SAWHKHAWK of the day Hma in sawn zelin ka hmu che u. In chanchinbu hi thil tam takah hian sawisel ngaiin awm thin che u mah ula, Pathiannia ni dang aia tlai hreta a lo thlen hi chuan kan khua a har tlat zel mai. In article chhuah thin te, thuziak mi in neih regular-te hian a tihlu khawp mai. Anni pawh hian tan han la zel sela, beng an tivarin hriselna leh mahni inenkawlna kawngah pawh min pui khawp mai. In colour phek hnih hi an sawisel thin cheu va, a dikna lai chen a awm ang, a bikin phek hma hi rawng chi hrang hrang a tam nge maw ni? Tin, a hawrawp hi a sin deuh em ka rawn ti ve a ni. - Mawizuali Tunlai chu in chanchinbua regular-a ziak thinte hi an thu ziah a awm lo zeuh zeuhvin ka hria a, ngati nge aw kan lo ti thin. Thil dang hi a ngaihnawm lo tihna ni lovin, anniho thu ziah hi a chhiar a nuam zual a, eng harsatna tak emaw chu an nei a ni phawt ang a, han tang zel teh se. - 8974107549 Ka huang ziaktu hi a kum a tam ve ta deuh bawk a, a huang hi a rawn hnawh khat thei lo ta zeuh zeuhvin ka hria a. A kum a tam ve tawh bawk a, a awm ka tihpui khawp mai, chutih rual chuan han tang hrang hram sela kan va ti ve. Mi dangte thu ziak in chhuah thin pawh a chhiar a nuam thei khawp mai, a ngaihnawm kan ti thin. - Zuala Kar hmasa khan Pu Lalthlamuana Ralte khan Donald Trump-a chungchang kha a rawn ziak a, a ngaihnawm hle mai. Ani hi chanchinbu lama a thu ziah dangte pawh hi ka lo chhiarsak ve fo tawh thin a, Zalen-a a thuziahte pawh hi keimah bik chuan ka lo hlawkpuiin ka beng a tivar thei khawp mai. - Papuia pu Kar hmasa Sawhkhawk-ah khan lirtheia chetsualna thleng nasa chungchang kha rawn sawi an awm a. A ni khawp mai. Kan khawpui hi a lian ve tawh a, kan kawngin a daih bawk si lo va, chetsualna hi a thleng fo awm tak pawh a ni reng a ni. Chutih rual chuan chetsualna thleng tam tak hi lirthei khalhtute leh neitute fimkhur tawk loh vang te, mi dang vanduaina zar lo zo ve vangte a ni fo tih hi keimah ngei pawhin ka tawng tawh a. Chuvangin, lirthei kan khalh a nih chuan nunna hial la thei chungah kan chuang a ni tih hriain fimkhur ila, kan lirtheite pawh kan chhuahpui dawnin a fit tawk em, din thut ngaiah te a rintlak em, kawng chho leh chhuk deuhvah a khalh ngam em tihte pawh hi i hre hmasa thin ang u. Chu chuan kan vanduaina tur tam tak lakah min chhanhim thei ngei ang. - 8794686442 An sawisel nasa thin bawk cheu va, tunah chuan hawrawp chhutsual pawh a awm tlem thei ta hle mai. Tin, a thupui ni lo tur awm tak han vuah daih ang chi pawh a awm ta meuh lovin ka hria. In chanchinbu hi ngaihnawm kan ti a, kan bih uluk thin khawp a nia, tan han la zel teh u. - Zalen fan Kar hmasaa David L.Ralte-in ‘Comfort Zone’ a ziah kha a va tha ve aw.... Ni e, kan ram hruai tur hian a nuam chin chiah kan puten an thlahlel a nih chuan kan ram hian hma a sawn lo vang. Chân ngam hi an neih a ngai ve a ni. Chutih rual chuan mi tin pawh hian hma kan sawn duh a nih chuan kan nunah hian paih tur kan nei theuh a, chu pawh chu i paih ngam teh ang u. A rawn ziah ang khan tute pawh hian comfort zone chu kan nei a, hei hi kan thlah ngam a ngai a ni. - Ama Kan ramah zu kan zuar mek zel a, mi tam tak tan chuan a nuam ngawt ang. Zu zawrh hrim hrim hi ka do lem lo va, tha ka ti viau lo bawk. Chutih rual chuan ka mit ngeia ka hmuh, zu tha leh chhia hi keimahah chuan chiang takin ka thliar ve ringawt a. Ka thiante, a in thin zingah tleirawl chhuah lai atanga local inte hi kan thian mi hausa, a senchi in thinte ai hian hun a lo rei hian an la tha zawk tlatin ka hmu a. A in mi ka ni ve lem lo va, anmahnia a thawh dan hre lo mah ila, hetia ka ngaih mai danah chuan local hi taksa tan a tha zawk em maw ni chu ka ti ve mai mai. Ka hre dik lo a ni mahna!! - 9436360899 Tun kar khan khawchhak lama kan unau chanchinbu miten kan ram an rawn tlawh tih thawm ka lo hre ve a, chanchinbu lamah pawh an thlalak nen kan lo hmu ve a. Tunah chuan an ram a zalen ve ta bawk a, nuam ti takin ram rawng han bawl teh se. Kan MJA te nena an inkawmna atang pawhin an inngaitlawm tih a lang theiin ka hria a, kan unaute an ni bawk a, MJA pawhin tha takin a lo dawngsawng kha ka lo lawm ve khawp mai. Thawhhona tha tak nei thei zel sela ka duh hle a ni. - 8974232935 Mi thenkhat hian Pathiana piantharna changa lâm thin te, au vak vak thinte leh mi pangngai tih atana mawi lo awm ang tak tak ti thinte hi an sawisel bawng bawng thin a. Mahse, ka ngaih ve danah chuan, kan ram hi heng mite avanga Pathian hremna tuar lo kan niin ka hre va tlat mai. Kan ram hi kan sual ve ta khawp mai a, hetianga zah pawh sawi thei lova Pathian lo dawr ve hram hram thinte avang hian min hrem lo ni hian ka hria a; chuvangin, kei chuan ka sawisel ngam ve vak lo. - 8794686442 Nikum Synod Inkhawmpuiah khan kumin atang chuan zu permit nei chu rawngbawltu atan ruat tawh lo tur ang deuh khan an rel tlatin ka hria a. Presbyterian Kohhrante hian engtin nge hma an lak zui zel le? Kan vengah chuan engmah sawi zui hi a awm lo va, nikuma rawngbawltua an ruatte kha an la ruat vek a, mi thar tlem an awm bawk a. Tumah rawngbawltu zingah khan zu permit nei an lo awm lo nge ni anga Kohhranin a zir chiang lo hrim hrim zawk tih pawh ka hre ve pha lo. An ti tak tak dawn a nih chuan a nei chu paih vek turin uluk takin zir sela ka ti hle mai. Kohhran hi ka dem lam a ni lo va, na takin tang se ka tih vang a ni a, zu leh rawngbawlna kalkawp hi thil inhmeh lo tawpkhawk nia ka hriat vang a ni zawk a ni. - Samu-a Engati nge thangtharho hian ‘Thang leh Cham’ hi an hriat hran loh mai le aw..? US?President chu India ramah lo zinin Chawlhniah a lo thleng a, Thawhlehniah a haw leh a. Doordarshan, Aizawl pawhin ni thum chamin a sawi tlat mai. Ni thum thangin emaw, ni khat chamin emaw a lo zin a ni si a. Ni khat, Thawhtanni chauh a cham a ni. Khawiah pawh zin ila, kan thlen ni leh kan haw ni hi kan cham hun chhunga chhiar tel a ni ngai lo. - Matea pu