Sawhkhawk of the day An sawiselna che u in pawm zel a, an sawina cheu hi hmasawn phah zel nan inhmang bawk niin ka lo hria a, hei hi tun in thlen theih chhan hi niin ka hria a ni. Tan han la zel ula, in chanchinbu hi a ngaihnawm a, belhchian tlakin thawk zel teh u. In article chhuah thin te, thuziak mi in neih rugular-te hian a tihlu khawp mai. Anni pawh hian tan han la zel sela, beng an tivarin hriselna leh mahni inenkawlna kawngah pawh min pui khawp a nia...., chutih laiin in colour phek pahnih hi a chiri deuh mah mah em chu ka lo ti ve mai mai a ni. A mawi lutuk a, a rang deuh bei buai lek lek thinin ka hre deuh mai mai a ni e. A dang hi chu intan that phawt chuan a tha em em zelin ka hria a ni. Han tang zel phawt mai ula, hma insawn zel ka beisei tlatKa lawm e. - 8794686442 Pathianni tuk a lo ni a, Zalen kan han bih vang vang zel mai hi chu a nuam ve hranpa hrim hrimin ka hria. Chutih rual chuan tukin chu Pu Chhuanliana a awm lo va, Dr. Hrekima a awm bawk si lo va, a ngaihnawm tak a kim lo riauvin ka lo hre ve ringawt mai. An rawn chhunzawm leh thuai erawh ka beisei tlat e. - Zalen fan ruhkawl PU Chhuanliana hi a kum a tam ve ta deuh a ni ngei ang, a chawl ve leh zauh thin, a awm khawp mai. Ani ang rual hi ni ila heti chen chen hi ka ziak peih lo vang, pa invawng tak a ni ang tih chu a chiang mai e. Tun tum pawh a rawn tel lo va, khua a tihar ru riau mai. Mi dang thu ziah erawh a tha khawp mai. Doctor zawhna hi kan chhungkua chuan an va hlawkpui thin tak em!! - Ampuii Pu Lalthlamuana Ralte thu ziah hi ka lo chhiar ve ziah thin a, mi a hruai thei khawp mai. Chutih rual chuan chanchinbu lian tak pakhata mi pakhat thuziak ringawt, ngaihdan khat deuh ngawt chhiar tur awm reng hi a fuh em ka lo ti ve mai mai. Mi dangte hi han ziahtir ve zawk ula, mi dang ngaihdan a hriat ve theih ang a, a tha ang em? Amah Pu Muante hrim hrim hi chu a ziak ngaihnawm a, a bengvarthlak thin khawp mai. - Papuia Engtikah emaw khan TV programme in tihsual kha an rawn chhuahchhal cheuin ka hria a, ka lo chik thin cheu va, khami tum lo pawh kha tihsual leh zauh hi a awm tawh tlat. Tihhmaih palh awl tak tur chu a ni a, fimkhur zual nan a tha hle a ni. Ka rawn hrilh ve hrim hrim cheu a ni. - Zalen fan Pu Chhuanliana huang hi a ngaihnawm thin khawp mai a, in chanchinbu tihlutu pakhat chu a ni ve hrim hrimin ka hria a. Mi dangte thu ziak pawh hi a ngaihnawm thin khawp mai. In chanchin thar chhuah pawh a tha thin khawpin ka hria a. a bikin feature in rawn ziah thin hi a ngaihnawm a, beng a tivar thin hle a ni. Kan hriat loh tha deuh deuh in rawn khawrh chhuak a, in hahpui ngawtin ka lo ring ve thin ringawt mai a ni. In article chhuah hi thenkhat chu ho deuh deuh a tam thung ka ti a, kar khatah vawi khat chauh a ni si a, chaih laih laih tham han chhuah thin teh u ka rawn ti ve ngawt mai a ni. - 8794686442 Pathianni hmasa khan khaw lum leh vawt chungchangah mi pakhat khan thu a rawn thawn a, a thil rawn sawi kha a dik khawpin ka hria.A?rawn sawi ang khan khawvel hi chu lungawi famkimna hmun tur a ni lo va, lungawi lovin kan phun fo thin; mahse, mihring hi kan tawn apianga lungawi ching tur kan ni a, hmasawn tum loh phah nana hman erawh a dik lo. Khaw lum leh vawhm ruah sur leh thalte hi kan thu a ni lo va, kan phun nasat avanga reha reh lo tur pawh a ni lo va; chuvangin, a hun lai hi chuan chhel takin tuar ve mai ila, mi lungawi thin hi mi hlim an ni a, an zahawm a, an bula awm a hahdamthlak thin tih ka rawn sawi ve a ni e. - KK Ralte Lalthlamuana Ralte thuziak hi ka chhiar ve ziah a, a ngaihnawm thei khawp mai. Min tibengvartu a ni a, keini ang mi inchhiar zau lo leh hre thui lo tan pawh fiah takin thil kan hriat phah thin a, a lawmawm ka ti hle a ni. Chutih rual chuan sorkar dik lohna leh tlin lohna lai ringawt hai chhuah tum ang deuhva ziah hi a awm leh zauh thinin ka hria a, ram tana thahnem a ngaihna vek chu a ni mai thei a, ninawm lek lek chang a nei a. Rorel lai beihna lam hawi a an chang a awm ka ti. Chutih lai chuan min tivengvatu chu a ni a, neutral tan chuan a chhiar a manhla hlein ka hria. - Mawipuia Hun hi a kal zel a, tunah chuan kum pawh kan hmang thui leh ta hle mai. February thlaah pawh a chanve kan lo chuangkai chu a ni leh deuh ta reng mai a, Pathian min hruaina a ni e. Hun hi a kal zel ang a, dam i hauh zel phawt teh ang u- Ama Khawi hmunah pawh Pathian hi i hre reng ang u. Ani tel lo hian tumah kan che, kan awm thei si lo va. Thei ve emaw kan intih viau pawh hian min neitu, Pathian a chet meuh hi chuan engmah lo mai hi kan lo ni leh tlat thin a nia. - 9436360899 Pathian zarah kan dam ang a, kum pawh a liam veleh mai ang. Pathian hian hunbi hi a ruat zel a, nakin lawkah ni a pui ang a, fur leh thlasik pawh kan thleng leh ang. Fur kan lo thlen hun atan tun atang hian inbuatsaih tha ang u aw. Fur laia kan ramin chhiatna a tawh hrang hrang hi keimahni siam tam tak a awm niin ka hria; chuvangin, kan tui chhe paih leh thli kan luantir dawnah hian kan fimkhur chuan leimin leh chhiatna tam tak hi kan pumpelh theiin ka ring tlat a ni. Fimkhur teh ang u. - Puipuia Hun rei tak chu ka ngawi a, ka lo sawi ve tawh teh ang. Miin Kohhran hi engati nge an sawt vak vak a, an sawisel chiam chiam ngam thin le? Kei chu ka ngam lo. Kohhran hi Pathianin a la hmang reng niin kei chuan ka la ngai tlat a, ka ngaihdan hi a dik pawh ka ring tlat reng a ni. - mamawite Tunlai chu lirthei chetsualna a thleng nasa hle mai. Kan fimkhur tlan a ngai a ni. Lirtheia chhiatna thleng thinte hi vanduai vang liau liau chu awm thin mah se tam tak hi chu fimkhur tawk loh vang a ni ve fo va, mi fimkhur loh zar pawh zo theih tak a ni tih hretu ka ni. Lirthei khalhtute i fumkhur thar leh teh ang u. - Ririi