Sawhkhawk of the day Kar hmasaah KA HUANG kan lo châng a, beisei loh deuhvin editor meuhvin bul tan dan a rawn ziak a, a ngaihnawm khawp mai. Tin, Pu Chhuanliana te nupain an inneih diamond jubilee an lawm tih pawh kan lo hria a, kan lawmpui hle mai. Editor-in a rawn ziah kha a chhiartu tan pawh a bengvarthlak khawp mai a, keini ang, a tir lam chhiar ve hman lo tan phei chuan a ngaihnawm dangdai hle a ni. Pu Chhuanliana pawhin chhunzawm leh a tum tih kan lo hre bawk a, a nuam khawp mai. In chanchinbu tihlutu ber pakhat niin ka hria a ni. Dam zel sela, ngaihnawm takin han ziak zel teh se. - 8794686442 ZALEN chhiartuten kan duh em em nia ka hriat, kei pawhin ka duh, Pu Chhuanliana Huang hi chhunzawm a ni tawh dawn lo em ni? Hetiang a nih chuan ka ngaihdan chuan Zalen hlutna hi a chanve velin a tlahniam dawn niin ka hria, a kum a tam tawh tih chu kan hria a; mahse, han chhunzawm leh theih hram sela ka va han ti em!! - Chhuanliana fan ruhkawl zalen chanchinbu tihlutu ber zinga mi, Pu Chhuanliana te nupain an inneih kum 60-na an han lawm thei kha ka va han lawmpui em!! Dam zel sela, Zalen tihlutu ni zel bawk teh se! Heti chen nupaa an dam thei hi an fakawm a, Pathian malsawmna an dawn vang a nih rualin mahni taksa tichhe thei lakah pawh an insum thei viauin ka lo ring ve ngawt a, thalaiten entawn tur kan ngah hle a ni. - Fakpuia Kar hmasa khan TV programme kha in tisual em? Nge a thar dah lovin a hlui inring tlang mai? Tihsual palh a nih chu ka ring a; mahse, fimkhur zel nan ka han hrilh ve mai mai che u a ni e. - Zalen fan Kan nghahhlelh, a bikin thalaite tana nghahhlelhawm zual tak tur, AMC chuan a remchang laiah a thlawna hman thei turin wifi a dah dawn tih an puang ta a, a lawmawm hle mai. Tun hmaa mite angin mahni tiam tawh tih leh loh ching lovin, an intiamna ang ngeiin thil dang pawh kha tihlawhtling zel turin tan han la zel teh se. Kan ram hi dikna duhin a hruai a ngai tawh a ni. - pianga Tunlai hian khua a vawt khawp mai a, a vawh thu hi kan inhrilh sup sup a ni deuh ber mai a. Heti hian ka lo ngaihtuah ve mai mai a, a vawh hun laia a vawhzia thu sawi tam leh nin thu tiri sekho hi nakinah, khua a lum hunah te, ruahtui a tlak hunahte pawh a sawi uar leh a ning an ni leh tho vang. Mihring hi thil reng reng, mahni tawn anga lungawi thei lo chi hi awm ve ni ngaiin ka hria. Hetiang mite hi chu an duhthusam thin thil pawh neiin tawng ta thut mah sela, ‘rin aiin a ho’ ti leh tho tur chi niin ka lo hre ve mai mai thin. Eng nge in ngaih ve dan? Tlai laklawk tlai reng ang deuh hi an ni maiah ka ngai hmiah mai. -Rammoia Ka hming avangin hnam zawng zawng huat in ni ang (Bible). Ringtu kan nih hian mi huat kan ni tih hi pawm mai ila a hahdamthlak mai. A hranpaa mi huatthu kan va sawi kher a ngai lo va, “Mi huatthu kan sawi em lo vang chu maw?” kan ti thlazen hi chu a fuh lo deuh chuan ka hria. Chutia ka sawi avang chuan mi huatthu ka va sawi tur tihna erawh chu a ni lo, tuma huatthu sawi lo mah la, ram leh khawtlang tana mi tha tawpkhawp pawh ni mah la, ringtu kan nih avang ngawt pawh hian hnam zawk zawng huat kan ni tih hi aw ring mnai rawh, aw ring mai rawh! - 9402520257 Presbyterian Kohhran hnuaia Thalai Pawl intawhkhawmna pakhat, Pastor Bial Conference hman mek a ni a, he conference hi kumin chhunga KTP kal dan tur tam tak hriltu tur a ni leh dawn a, rorel pawh an uluk thin hle a ni. Presbyterian Kohhran hi inkhaidiat fel tak a nih angin KTP pawh hi khaidiat fel tak neih a ni a, he conference hian Central KTP, General Conference/Rorel Inkhawm thleng a nghawng phak leh dawn a. Conference hmangtu thalai zawng zawngte hlawk taka hmang turin ka chah cheu va, in rorelnaa thutlukna tam tak hi kan ram nghawng a ni leh dawn a, uluk tak leh fim taka rorel turin ka duh cheu a ni. He conference atang hian thil tha chhuak mawlh teh se! - Adika Mi khirh tak leh zahna chang hre lo, sual Setana hi a huangtau em em a, chhungkua, khawtlang, mi mal nun tihchhiat vek hi a hnapui ber leh a tum lian ber a ni. Inhmuhsitna, inrem lohna thlentirtu pawh he sual Setana bawk hi a ni a; duhamna sual bawiha min hruai luttu tur pawh he sual Setana bawk hi a ni. Mahse, ringtute kan vanneih em emna chu he sual Setana hian kan nun a tibuai ve phak lo va; tin, khawvel tawp thleng pawh hian min thunun thei dawn lo bawk a ni. - 8415052704 Hmanni khan lir a nghing a, a nghin zawh chiaha mi tam berin kan ban nghal chu kan phone a ni ngei ang. Khati khawpa min tihthaih chung pawha a hmasa bera Pathian au lova thil dang kan ngaihtuah hmasa zawk khan kan Kristianna dahlau tawhzia a tichiangin ka hria. A tak takah chuan Pathian bak hi min chhanhimtu, min thlamuantu leh kan hahdamna tur dang a awm lo tih hi he chanchinbu chhiartute hnenah hian ka hrilh duh cheu a ni. - Mahruaii Nikum Synod Inkhawmpuiah khan kumin atang chuan zu permit nei chu rawngbawltu atan ruat tawh lo tur ang deuh khan an rel tlatin ka hria a. Presbyterian Kohhrante hian engtin nge hma an lak zui zel le? Kan vengah chuan engmah sawi zui hi a awm lo va, nikuma rawngbawltua an ruatte kha an la ruat vek a, mi thar tlem an awm bawk a. Tumah rawngbawltu zingah khan zu permit nei an lo awm lo nge ni anga Kohhranin a zir chiang lo hrim hrim zawk tih pawh ka hre ve pha lo. An ti tak tak dawn a nih chuan a nei chu paih vek turin uluk takin zir sela ka ti hle mai. Kohhran hi ka dem lam a ni lo va, na takin tang se ka tih vang a ni a, zu leh rawngbawlna kalkawp hi thil inhmeh lo tawpkhawk nia ka hriat vang a ni zawk a ni. - Samu-a Kum tharah nun thar’ tih thupuia hmangin kum bul hmang theuh ang u aw... - Dsa