Sawhkhawk of the day In Chanchinbu hi regular taka chhiar vetu zinga mi ka ni a, an sawisel luih luih lai cheu pawha lo tan ve tang tang thin cheu ka ni a. Kei chuan tan man hi in awm ka ti tawlh tawlh mai. In tihsual leh dik lovah tan in la niin ka hria a, chu chu a chhiartute hian kan hre thei khawp a nia. Pathianniah hian chanchinbu dang a chhuah loh vang nge, a ngaihnawm ve hrim hrim vang ka hre lo va; mahse, in chanchinbua in chhuah hi chu chhiar a manhlain chhiar chhuah dap a awm bik riauin ka hria. Sawiselna lai tur chu in awm lo tawp chu a ni tawh lo va; mahse, in tan phawt chuan hengte pawh hi a ziaawm chho zel ang tih ka ring tlat a, tan han lain han ngaihnawm zel teh u. - Chhantei Zalen Thalai huang-ah hian sap filmstar chanchin, a tam zawkte phei chu Mizoten kan hriat lar em em pawh ni lo chanchin hi in ziak tam mah mah lo maw? - Awma pa Dr. Hrekima hi damdawi lam chauh emaw hre kim ka lo ti a, a lo ni hauh lo, thu leh hla lam pawh a hriat kim vek avang hian a chungah lawm thu ka sawi tak meuh a ni. Zalen chhiar a tihnawm phah tak zet zet e. - Sawma, OmOma Pa, Bethlehem Veng Zalen a ngaihnawm zel e, chhut dik loh pawh an sawisel zing ta malh malh bawk cheu a, tunah chuan a ziaawm tawh khawp mai, han tang zel teh u. - Mawimawii Kum 30 dawn a kal ta. Khang hun lai khan intipiangthar tha, zuk leh hmuam, ruihtheihthila fihlim, mite pawhin fel min tih leh fel inti tak ka ni thin a. Ka in leh a chhehvelah ruihtheihthil zawrh/awm ka phal lo va, ka in luahte pawh ka hrilh bawk a. Vantlang hriat ngei turin ring deuh deuhva ka sawi thin bakah chanchinbuah te ka chhuahtir vel thul, miin fel min ti se tih vang lekin. Rei pawh a ni lo, ti khawpa fel inti si, ka fate chu kan venga ruihtheihthil ti nasa an lo ni reng mai tih ka’n hriat chhuah meuh chuan ka zakin hnar a va lian tehreng em!! Chapo leh intifel em ema vantlang hriat tura au au ve lo fate erawh an fihlim tlat lawi si. Mahni fate pawh thunun thei lo, mi hmuha fel ka lo tum em em kha mite nuihsawh leh hmuhsit bak ka hlawh lo tih tunah hian ka hre chauh. Hetiang thil hi tunlai khawvel changkang tawhah tumah an tih duh ka ring tawh lo. A ramhlui zia tawh tlat. - 9856835945 Sumah miin a rilru zawng zawng a pek chuan mi hmantlak a ni ngai lo. Kan dam chhung khawsakna atan hian sum chu pawimawh tak a ni a; nimahsela, sum ringawtah miin a rilru a pek chuan chhungkua pawh a vawng fel thei lo va, chhungkua chuan harsatna leh buaina a tawng ngei ngei a ni. Chunakah Pathian aia sum kan lo hmachhuan zawk chuan a fuh thei lo va, chhungkua a thlahthlam a, ama chungah pawh chhungkua a vui bawk thin. Amah Pathian lovin a thilsiam kan lo Pathian hian pawi tak a ni. Sum pawh hi Pathian avanga awm chauh a ni tih kan hriat a tul hle. Chuvang chuan chhungkua i vawng him tawkin i inhria em tih lo inzawt teh. Taksa bawrhsawmna han tawk ta chiah la, i sum kha ip pawpa thlak ang hlauhvin a ral hiau hiau mai ang. Chutah chuan sumin a chhan zawh lohzia che chu i hre mai ang. Pathianin i damdawi ei thinte kha mal a sawm loh chuan i tan thihna turah a chang thei bawk. - The Slam Kan dam chhung hian Pathian thutak chu kan sawi tur a ni si a. PATHIAN thutak lo hi chuan thinlung lairil a fan tak tak thei lo va, vawiinah hian engin nge min titlei a, eng nge kan tleipui ber hlawm le? Reilo te atana nawmna nge kan thlakhlelh a, kumkhua chatuan pawha chuai ve ngai lo tur leh kumkhaw nawmna tur zawk le? He khawvel hi zawng reilo teah a ral thuai dawn, rei a rial tawh dawn si lo; inpeih lote inpeih a hun tawh takzet zet a ni. Ropui takin Lal Isua a lo kal hunah hlim tak leh lawm taka tawk thei theuh turin i inbuatsaih sauh sauh zawk ang u. - 8415052704 Engpawh mai hi zira thiam theih a ni a. Nungcha humhalh te, puipunna hmuna mei zuk that lohzia te kan inzirtir nasa em em mai a. Kum 20 te a’n vei meuh chuan a hlawhtlinna kan hmu chho ta zel mai. Zu pawh hi in loh a tha ber, in pawhin rui khawpa in a that lohzia hi nasa zawkin inzirtir thar ila, kum 20 a vei meuh chuan kan hlawhtling em em ang, nghah peih erawh a ngai. Khaw eng hmu turin thim chhah paltlang a ngai. - Matea pu Krista chanchin tha hi Zoramah ngat phei chuan kan sawi nasain kan hre tam hle a ni a tih theih awm e, chu lo pawh nise in tin deuhthawhah Bible kan la nei thei zel bawk a. Chutichung pawha sual lam kawng la zawh zel duh i nih chuan tihluhlula awm te, tha duh hauh lo kan tih te tihna a ni a. Hre reng chunga zawm duh lote baka awih lo fa an awm chuang lo.Sam 37-na hi kan chhuang hle a ni, thil tha lo titute avangin kan intilungngai dawn reng reng lo. - Hruaitea Mizote hian kan rin thuhmun ti siin Kohhran hrang hrang, thurin hrang vek nei kan ni a. Mahni Kohhran lo phei chu van kai lo turah kan inruat hlawm a nih hi. Meh, hei hi i hria ang u: Rorelpui hunah chuan lalpa hmaah kohhran kan sawi dawn lo. - 8413061091 Mizoramah hriselna kan ngai pawimawh ta hle mai a, a bikin puipunnaah mei (cigarette) kan zu ta lo tluk a ni. Hetih lai hian artui plate puipunna leh veng chhungah thosi hnawh darh nan kan hal thin a. Mi thiamte sawi danin chuap, lung leh thluak tan a tha lo hle tih a ni si a, sim atan a tha khawp mai. - Papuia pa Zu in, khaini, sahdah hmuam, tualthat te,, rukru, uire, KS te, sual te leh lian Pathian mithmuhah chuan a awm chuang lo va, mihring hian sual te leh lian kan lo thliar hrang vel mai mai a ni, kan ngaihtuah chiang lo thin a ni. Chutih rual chuan Pathianin ngaihdam theih loh a nei lo kan ti leh lawi a, Bible kan chhiar chuan heti hian kan hmu a ni, Johana 8:24-ah, ‘Chuvangin, in hnenah in sual nei rengin in thi mawlh ang,’ tih kan hmu a, amah a ni tih kan rin loh chuan eng thil sual mah ti lo mah ila Lal Isua Pathiana kan pawm theih loh chuan sual renga thihna a ni si. - A.K.C