Zawhkhawk of the day Zalen Chanchinbu duh em emtu zingah hian ka tel ve phakin ka inhria a, in chanchinbu phek tin mai hi ka chhiar hmai ngai mang lo. Tihsual zeuh zeuh hi chu in nei tih pawh ka pha lo va, a bikin TV programme vel hi dik lo palh zauh a awm thin a, a tam chuang lo. Tan in lang chuan hei aia dik hian in chhuah thei ang tih pawh ka ring a ni. A ngaihnawm a, chhiar tur a tam thin khawp mai. Hmasawn tur theuh kan ni a, a changa eng emaw tihsual chiang lutuk ang chi hi chu fimkhur loh vang a ni a, tan han la sauh sauh teh u. Miin an sawisel nasat em em thin che u, chhut sual pawh a tlem tawh khawpin ka hria. - Mamawitea Zalen chanchinbu hi ka chhiar tanna a rei ve ta khawp mai a, tluang takin in kal zel a, min tibengvartu tha tak in ni a. A phek in pun chinah phei hi chuan chhiar hi a manhla lehzual hlein ka hria a, tan han la sauh sauh teh u. - Mka pu Pathianni hmasa khan Pu Chhuanliana khan tunlai thangtharten kan hriat loh, Mizotawng dik tak si tam tak a rawn ziak a, ka lo lawm khawp mai. A rawn ziah ang khan kan tawng hi kan sawisa nasain a dik lo hian a neitute ngei hian kan hmang nasa hlein ka lo hre ve thin a. Kha thu kha thangtharte hian chhiar sela, zawm bawk sela ka ti hle mai. Kan tawng hi tawng danglam tak mai a ni a, ziaka daha chumi tur chu a ni han tih thlap thlap hi a awm bawk si lo va; mahse, a dik hi chu a awm ve a ni tih hi thangtharte hian rawn hria sela, mi thiam zawkte pawhin kan tawng hi a dika kan ziaha kan hman theih nan tan han la zel teh se. - Mamuana Pu Chhuanliana khan Mizo tawng chungchang a rawn ziak a, a lawmawm ka ti a, ka sawi fiah thiam chiah si lohte kha fiah takin a rawn ziak thiam thin a, ka lo lawm ve hle a ni. Chutih rualin nangni pawh hian inzawm leh zawm loh tur (nia ka hriat) hi in zawmin in zawm lo fo niin ka hria a, tan han la teh u. Kei ai chuan ziak leh chhiar dan chu in thiam zawk em em ang tih ka hria a, tan in lak phawt chuan tun aia dikin in ti thei ang tih ka chiang hle a ni. - 8794686442 Doctor zawhna hi in chanchinbu ka lak chhan pakhat a ni a, a rawn chhang tha thin khawp mai. Kei chauh lo pawh, mi dang pawhin an tangkaipui ngei ka ring a ni. Pu Hrekima pawhin KTP General Conference-ah thu a sawi a, a chhuanawmin a ngaihnawm khawp mai. - Papuii Pathiannia chhiar tur duh em emtu tan chuan in hlu thin mang e aw...., han tang sauh sauh teh u. - Puia In chanchinbu hi an sawisel thin cheu va, tunah chuan chhut sual pawh a tlem ta khawpin ka hria a. Tan in lak leh lak loh hi chhiartute tan hian a hriat khawpin ka hria a; chuvangin, tan han la zel ula, in tidik deuh deuhvin ka ring a ni. In chanchinbua thu in chhuah hrim hrim erawh a ngaihnawmin beng a tivar viau zel a ni. - Mapuia Tun hnaiah sorkar chuan chaw lama kan himna tur, Food Security an tih chu a hmang tan ta a, a card pawh pek chhuah tawh a ni hlawm a. Party leh mi mal tam takin sorkar sawisel nan an hmang a, a dikin ka hria. Chhungkaw thenkhat phei chu pian ni leh thla inang vekah min piantir a, a mak khawp mai. Chutih laiin chhungkaw thenkhat chu kan lo duham uchuak veleh mek zel bawk niin ka lo hria a. Kan chhungte thi tawh, khawvela awm tawh reng reng lo te, kan hnena cheng tawh lova hmun danga cheng tawhte thlengin kan chhungkuaah kan la telh a. Heng kan telh tam takte hi an chenna hmunah an hmingin card an nei veleh zel tho bawk niin a lang a. Mizote hian a langsara ei ru leh mi liante hi kan han dem viau zel a; mahse, a tak takah hi chuan kan phak tawk zelah kan duhamin ei ruk hi kan hre lo ni hian ka hria. Biak In leh pawn lama kan nun hi chu a inpersan nasa thin khawp a ni. - Amawitei KTP General Conference a zo leh ta a, thil thleng tam tak a awm a, tam tak chu a ngaihnawm khawp mai. Pathianni hmasa pawha an lo sawi tawh angin kan rama hian thalai rual sang tam tak hi Pathian ta, Pathian thalai, Pathianin a hmantak tak an la tam hle a ni tih a chiang hle a. Kan ram hi miten sual leh hrem hmabak angin an sawi thin a, nih pawh a ni mai thei, kan hre vek lo; mahse, Pathian lama tang tlat hi thalai ringawtah pawh khati zat kha an awm niin ka hria a, kan ram hi Pathian hian a hmangaihin kan tana tha tur zelin ro min relsak niin ka ngai tlat a ni. Ka lawm em em e. - 9436360899 Tlawng lei chim zing tak mai chu dawh that a ni dawn tih thawm ka lo hria a, ka lawm hle mai. Tun hma anga chim leh mai theiin dawh tawh lo sela a tha ang. Khu lei khuan mihring nunna la lo sela tih hi ka tawngtaina a ni ve e, ka lawm em em e. - MkSiama Hmar Assembly Session-ah Budget phara sawiho a ni a, kan ram tana tha ber tur angin sorkar lam chuan an chhuah a, a dik leh dik loh chu kan la hre chhawm zel ang chu. Kan sorkar hi a chhia tia sawi chiam chu ka tum lo va; mahse, MNF sorkar lai ai kha chuan kan sorkar hrawn mekah hian pawisa lengvak hi chu a tlem chiang ni chuan ka lo hre ve ringawt mai a ni. Sum leh pai lamah thiamna ka nei tam lo va; mahse, pawisa a van hi chuan inhlawhfa leh taxi pute chenin sum thawh chhuah a tam thei lo va, dawrkai an inhralh thei lo bawk a, chu bak baka a lang apauva mipui mimirin kan tawrhna a awm chuang dawn em ni ka ti ve deuh a ni. - 8794686442 KTP General Conference a zo va, a conference bik chu tluang takin zo mah se a hnua chhiatna lian tak mai a thleng kha a va pawi em ve aw!! A?tuartu chhungkua ka tawrhpuiin an khawtlang pawh pawi ka tihpui khawp mai. Chutih laia mawi tak mai lo lang chu, Salvation Army lama thalai pawlin rang tak maia chhiat tawk tanpuina an han hlan nghal var kha a ni. Pawl hi chu mihring kan nih chhung chuan a awm tur a ni a, rin leh pawm dan hrang inang lo hret avangin Kohhran pawh a hrang chu a awm thei ang; mahse, Kristaah chuan unau vek kan ni a, tumah pawl avanga inthlei hrang tur kan awm lo a ni tih hi Mizo Kristiante hian i hre nawn leh mawlh mawh teh ang u. - Sangsanga