Sawhkhawk of the day Kar hmasa khan Sawhkhawk kha intinawn em? A thar chu a awm nual tho va, a hlui tihnawn a awm zeuh zeuh a nia, tihpalh aiin fimkhur loh vang hrim hrim a ang riau mai, fimkhur lehzual teh u. Chhut sual erawh a tam ta lo sawt hle niin ka hmu a, a lawmawm hle a ni. Chutih laiin phek hma hi intibit nge in tisin ka hrethiam chiah lo, kum upa lam tan phei chuan chhiar a hahthlak. A colour hi a chi-chawm deuh bawk thin niin ka hria. - Puipuii pa In chanchinbu hi tun hnai issue thum vel hi tihsual in ngah thei riau, Krismas a hnai a, in phili em ni...hehe!! Kar hmasa pawh khan Sawhkhawk kha a hmasa chiaha chhuak a awm nual mai. Han tang lehzual teh u! - Rosalindz Zalen hi a chhiar a manhla thin a. Miin an sawisel thin cheu va, sawisel âwm tak tak pawh a awm thin a; mahse, a tlangpui thu hi chuan kei chuan ka fak ve tlat che u a ni. Chawlhkar khata vawi khat chhuak tih avang hian an dem cheu va, a âwm ang viau mai a. Mahse, kartluan hian in khawih hman bik lo mai thei a, tihsual neih hi mihring zia a lo ni bawk nen, a âwm tihpui tam tak hi ka nei che u. Chutih lai chuan, fimkhur loh vang liau liaua tihsual ang erawh hi chu ka pawmzam mai bik lo. Fimkhur loh vanga tihsual hi lo chhiar ringawt hian a hriat ve khawp a nia..., tang zel teh u. - Amawitei pu Synod Inkhawmpui an hmang mek a, an rorel zinga mipui ngaihven hlawh tak tur nia ka lo hriat, zu chungchang an han rel ta a, an thutlukna pawh kan hre theuh ang chu! Chutih rual chuan a la dawih tho mai ka ti a, rawngbawltu zingah zu permit nei hi tunge inpuang duh kher ang; a hma pawhin a rukin an lo nei a, Synod meuhvin a phal loh chinah phei chuan an inthup lehzual ngei ang. Tuna kan kal dan nen hian a danglam tehchiam lovin ka hria, eng nge kan ngaih ve dan? - MkSiama Krismas a hnai ta hle a, rilruin Bethlehem lam a ngai ta riau mai. Mizo Kristiante nunah hian Krismas lai hian engati nge kan lung a len tlat le tih hi ka zawhna thin a ni. Min chhandam tura Lal Isua Krista lo pian hun, hun lawmawm niawm zawka ngaih tur a ni a, chutih laia kan lo lungleng daih hi a mak angreng ka ti thin. Lunglengte erawh ka dem hran lo, mak ka ti ve mai a nia.... - Ralte Lindz Krismas dawna dawrkaihovin thil an tihto chungchang kha ka lo sawi chhunzawm ve loks! Hman ata tawh ka lo vei thin a ni a, Kristian kan nihna anga mite tana kan luan chhuahna hun ni awm ang takah hian mite ei teuh kan tum thin hi a mak ve ngawt mai. Dawrkaite leh sumdawngte hian an thil zawrh hi titlawm sela, an hralh teuh phah zawk ka ring a; man to taka an hralha an hlep zat ang vel hi chu an hlep phak tho ka ring ve ringawt. An lo hlep pha lo deuh a nih pawhin mi dang tana an inpekna leh an insennaah ngai mai sela, Pathianin a thlawnin a kaltir tawp lo vang tih ring ngam sela a tha ngawt mai. - Mi rethei fa Lei chim chungchanga Pu M.Lalmanzualan PIL a thehluh kha tha ka lo ti ve khawp mai a. Hetiang mi huaisen, mipui thlavang hauh ngam, thiamna leh hriatna tha bawk si ang hi kan ram hian mi tam tak nei sela ka lo ti ve khawp mai thin a. Tawngka lama ram hmangaih leh mipuite hmangai ringawt ai chuan, a taka che chhuak thin hi kan ram hian a mamawh a ni. Thil tihnaah pawh sawi teuh aiin a thawka thawk thin hi chu langsar ve zung zung lo mah se a rei telh telh a, an hlutna kan hre telh telh zel mai chu a nih hi. Awmhmuna lo insawh lo insawh ve ringawt ai chuan huai taka che leh a tul huna a taka che chhuak thin hi an hlu em em zawk a ni. - 8794686442 Ualau taka zu zawrhin a ken tel chu zu in suala ngaih lohna leh ualau taka zu in ngamna a ni a. Naupang leh tleirawl zawkten ualau taka mi zu in lai an hmu a, hei hian an rilruah eng lam hawiin nge a hruai ang? Ngaihtuah tham tak a ni. - 9774354495 Pathian ngaitu tak tak chuan ni tin, darkar tin Pathian a au thin. Aw ka thian, eng anga zingin nge Pathian i lo auh ve thin le? - Angaihte Lungsum AMC sorkar thar chu a lo ding ta ngei a, a hmaa mite ang ema inthlak kual zing ni lo turah khan han ngai phawt ila a tha awm e. A hma kha chuan eng party ber nge kan hrawn tih pawh hriat hman mang loh khan an insorkar chhawk chhen mai a, khatiang kha chu a zah pawh a zahthlak deuh alawm maw le! Tun tumah chuan party mal an ni a, an tihthat leh tihchhiatah pawh mi dang puh tur an awm tawh lo turah ngai ila, sorkar ngialnghet leh Aizawl khawpui tana sorkar tha tak ni teh sela ka va ti em! An manifesto-te pawh kha kan la theihnghilh vek lo a nia, han tang sela, duhsakna ka hlan e. - Aizawl girlz Kan ram hruaitu, ram hmangaih intite hian mipuite hma kan sawna kan changkan hi an duh tak tak lo. Hma kan sawnna tur atana pawimawh em em electric (kawlphetha) hnianghnara kan neih theih an hlau. Eng eng emaw hydel project pamtul tam tawh dan atang hian a lang reng mai. Hei bakah hian inbiakpawhna lamah leh inkalpawhna kawngpui an siam dan leh an enkawl dan atang hian mipuite hi kan changkan an hlau ka ti. - Ralte Boyz Khawiah pawh awm ila, kan rin Pathian hi han thlahthlam duh miah lo mai ila, rau chiam lo mah ila, han phatsan duh miah lo mai bawk ila, kan tum hi chu kan kai ve mai hi chuan ka ring. - Kimkima Hringnunah hian harsatna tam tak a lo thleng thin a, tu pawhin, mi hausa, rethei, piangsual leh mi pangngai chen hian harsatna kan tawk thin. Kan harsatna tawh hi keimahni kan inang lo ang bawkin a inang lo va, thenkhat tana harsatna tling mang lo hi ka tan chuan harsatna lianpui a ni thei. Tu pawhin harsatna a tawhin insawinepsak mai lovin, kan tanpui thei a nih chuan puih dan kawng zawn hi a puitling zia a ni. Chutih rualin harsatna inbawhbehtir erawh mi puitling lo zia a ni ve thung a, mite pawhin an paltlang tawh tia vaupung tina chunga tawn ngam hi a huaisen a, kan tih tur pawh a ni tih hi he Zalen chanchinbu kaltlang hian ka rawn sawi ve a ni. - Amah Sangte Krismas a hnai leh ta khawp mai a, a common hmain ‘Krismas chibai u!’ - Muankimi