Sawhkhawk of the day
Pu Rosanga leh Pu Tetea te chu an inbei tawk dawn khawpin ka hria a. Kar hmasaa Pu Lalthlamuana Ralte ziah ang deuh khan, kan political party-te hian politician an duh lo tlat mai a, politician lo kha politician-a chhuah an tum ta a ni. Kan politics khel mekah hian rinna an nghat ngam lo nge kan ram tana huai taka tawng ngam tur, politics-a hmingchhiatna la nei lo an zawng zawk? Nge, mipuia tla na tura an ngaih an dap mai mai? Zawhna a tam thei khawp ang. Ram hmangaihna rilru pua kan ram tana au chhuak ngam tur an zawng a nih chuan a lawmawm khawpin ka ring a, chuti ni lova thuneihna chan duh vang hrim hrima politician ni lo an vawrh chhuak a nih chuan a tha lo khawp ang. Tin, an politician neih zingah rinngam an neih loh vang a nih lehlek phei chuan a zahthlakin kan ram tan mualphona pawh a ni theiin a hriat. Chhan tha tak zawng an nei turah ngai ang. - Mama

Kar hmasaah Pu Chhuanliana’n a tawp tawh dawn thu min han hrilh thut mai chu, a hrehawm hle mai. A kum zawng a tam tawh a, a theih loh chhan hi awm ka tihpui khawp mai a, ani ang rual hi ni ila kei hi chuan Pathianni tin thu chu ka ziak tawh hauh lo vang a, ka thil hriat tam tak, Pu Chhuanliana’n a ziah chhuah ang hi ka theihnghilh teuh tawh bawk ang. Mahse, ani chuan a ti thei zel a, tunah pawh hian la tithei zel sela ka duh hle mai, a la dama a la hrisel that chhung tal hi chuan… - Elizabeth-i

Ka huang chu tawp tur angin a insawi ta luah mai a, a uiawm dawn hle mai. A ziaktu hian ka tawng lo haw lo sela, amah pawhin a ziah thin tawh angin, thu ropui tak a ziak miah lo; mahse, zûn hi a nei deuh tlat mai a, chhiar a nuamin a hahdamthlak tlat mai a. A chawlh mai chuan a uiawm ngawt ang. Han ti leh hram sela chuan a lawmawm ngawt ang. - Chhuantea

MP inthlan chuan boruak a nei lian tan ta hle mai. Mizo zinga pa lar leh langsar pahnih an insu dawn a, a ngaihnawm dawn e. Mahse, ZPM hian ngati nge khati taka zu zawrh duh lo si khan zu zuar an tanpui dawn ni le, ‘Mipui candidate’ tiin sawi eng ang mah se thil hi a chiang em em tho si a. A kal a kal ang a, ZPM chu ka rin dan tawk vel chauh a ni mai a, politics han khelh tak tak hi chuan dik leh tha tihna lam aiin thuneih duhna zawk hi a langsar leh zel lo thei lo a nih hi! - Hruaitea

ZPM chuan Congress thawhpuiin mipui candidate hming vuahin Mizoram milar an dintir dawn ta a ni a, lehlamah hmingchhiatna nei em em ngai lo a ding dawn bawk a, kan inthlan pawh, state liante angin central lam tan nghawng lian nei lo mah se a ngaihnawm dawn khawpin ka hria. Mahse, khati khawpa zu zawrh duh lovin zu zuartu sorkar an thawhpui leh tlat lawi hi chuan thuneihna chan châka tuihal an ang tlatin ka hria. - Ampuii

ZPM chu ka rin dan tawk vel lekin an che ka ti. An hotupa hian a ngai renga awm hi a thei lo ni berin ka hria. Thenkhatin hman atang tawhin a vei ngai reng a vei a, a principle a thlak lo angin an han sawi thin a, a dikna chen pawh a awm ang; mahse, kei chuan thuneihna chan duhah ka puh tho tho. Tunah pawh hmanni lawk thlenga a beih chiam chiam, Congress bawk an belbul leh ta chu a ni a, nakin lawkah chuan a sawisel leh mai chuan ka ring tho bawk a. MNF ngei pawh nakin lawkah chuan an bel leh tho lo vang tih lah a sawi theih loh. Politics-ah hi chuan hmelma hlun leh thian hlun a awm tak tak thei lo nia an sawi hi a tichiangtu ni pakhat vein ka hria. - Mamawia

MNF sorkar chuan a tum bawk a, zu chu a khap dawn ta maw? Lawmawm loh ti fe fe an tam ngawt ang a, lawm fe fe pawh an tam khawp bawk ang. A lawm lote chu enga pawh lo ni sela, session laia chief minister ni tain ka hria, a sawi kha a dikin ka hria, “A tuartute hi chuan an tan rei reng lem lo,” tih lam hawia a sawi kha. Ni e, zu avanga chhungkaw buai, pasal fanau chân tawh tam tak hi chuan zu hi an tan reng lem lo vang. Kan thianpa pakhat, zu avanga a pa chân pawhin, “Kei chu Congress ka ni a; mahse, zu zawrh kher hi chu ka duh lo. Zu avang hian ka pa ka chân chu thuhran, pa ka neih loh hma avangin ka nih tur ang, ka lo dream hi ka thlen loh phah chiang a ni,” a ti a, a dikin ka ring. - Mamawitei

Kan sorkar chuan a tum ang ngeiin zu chu a khap dawn ta maw? Mahse, an sorkar hmasak ang loh deuhvin, ‘khap bur’ lam chu a ri ta lovin ka hria a, an fing ve tawhah ka ngai. Zu hi khap sateh mah ila, kan sawi fo thin, a dan kengkawhtu lam hi kan vil ngun leh si loh chuan mahni kan inmualpho mai mai hi a ni ve thei. “Kristian ram nih nen a inhmeh,” han tih pawh hi thlirna tlang dang atang chuan a dik khawp mai a; mahse, “Kristian ramah an khap a, engmah a ang chuang lo, dan kengkawhtute pawhin tih ngaihna an hre lo, anmahni ngei pawh a duh duh an ni,” tih thawm a awm chuan, dan lehkawh theih lohna Kristian ram nih chu a zahthlak ve tho a ni. A enga pawh chu ni se, zu hi chu a in mekte pawhin tha an ti lem lo niin a lang a; chuvangin, a awm loh theih hi chu duhthusam chu a ni. - Esther-i

Mihring hi thiltithei leh eng emaw ve viauah han inngaih chang hi a awm thin a; mahse, engkim neitu zawk hi a chet hi chuan engmah kan lo ni lo. Kan hriselna man hi engzat nge ni ang tih i chhut ngai em? Zing i thawh theihna man kha i chhut ngai em? Damdawi inah han awm la, a nih loh pawhin han hrisel lo ve deuh chhin chiah la, kan tho chhuak thei hrim hrim pawh hi a man a lo tam a sin! - Kristiana

Mizoram hian Pathian thu hre tak a mamawh lo va, sawi thiam pawh a mamawh hek lo va, Pathian thu thiam pawh a mamawh ber a ni lo. Pathian tihtu hi a mamawh a ni. - Alfa