Sawhkhawk of the day In chanchinbu hi a ngaihnawm thin a, belhchian tlakin thawk zel teh u. In article chhuah thin te pawh a ngaihnawm thin khawp mai. Chutih laiin thuziak mi in neihah hian Pu Lalthlamuana Ralte hi a thuziak a bengvarthlakin a ngaihnawm em em a; mahse, thlirna pakhat chauh ang chi hi a dik ber em aw ka lo tih ve mai mai, a thil ziah hrim hrim hi chu a tha a. Mi dang pawhin an sawi tawh thin a, colour phek pahnih hi a chiri an tihsak theuh ang deuh hian ka lo en chiang de deuh va, an sawi ang hi a ni ve thei tlata hriatna ka nei a, a thlir a hahthlak riauin ka hre ve a ni. Eng pawh chu ni se, in tan phawt chuan hei aia tha hian in chhuah thei tih ka hria. - MkSiama In chanchinbu hi chhiar a manhla thin khawp mai a, in thuchhuah tinreng mai hi hlawkpui tak taktu an tam ngawtin ka ring thin. Hetianga chhiar tur tamna ang chi Mizoram chanchinbu dangah hian a awm lovin ka hria a, miin an sawisel thinna karah cheu hian ka rawn fak ve hrim hrim cheu a ni e, tan han la zel ula, hei aia aia ngaihnawm hian in chhuah theih ngei ngei ang tih ka ring tlat a ni, ka lawm e. - 9856393154 Pu Chhuanliana’n a chuan a rawn chhunzawm leh ta a, Pathian zarah dam zel sela, chakna neiin han ziak zel teh se. Chutih rualin ka sawisel ve duh cheu chu, in chanchinbu hawrawp hi a te bik riau hian ka hre thin, thu chhuah tur in duhthaw avanga tite in ni mai thei a; mahse, a lem lian deuh deuhva dah kher lo hian a hawrawp hi tihlen dan a awm lo’m ni? - Mamawitea TV programme in tihsual kha an rawn chhuahchhal tawh cheu a, Pathianni hmasa pawh kha a dik lo mai thei. An sawi angin, tihhmaih palh leh tihsual awl tak tur lai niin ka hria a; mahse, in fimkhur zual chuan a dikin in tichhuak thei ang tih ka ring tlat, kan lo en ve ziahin kan hmang tangkai teh mai a nia. - Zalen fan lulian Pathianni hmasaa 9436360899-in a rawn ziah kha ka va pawm ve aw....!! Ni e, a sawi ang khan mihring hi ropui ve viau emaw kan intih pawh hian min neitu tak tak a chet hi chuan kan lo ropui lohzia hi a lang chiang thin khawp mai. Tumah hi Pathian hmaah chuan lo inchhuang thei kan awm lo, kan san leh len lai ber hi Pathian kan mamawh hun lai tak ni zawkin kei chuan ka hria a ni. - Sangsangi Kar hmasa khan thangtharte Mizo tawng thiam loh thu kha an rawn SAWHKHAWK a, ka lo hmu a. A rawn sawi dik khawp mai. Thangtharte hian an thiam loh tawh bakah an la lam duhdah zui hi ka lo haw thin, tunlaiah chuan bai pawh kan nei tawh lo, bei chauh kan nei tawh. Nem leh nam hmanna pawh an hre hrang tawh lo. Mahni tawng kan hnualsuat chhung hi chuan kan hnam hi a changkang harin ka ring ve tlat, thangtharte u, thiam han tum leh teh u. - Mawimawii Karlehah hian Mizorama Kohhran thalai pawl lian ber, KTP chuan General Conference an hmang dawn niin ka lo hria a. Mi titi atanga ka lo hriat dan chuan a thlengtu tur, Champhaiah chuan inkhawmpui chhung hian zu zawrhna dawrte an khar ang a, Rihdil kal pawh phal a ni dawn lo tih ka lo hria a. Kohhran thalai pawl inkhawmpui tur chu hetiang mai mai hian a tihbuai phak loh turah ka lo ngai deuh va; mahse, an kharin an phal lo dawn miau si niin ka lo hria a, mak ka lo ti ve deuh mai mai. Chutih rualin rawngbawltu tha tak tak zingah pawh him lo hi kan lo tam hle dawn a nih hi ka tih phah ta a, in enchian kan ngai hle a ni. - Awngawngi Taxi intlanchhawk hi kan khawpui hian kan mamawh khawpin ka hria. Kan kawngpui hian a dawl zo thlawt lo a ni. Motor hi 10 an inzui chuan 3 chu taxi an ni deuh zel mai hian ka hmu a, a chang phei chuan taxi 10 dawn inzui pawh hi hmuh tur a awm. Kan mamawh tawk aia tam hi ni tin an tlan niin ka hria a, intlanchhawk teh se. Mi state, Pathian thu pawh hre lo zawk pawhin an tih theih chu Kristian zawk chuan thuawih takin taxi neitu leh khalhtute pawhin an tih theih ka ring tlat a ni. - MkSiama Tunlai chu Taxi intlanchhawktir tum leh taxi lamin an duh lohna thu a tam hle mai. Tun dinhmun atan hi chuan a khawi ve ve tanna pawh hi a dik ve ve ka ti. Chutih rual chuan thuk deuh han ngaihtuah chuan sorkar bawk hi a mawhpuh loh theih loh niin ka hria a, kan khawpui kawng neih dan tawk hretu an ni a, kawngpuiin a zawh loh tur khawp ngati nge taxi permit an pek tih hi a ni. A tirah khan khauh takin pe lo ngam hmak hmak sela, mipuiin kan mamawh tawk leh kan kawngpui zawh tawk kha pe mai sela, tun ang buaina hi chu kan tawkin ka ring lo. - SzRamdina Khua hi a lum chak inti ve em? Hei hi engvang nge ni ang? Ka hmuh dan chuan khuarel thilte kan humhalh that loh vang chiah niin ka hria a. Pathianin khawvela thilnung a dangte mamawh tawk pe tura thlai leh khuarel thil dang a dahte kan tichereu nasa lutuk a, hei hi kan tuar a, duh aia hmain khua a lum a, a vawh lahin a vawt chiam a, fur pawh a na a, khuarel chhiatna pawh kan tawng nasa zual zel ni hian ka hria. - 8256908695 Presbyterian Kohhran Pakhat chuan an member zinga sorkar phalna thlapa zu zuar chu an Kohhran danin an phurar tih thawm vel ka lo hre ve a. Kohhran, a bikin Prebyterian Kohhran hian zu zawrh dawn khan an duh lo nasa bawk a, an tih awm tak an ti niin ka lo ngai ve hmiah mai, a zuartu demna lam ni lovin. Zawrh phal a nih dawn lai vel khan an tang na bawk a, tumahin an chet dan hi kan dem thei lovin ka hria, ka ngaihdanah chuan.... - 8794686442 Khawi hmunah pawh, eng dinhmunah pawh, engtik lai pawhin Pathian hi hnaih ila, ani chuan min thlahthlam ngai dawn lo tih ka chiang a ni. Pathian faka lâm te, khawlai lo fan leh inbingbileh pawh a tha. Chung zawng zawng aia tha chu amah kan rin tlatna hi a ni. Lâmin inbingbilet ila, khawlai fangin au chiam chiam mah ila, a thu ka awih that leh si loh chuan engmah a ni lo vang. Pathian hi i hnaih tlat ang u. - Thanpari