Sawhkhawk of the day In chanchinbu a ngaihnawm thin e. Sawisel pawh in dawl fu zel a, fak pawh in hlawh viau bawk. Sawhkhawk hi thu ngai chhuah a awm em ka hre lo va, inang deuh erawh chhuah a awm thin. In chanchinbu hmelhmang hi mi thenkhatin an rawn sawisel thin a, kei chuan Mizoram chanchinbuah chuan han en maia chhiar châkawm ber niin ka hmu ve tlat che u. A mawi a, colour inchawih pawh a mawi thei viau mai. Mizotawng lamah erawh an rawn sawi thin angin, tihsual ve deuh deuh chu innei thinin ka lo hmu ve a, a har em a, a awm lohna pawh a awm lem lo, tan lakna tur zel a ni a. Engpawh ni sela, in chanchinbu chhiar a nuam hrim hrim mai, Zalen hi lo vul zel rawh se ka ti a ni. - Mamuana Pathianni hmasaah khan in regular-a ziaktu pahnih an lo lang lo va, a lunglenthlak deuh ruih maiin ka hria. In chanchinbua ziaktute hi tu mai pawh hi an ziah hawi zawng a inang lo va, a chhiar a nuam em em vek lawi si a. Han tang zel teh u. - Mawia Thawk khat lai khan in chanchinbu hi fakna lian deuh deuh kha tihchhuah in ching ve deuh thin a; mahse, tun hnaiah a awm ngai ta lo va, in fakawm hlein ka hria. Fakna a awm kha ka sawisel a ni lo, in intunnun nana in mamawh thil a ni ang; mahse, chanchinbu thenkhata uchuak lutuka fakna awm ang chi hi chu tih loh hram hram dan zawng zel thung teh u. Fakna aia ngaihnawm chhiar tur lo chhuah zel teh u. - Sangtea Pathianni hmasa khan Puipuia khan a rawn sawi a, fur laia tuichhe paihna fimkhur a tulzia kha. Ka lo vei ve thin a, kan compound a pelh tawh hi chuan kan tuichhe luanna hi kan ngaihven zui tawh lo va, kan luantir vel mai mai zel a. Hei hi kan thenawmte chhiatna thlentu a ni thei tih kan hriat a tha khawp mai. Fur a lo thlen hian kan tuichhe paih leh dithlifarfemin a nan nem tawh kha ruah tak zawkin a rawn chhu a, lei nasa takin a tihnem belh a, chu chuan chhiatna lian zawk hi a thlen thin fo mai a, kan fimkhur a ngai a. Mahni him viau si hian kan thenawmte tan mangkhawng kan siam a ni ve reng thei a ni. - Asangi Chanmari West-a zu dawr chu suasam a ni a, hetiang tak maia Mizo Kristiante kan che duh hi mak ka ti hle mai. Kristianten kan duh loh kan lantir dan hi a Kristian lo ka ti a, zu tan vang lam ni lovin, a tha lo ka ti takzet a ni. - Amuana Tunkara chanchinthar duhawm lo tak lo lang chu a lungchhiatthlak hle mai. Kohhranin an duh loh leh an do nasat em em mai, zu dawr suasam a ni a, dan ang thlapa hawn, eng dan mah bawhchhe lo khati tak maia suasam a nih kha a runthlak ka lo ti a. Chutih rual chuan tun hnai lawka he zu dawr awmna venga Kohhran leh tlawmngai pawlte chet lak dan nena sawi zawma Kristiante, Kohhran mite tih awm ang ziazanga thu kan vawrh vel erawh a tha ka ti chuang lo. A titute kha tute mahin an hre lo va, Kohhran leh khawtlangin dem a kai theih nana remchanga hmanga lo suasam pawh an ni thei a, a titu hriat loh na na na, a titua a duh lotute rin nghal ngawt mai kha a dik lo ka lo ti ve a ni. - 9436360899 Hmanah khan ka rawn Sawhkhawk ve tawh a, ka rawn ti leh dawn. Pathianin a hun ruat angin fur kan lo thleng leh ta a, tun kar chhovah pawh leimin avanga in hnawl, nunna chân hial chanchin kan hre leh nghal pang mai a. Khuarel chhiatna kan ti a, a dik takmeuh mai, chutih rual chuan chhiatna kan tawh thinte hi tam tak chu keimahni insiam a awm niin ka hria a (tuna a tuartute ka tihna ni lovin); chuvangin, kan tui chhe paih leh thli kan luantir dawnah hian kan fimkhur lehzual a ngai ka ti a ni. - 8794686442 Tunkar khan chanchinbu pakhatah ka lo chhiar a, BPL ni tur si lo, a tehnaa tling phak lo; mahse, BPL?chhungkuaa inziak lut an awm thu ka lo hmu a, a tha lo hle mai. Heti hian ka ngaihtuah ta a, tute mai pawh hi kan theihna lai zawnah hi chuan kan hlemhle em em vek ni mai hian a hriat a ni. Officer liante ei ruk hi a len avangin an langsar hma a, chutih rualin keini mi retheite pawh hian kan ei ve theihna lai zawnah hi chuan tih hreh hi kan lo nei bik lo vek mai hian ka hmu. Kan Pathian thu awihnate hi a takin lang chhuak se ka va ti thin em! - MkSiama Mahni Kohhrana Inkhawm a awm reng laia hmun danga lo inkhawm thin hi thil dik a ni thei dawn em ni? Miin a lawina Kohhran (a Kohhran chu eng Kohhran pawh lo ni sela) hi a hransan chhung chuan Thlarau Thianghlim hian a pawl thei ngai ang em? Mahni tuina leh nuam tihna lama kal mai mai an ni zawk lo maw? - 8974232935 Tun hnaiah Delhi sorkar chuan an khawpuia lirthei tawt lutuk tihziaawm nen diesel hmang lirthei upa tawh deuhte chu tlan chhuah a khap hmiah mai a, a huaisenthlak khawp mai. Kan ramah pawh hetiang deuhva hmalak hi a ngai ve thuaia rinna hi ka nei a; mahse, kan hruaitute hi an huaisen zo ve kher lo mai thei bawk. Ram hruaitu tan chuan mi tin lawmna siam tuma hruai ai chuan ram tana tha tur, mipui nawlpui tana sawngsawhlawtna awm hi an tih ngam a ngai niin ka hmu. - 9856279257 Mizoram, Kristian ramah hian Pathian thuawih lo hi kan va tam awm em aw!! Tunkara kan hriat angin mahni awm lohna tur hmun, BPL?chhungkuaa awm an lo awm tih han hriatte khan a tichiangin ka hria. Ka mi mal ngaihdanah chuan, he Mizo tlawmngaihna avang ringawt pawh hian chhungkaw pangngai ni ve si, rethei lutuk han nihte pawh a zahthlakah ka ngai a. BPL-a awm lo hram turin ka beih hram hram ka ring a. Chutih lai karin nei em em chunga lo awm ve duh an awm tlat hi chu a mak hi ka ti lo thei lo. A awm ngei turte ka dem lam a ni lo va, a awm ngei tur ang chi hi chu an awm, chutiang ni lo ang chui hi chu a a dik loh vakah a zahthlak a ni tih kan hriat a tulin ka hria. - Remtea