?harsa vak chuangin ka ring lo. - ZO hmangaiha Sorkar laipui chuan Goods & Services Tax a pass ta a, keini ang duang chuan kan la hre thiam pha chiah lo deuh va; mahse, mi thiamin chanchinbu vela an ziah kan lo chhiar ve chinah chuan a tha dawn hlein ka hria a, ka lo lawm ve ringawt mai. Keini ang mi rethei tan hi chuan thil han leia cheng 2/1 leka a lo tlawm pawh hian kan lawm em em zel mai zawng a nih hi! - 8256908695 Chanchin thar leh titi lengvak velah hian vawk natna hi a leng nasa hle tih hi kan hre fo si a, kan eiin kan zuar reng tho bawk si a, a tha lo lem lo em maw ni le? Nge mihring tan pawi a thlen lutuk lo zawk ni dawn ni? - 8794107594 Mosolman-ho hi ka ngaihtuah mai mai thin a, heti em em maia an han râwng mai hi a mak ngawt mai. An chet dan hi heta tanga lo sawi vak hi chu a sawt lo mai thei a; mahse, an chet dan em em zel hi a rapthlak lulai deuh chuan ka hria a ni. An kut tuartu hi ka ni ve ang tih ka hlau em mai, ralkhat atangin ka lo khawngaih thin! - Masangtei Kan ram hi chhe ta viau ang hian kan han sawiin kan han chhuah a, a dikna chen pawh a awm ngei chuan ka ring. Mahse, kei chu ka ti ve thin a, Kohhran tha tak kan nei a, zing tin tawngtai inkhawm dar Biak In atangin a ri ziah bawk a, khawi laiah emaw chuan khawvel hmun danga sualna rapthlak tak tak ang hi a lo awm pawh a ni mai thei a. Mahse, Pathian ringa amaha innghat, amah ko rengtu tam tak kan ramah an la awm avang hian kei chu ka la lungngai lutuk lo. Chutih rual erawh chuan heti renga kan ram hi a kal a nih chuan chhiat lam erawh kan pan mek zel ang tih erawh ka pha bik lo. - Sangpuii