Assam Rifles sawn chhuah thawm a ri a, a ram chhungah ram nei an lo awm teuh tih hriat turin a zui lehnghal zat a, a mak ngawt mai. Central YMA leh tlawmngai pawl dangte hian na zawkin nawr zel sela, he ram hi vantlang ram a nih ngei theih nan thawk zel teh se. Sorkar pawhin a ram neitute hi an hre thuai ang a, neihtir lo hram turin hma la bawk teh se. Kan duham lutuk a, vantlang ram leh thil hi kan lo it zung zung zel hi chu a hahthlak a nih hi, kan thanmawhbawk a ni tih inpawmin a lo neite pawhin ram hmangaihna thinlung pua kan pass-te kan surrender ngam a ngai tih lo inhre hlauh teh se. Kan ram tinuamtu ni turin lo tang ve hlauh sela a lawmawm ngawtin ka ring. - Masiama

Kar hmasaa Lammual chungchang rawn sawi kha lo chhiar a, a dik khawp mai, a tawn ang deuh chiah kha ka tawng tawh a, a buaithlak. Tunah erawh chuan sawn an ni dawn ta a, sorkar chelh tawh leh chelh mek zel lah chu a sawntu zawk nih inchuhin an lo inhnial ve mek bawk a, keini tan erawh kan sorkar ta a nih chuan a hmang duhtu tana awlsam tur kha a tha ber mai a, a lawmawm ngawtin ka hria. A sawntu zawk chu tu pawh lo ni se, sorkar lam tih ni lovin helho lo tih teh daih pawh lo ni mah sela, vantlang tan chuan Aizawl khawpui laili atanga Assam Rifles sawn chhuah hrim hrim hi a lawmawmin a tha hrim hrim tawh tho. - Sangliana

Pu Lalrosanga leh Tetea Hmar chu an ngaihnawm dawn e. Hriata Chhangte, social media lama thawm na a lo awm ve bawk a, party dang hian tute nge an vawrh chhuah dawn hriat pawh a chakawm ta hle mai. CAB avangin BJP leh a tanrualpui, NEDA-a telte hi chu rilruah a hnâm bei lo riau mai a; mahse, Congress lah chu duh lova kan paihthlak zawh chiah an ni bawk a. Mipui candidate tiin hming hran han vuah sateh mah se an behchhan erawh a hriat tho niin ka hria. - Hruaitea

MNF sorkar thar chu a fakna thawm kan hmu nual tawh hlawm a, fak phu hi chu fak mai zel ila, do a ngaihnaah pawh huai tak hian do zel bawk ila, kan ram zim tê hi chu tihhmasawn a harsa vak lo vang. Assembly session pawh a ngaihnawm a, SEDP an sem tur pawh a tul chuan an tiam aia tam pawh a nih theih thu Chief Minister-in a sawi a, a sawi ringawtah a ral lo turah ngai ila, kan ram hi Kristian ram a nih ang ngeiin hmasawn hi a inhmeh tih hi kan hruaitute hian hre ve teh se. A ngaiah kan thu rei tawh. Kan sorkar thar hian theihtawp han chhuah zel sela, inthlan hmaa ram tana thawh tuma mipui hnena an intiam kha a taka chantir turin bei zel sela, mipuite pawhin kan theihna kawngah tawiawm zel ila, kan phak tawk lo ei ve zel i tum lo ang u. - Chhuantea

ZPM chuan Congress thawhpuiin mipui candidate hming vuahin Mizoram milar an dintir dawn ta a ni a, lehlamah hmingchhiatna nei em em ngai lo a ding dawn bawk a, kan inthlan pawh, state liante angin central lam tan nghawng lian nei lo mah se a ngaihnawm dawn khawpin ka hria. Mahse, khati khawpa zu zawrh duh lovin zu zuartu sorkar an thawhpui leh tlat lawi hi chuan thuneihna chan châka tuihal an ang tlatin ka hria. - Ampuii

ZPM hotupa hi chu ka rin dan tawk vek a ni, a kal a kal ang a, a sawisel leh a beih chiam tawh pawh a bel leh duh mai dawn tih hi ka hre lawk reng. ZPM hrim hrim hi an chhia pawh a ni lo va; mahse, Pu Duha hian thuneihna a duh tih tur ang deuh hian, tunah pawh a hmaa a duh loh leh a chhuahsan tawh, a beih chiam chiam tawh thin, Congress lam a awn leh ta tui mai a, hetiang vel bak hi a lak atang hi chuan hetiang vel bak hi ka beisei lo reng a ni. - Mamawia

india rama inthlanpui lian ber an puang ta rup mai a. Nikum inthlanah Congress an che tha lo khawp mai a; mahse, tun hnaiah a ram pum huapin BJP chu an che tha tawk lo angin a lang thung a. Kan ramah Congress-in tan an la nasa dawn tih a lang a, thawhpui tur an dap thawm pawh hriat tur a awm neuh neuh va, hming langsar tak sawi rik pawh a awm a, a ngaihnawm chho dawn khawpin ka hre mai. - Mamawitei