SAWHKHAWK of the day Pathianni hmun dangah ka hmang a, in chanchinbu hi ka lo atchilh hle mai tih ka inhre chhuak, ka mikhualnaah zing ka thawh hlimin ka zawng hman tep alawm maw le!! Ni e, in chanchinbu hi Pathianni chauhva chhuak a nih vang hian a hlu danglam a, in huang hi a zau bawk si a, chhiar a manhla thin em a ni. Chutih laiin hmasawnna tur tam tak in la nei ve tho mai a, tan han la ula, keini leh Zoram tan hian theihtawp han chhuah zel teh u. - Asiami Thangluah Zalen chhiar a manhla thin khawp mai. Kar hmasa SAWHKHAWK-a an rawn tih ang khan, thu ziak zawm leh zawm lohvah hian a thawktute hi in inthurual lo emaw ka lo ti ve fo mai. Phek thenkhata inzawm hi thenkhatah inzawm lo va, in ti inang lo nuaih mai. Thu pakhat huangah pawh inzawm leh zawm lo hi a inang lo fo bawk. Mizo tawng hi a har em a, kei chuan ka hrethiam vek lem lo va; mahse, in chanchinbu atang hian inzir dawn ta ila, khawi thu hi nge zawm tur leh tur loh inzir nan chuan a harsa thin khawp mai. - Muantea Pu Chhuanliana’n a rawn chhunzawm leh thei ta chu kan chhungkua kan lawm khawp mai. Ani hi hriatna tha a ni a, a thu ziak hi kan hriat phak hma deuh vek mah ni se lung a tileng ve hrim hrim a ni. Dam reng teh se! - NM Pathianni hmasaah khan in columnist Pu Muantea khan Brexit chungchang kha a rawn ziak a, ka fiah ve ta kuarh mai, ka lawm hle a ni. Keini ang saptawng kawi khat pawh thiam lo tan chuan a hlu hle mai. - Apute Mesa Pathianni hmasaa Pu Chhuanliana’n a rawn ziah, thla ang deuh kha kei chuan ka hria. Ka nu hi a ni a, kan naupan deuh lai khan Inrinni tuk a bazar leh a chhuakvak hi kan kawt kawng chhakah hian a rawn haw hma minute 15/20 velah hian a aw hi kan hre hmasa ziah a. A tirah chuan a rawn haw niah kan ngai thin a; mahse, a nih tak fo avangin a hnu zelah erawh chuan kan hre thiam a, kan unau hian, “Tun atanga minute 15 velah a lo haw ang,” kan lo ti mai zel a, a ni tak tak zel. Ni ziah phei chu a ni lo va; mahse, a nih chang a tam khawp mai. Tunah erawh chuan khatiang khan ka nu aw chu kan hre hmasa ta ngai chuang lo. ‘Damlai thla’ kan ti mai zel. - 8794686442 Kar hmasa khan Krismas leh Kumthar vuakveta YMA Branch panga tangkhawmin Treasury Square leh a chhehvel an ven chungchang kha SAWHKHAWK-ah hian ka lo chhiar a.?Helai bawr vela ei zawng hi ka ni ve a, tuna an duty loh (an duty lutuk tawh lovin ka hria a) nen chuan inthlau tak a ni. Duhtawkin ruihhlo ti, a zuar leh rui hi an tal ni mai hian ka hmu. Mahnia lo hauh leh lo tih ve ngawt a rem thin bawk si lo va, han tangrualin hma han la leh thei sela ka lo ti ve khawp mai- Eltea Kohhran hian YOGA hi heti kauva a hlauh danah hian an biak Pathian aia thiltithei zawk ni theia an ngaih vang a ni deuh ber mai lo’ng maw!! Hriat hmaih an neih erawh chu Hindu-ho hian mi tumah hi an sakhuaa seng lut tura tanlakna an nei ve ngai lo. Yoga hlautute hian an rinna lam a nghîng thei niin an ngai a nih deuh ber hi maw!!!! - Ramthanga Remna ni kan hmang zo ta a, TV atangin ka lo thlir a, mipui pawhin an hlut khawpin ka lo hmu. Hman ata tawh khatiang khan kan hnam tana ni ropui ber pakhat hi lo hmang ila tha tur a ni a. Tuna Central YMA-in ruahmanna an han siam chhuak hi awmhmunah ka lo lawm ve veng veng mai a ni. - 9436360899 Mizoramin remna kan neih champha kum 20-na chu ropui takin kan lawm ta a, a ruahmanna siamtute an fakawm khawp mai. Hnam Pasalthate pawh an lung a leng viau niin ka lo hria a, kan ni ropui a ni a, khatianga lawm kha a phu a ni. Chutih laiin Prime Minister a lo kal lo leh sawmna a chhang miah lo anga sawina kha ka lo helh ve khawp mai. A ram chhung a ni a, min ngai pawimawh lo ka lo ti ve ringawt a ni. Tunge thiam lo phei chu ka hre ve thiam lo; mahse, a tih dan kha a awm ang lo ka ti ve a ni. - 8729805358 Central YMA hmalakna a fakawm hle mai. Tunlai thangtharte hian remna hlutzia pawh hi kan pawh phak ta lo va, kan nu leh pa leh kan pi leh puten remna awm hmaa an hun hman dan hrehawm turzia kha kan mitthla thiam hauh lo. Mahse, Zikpuii pa ni tain ka hria, “Sipaite hi ram ralmuang apiangah an ngaisang lo,” tih lam hawia ziak kha. A dik a ni, tunah sipai hi Mizote hian kan ngaisang lo tlangpui a, fiamthu kan thawhnaah pawh kan hmang zing. Hei hi kan hnam a ralmuan em vang a ni a, ram raltiah chuan an kianga awm kan thlahlelin an venhimna kan mamawh hle ang. Chuvangin, hetia mawl taka ka han ngaihtuah hian, buai lai hre pha lo mah ila, ram ralmuang hi a hlu a. Remna kan neih theih nana thawktu zawng zawngte zahna chibai ka rwn buk nawn leh a ni. - 8974232935 Set top box hi kan hmang tawh theuhvin a rinawm a, kei chu a fiah zawkna hi ka lo duh phah khawp mai a. Chutih laia ka sawisel ve chu en laklawk laia tang awm thin hi a ni. In tawng ve em ka hre lo va, hman deuh, CD kan en thin laia tang tlat ang chi deuh khan kan TV-ah hian a tawng fo mai a, en tui laklawk lai tak hian a awm duh lehnghal a, rei phei chu a ni lo va. Kan TV leh STB zir loh nge, hei hi a tihthat dan a awm lo em maw ni le aw??Awlsam deuhva tih thah theihte hi a ni em? Ka hre duh a ni. - 8794863294 Chanchinbu pakhatah Yoga chungchang ziahna ka chhiar a, a dik ka ti khawp mai. Mizo Kristiante hi kan dawt leh lutuk ni hian ka hre tlat pek a, engkim mai hi kan hlau em em vek zel mai ni hian ka hmu. Zu zawrh dawnin kan duh lovin kan lo hlau lawk a, Yoga kan phulpui leh chiam a. Kristian dik tak chuan a hmaah thlemna eng ang pawh lo thleng se a Pathian avangin a hlau lo dawn lo em ni? Theihtawpa do chu a tha ang; mahse, insawithaih ang chi hi chu kan sim a hunin ka hria. - Sangboihi Tun hnai lawk khan khawvel chanchin thar luah hneh tak, Brexit an tih a thleng a, kan hre theuhvin a rinawm. An Prime Minister kha ka duh hle mai, a huaisen a, a tumah a chiang ka ti. Facebook lamah mi pakhat status-ah pawh a rawn fak a, khatiang kha kan ram hruaitu atan hian ka va awt ve tak e aw!! Mipui thinlung a hneh zawh loh avangin mipuiah a tla na tawh lo tih inhriaa a bâng ngam kha fak a phuin ka hria. - Sampuia