SAWHKHAWK of the day Mi dang hian thil dang an sawi thin a, kei chu Thukhawchang hi a ngaihnawm ka ti ber ve thung. Hman deuh khan mi pakhat thuchhuah chauh chhuah hi ngaihdan pakhat chauh anga ngaih theih angin an rawn sawi tawhin ka hria a, a dikna chen chu a awm ang; mahse, keia lo thlir vena atang chuan ziaktu hian a ziak lai thei khawpin ka lo hria a, mipuite hnenah kan chanvo leh tih tur, sorkar kan mawhphurhna tur kan hriat loh tam tak min hrilh thin niin ka hria a. Keimah bik hi chuan ka fak takzet a ni. - Papuia Zalen chhiartu zawng zawngte Krismas chibai u! Kumin chhunga chanchin thar, article, Ka Huang, Thukhawchang, Dr. Hrekima leh Doctor zawhna min hlui zawng zawng kha ka hlawkpuiin chhiar nuam ka ti em em e, kum tharah pawh hei aia thaa in kal zel theih nan enkawltute duhsakna ka hlan a che u. - 8794686442 Kum a lo tawp leh dawn ta a, Zalen chhiartu zawng zawngte Krismas chibai ka buk vek a che u. Kumin chhungin he chanchinbu kaltlang hian hriatna tam tak ka dawn belh tih ka inhria, miin sawisel thin cheu mah sela kei chuan in chanchinbu hi ngaihnawm ka ti zel a nia, tang zel ang che u. - Mamawitea Tunlai chu Dr. Hrekima Titi hi tha ka va ti thei tak em! Mipa ka ni na a, ka chhungte, a bikin hmeichhia ka chhiartir ve thin. Kar hmasa lama chhuak, tleirawl sexy chungchangte kha a tawk tektawk ka ti hle a ni. Mi tam takin an hlawkpui ngei ka ring tlat a ni. - Muantea Krismas kan lo hnaih leh ta a, mi tin rilruin Bethlehem lam a hawi leh ta ruih mai. He hun hi keini Mizote tan phei chuan kumpui lingleta kan nghah, kan neih ang zawng zawng pawh he hun atana ui miah lova kan sen ngamna hun a ni a, nasa leh ropui thei ang bera hman kan tum thin. Chutih rual chuan kan hman chhan ber hi theihnghilh lo turin i fimkhur ang u aw... - Manga Pathian kaihhruainain kum kan lo hmang liam leh dawn ta a, kumin chhung zawnga min hruainaah Lalpa ka lawm e. Kum tharah pawh min hruai leh la, kei pawh nangma hruai theih tura awm turin min pui la, mi dangte tana tangkai ka nih theih loh pawhin an tana hnawksak ni lo turin min pui bawk ang che, Amen. - MkSiama Synod Inkhawmpui an hmang zo va, hmana Sawhkhawka ka lo ziah tawh ang bawk kha a thleng leh ta niin ka hria. Tunlai social media chak tak avangin rorel zawh hmain rorel apiang kan lo hre thei a, rorel inkhawm tawp dawn lamah hei hi Moderator pawhin a sawi chhuak hial niin ka lo hria a. An rorel hun chhung hi a rei em a, a zawh hma, puan chhuah a nih thlenga up chu a har mai thei a; mahse, rel fel a nih ruala a darh nghal mai ang chi kha chu a fel chiah lo reng a ni. Hmana ka rawn sawi tawh, hre hmasa nih hi a tangkai leh a pawimawh hun awm bawk mah se hun tam takah mi anglova min siamtu a ni thei tih kan hriat nawn leh fo a a thain ka hria. Kumin inkhawmpuiah khan Kohhran khata mi challang thiau an thukhawm a nia, khang mite pawh kha an insum thei lo ni awm tak chu a nia, Mizote hi kan zia chu a lo inang deuh thum ni awm tak a ni ka ti ta deuh bawk. - Puipuia Tunlai chu lei chim a lar khawp mai a, a chhanah an inpuh tawn vel thawm pawh kan lo hre ve a. Eng pawh chu lo ni ta se, thil thui tak pawh ka hre ve hek lo; mahse, sorkar hi ka mawhpuh lo thei lo a ni. - Aizawl tlangval Mizorama Kohhran lian ber chu zu permit nei chu rawngbawlna chanvo neih phal loh tiin a rel ta a, a lawmawm rualin zu permit nei hre tur hian engtin zel nge hma an lak dawn tih hi ka hriat châk zawng tak a ni. Tum tak tak sela chuan hriat theih dan awlsam tak chu a awm ang; mahse, ka lo hlauh chu zu in phal lo satliah, a in ngei a ni tih an hriat an phuar ngai lo ang deuh hian nei nia rinhlelh ngei si, rawngbawlna chanvo hlihsak tak tak chuang si lo vel hian an chhuah leh mai ang em tih ka hlau a ni. An ti tak tak dawn a nih chuan permit nei hi sorkar lam atang pawhin a hriat theih vek ngeiin ka ring a, mahni Kohhran theuha mi lo nei kha chu bân hmiah hmiah mai sela a tha ang. An ti tak tak dawn em lo ngaichang zel teh ang. - Zu-a Krismas a lo hnai leh ta a, kan theih ang angin pawl leh mi malte pawhin a mamawhtute tan an theih ang angin tanpuina an sem chhuak leh ta a, Kristian nih hi a va lo nuam em! Sual viau angin han inhre mah ila, a hunah hian kan Kristianna hi a lo lang leh thin. Ram dangah mi hausa, Pathian hre lote pawh an ti tho kan ti a ni mai thei a; mahse, ram danga hetiang ti thinte hi chuan an hausak em avanga ti ve mai an ni a, keini erawh chu Pathian avanga ti kan ni bik tlat a, ringtu kan nih vang chauhva ti kan ni. Kan neih chuangliam kan pe lo va, kan neih tawk atangin kan theih ang ang kan thehchhuak a, anni chuan an chuangliam an pe a, kan inang thei lo. Krismas puala thilpek petute zawng zawng Lalpan a let tam takin rul vek cheu rawh se. - Mizopa Masi a hnai ta, chhungkua leh khawtlangten kan compound te, kan veng chhung a rem lai kan chei leh ta sup sup mai a, a lawmawmin khawhawi a tinuam a, rilru a ti-Bethlehem ruih bawk nen, uar zel atan a tha hle. Mahse, mi mal in, veng chhung kan cheite hi a tlangpuiin 'zan lama hmuhtlak/nuam chauh' a ni lo maw? Zan lama pawn chhuak hleithei lote tan thlir tur a vang hle mai, a chei nana kan sum sen hian chhun lam leh zan lama thlir nuam ni kawp tur hian a siam rem theih ka ring tlat. Kum tharah chuan November thla laihawl vel atangin chei tan ila, chhun lama mawi leh hmuh nuam ni tel tura chei ni thei tawh se, a va duhawm em! - TSA Khawvel ropuina leh mawina te a la chuai ang a, reilo te chhung nawmna nge kan thlakhlelha kumkhaw nawmna tur zawk le? Kawng dik lo lam kan zawh palh hlauh a nih chuan thlarau sual leh ramhuai awmkhawmna hmun, a hming pawh hremhmun an tih hmun chu i chang dawn tihna a ni mai. Felna kawng dik zawk kan zawh a nih erawh chuan riltam, tui hal, nat leh hrehawm awm tawh lohna hmun, Lal Isua hmun buatsaih chu ringtuten kan chang thung dawn a ni. Tupawh sawmna ngaithla duh lo chu an sawm nawn fo dawn em ni? - 9402520257