SAWHKHAWK of the day In chanchinbu hi a ngaihnawm a, chhiar tur chi hrang hrang pawh a chikim viau mai. A phek lai fiah lo hi intifiah thei ngang lo chu a ni phawt ang a; tin, Mizo tawng ziahah hian a dik lo a tam lutuk ka lo ti ve bawk. A bikin phek hmaah hian inzawma kan ziah ngei ngei thin tam tak hi a inzawm lo, inzawm lo reng thin inzawmtir inngah, kei ai chuan inthiam ngei ang, helamah hian han tang leh zual teh u. - Ap In chanchinbu hawrawp sin lutuk kha an rawn sawi tawh a, a dik ka ti khawp mai. A?bikin Doctor zawhna, Dr. Hrekima huang leh article awmna phei hi a sin thei lutuk niin ka hria. Mi tam takin an chhiar duh lai tak phei niin ka hre ve sia, hei aiin a hraw thei em? Phek hma pawh hi a bichilh emaw ni, a khat thup zel mai a, a itawm loh ka ti e mai kei chu. - Pitartei Pu chhuanliana huang hi kei chuan ka lo chhiar ve ngai miah lo va, a thu ziak kalhmang hi ka chhiar duhzawng a ni lo ve tlat thung a; mahse, tun hnaiah hian ka chhiarsak ta zauh zauh va, in rawn sawi ang hian, thil hi a hre rei lutuk hi a mak a nih hi maw le! - Amah Sangtea Chhut sual hi mite hian in sim tial tial angin an sawi cheu va, kei chu ka ti ve tehchiam lo. In uluk lo nge chu ka hre lo va, ni tin chhuak thenkhat ang thovin chhut sual hi kar khata vawi chauh chhuakah hian a tam tho mai. Keini ngaihah chuan hun in ngah zawk fe niin a hriat a, han tang leh zel teh u. - Mapuipuia Pathianni hmasa Thukhawchanga Lalthlamuana Ralte thuziak kha a tha khawp mai. Ni e, Mizo mipuite hian thu dik hi hriat kan duh thin a ni. A zuzi leh fo mai. Kan chanchinbu mite pawh hian hetiang thubuai lian ang hi chu bawhzui vak thin teh u. Kan puteho hian an thiam chan theihna tur zelin thil hi an kalpui ni mai hian keini mi mawl hi chuan kan lo hria a ni. - Papari AMC inthlan kan zo va, MNF chuan sorkarna an siam dawn. TV-a an pu ber an kawmna ang deuh khan party mala an ding hi mipuiin kan duh chhan pakhat a ni mai thei. AMC sorkar hmasa kha a chiri lutuk a, miin fiamthua an sawina ang deuh kha thil tak tak a niin ka ngai a, mipui hi kan fing ve tawh bawk si a, ram puma sorkar lai chu paihthlakin an awm ni maiah kei chuan ka ngai a ni. - Amawitea AMC-ah chuan?MNF kan hrawn dawn ta a, eng nge an an zel dawn lo thlir leh phawt mai ang aw.... An manifesto-te pawh kha lo zir chiang leh bawk ila. An duh duha an kaihhruai loh nan mipui, a thlangtute bawk hi an pawimawh a ni tih hi kan hriat a thain ka hria. An manifesto-a an dah zawng zawng kha an tihlawhtling thei lo a nih pawhin, hmun thuma thenkha hmun hnih tak, chu em an tlin loh pawhin hmun khat chauh tal pawh an tihhlawhtlin theih chuan kan khawpui hi a nuam sawt dawn si a. Chuvangin, fing takin kan AMC sorkar thar tur chu lo ngaichang teh ang u. - Aizawl thar nghakhleli Pu Lal Thanzara chu a lo insawi lawk angin mipui court-ah chuan a ding leh ta ngei a, thiam a chang ni chek tur a ni a, hneh taka thlan tlin a ni leh ta a. A thlang tlingtute hian miin an puhna zawng zawngah khan thiam a chang an tih avanga thlang tling chu an nih ka ring bik chiah lo va, sorkar lai party candidate a nih avanga thlang an nih zawk kei chuan ka ring a. Mipuite hian an rilru tak chuan an pawm theiin ka ring lo va, mahni bial hamthatna tur thlirin an thlang tling leh niin kei chuan ka ngai. Eng pawh chu lo nise, Pu Patea hi mipui tam tak hi chuan amahah ngaihdan tawk an neih tawh mai chu ka ring deuh tlat a ni, kei pawhin ka nei ve bawk. - Siami pi Thal a lo ni a, khaw hawi a nuam leh tan ta. Mizopa rilruah chuan lung a leng leh ta veng veng mai. Kan Zoram boruak hi ram dang zawng aia boruak nuam nuam chu a lo ni e. - 8794686442 Nu leh pate hnena ka chah ve duh lawk aw... Tun hnaia kan rama harna lo thleng chiam kha naupang lamah a thawk na khawp mai a, a bikin tleirawl kan tih rual vel hian an chang chhah thin khawp niin ka hria a. Hetah tak hian ka hlauhthawn chu, Pathian thu tlangaupui leh eng eng emaw a lang tih vangin kan tu leh fate hi an chhuak tam mah mahin ka hria. Zan rei tak takah tleirawl hmeichhia leh mipa an inzui chhuak a, Pathian thu anga an lan miau avangin khap ngawt theih pawh an ni lo va; mahse, he hun hi Setana pawhin remchangah a hmang ve thiam ang tih kan hriat a va tha em! Nu leh pate hian kan tu leh fate thlarau chan hi tisa tak pawhin kan ven a ngai a ni. Chuti a nih loh chuan kan chhungkua a mualpho palh thei a nia... - MkSiama Tun tum AMC inthlan result atanga ka hmuhchhuahte chu - party tenau thawhpui a tangkai lem lo (an party mi candidate a ngai ve zel si a) tih leh party kan din ngam a, ‘Kan sorkar dawn,’ kan ti ve fo ngam a nih rau rau chuan mahnia inthlan hmachhawn pawh ngam tel tur a ni tih te mai hi a ni a, ka lawm e! - 9774354495 Kan vengah chuan zu zawrh duh lo kan thlang tling a, zu zawrh duh leh duh lo veng chu kan hriat mai alawm. ZNP?pawh hi han mal din ngam ve se, hmun 4 velah chuan beisei kan nei ngam ve asin. - THLIRTHIAMA Ka vei leh em em chu kan Mizo hming kan zahpui hi a ni. Entir nan - LZ Hmar, LB Sailo etc. tia kan hming kan dahte hi. Kan nu leh paten uluk takin kan hming min saksak a, eng vanga zahpui nge kan nih? MARY Sailo tih velte phei hi chu a pa sap, a nu Mizo ni turah ka ngai tawp! A bul tan hmasatute chu kan mi hmasate an ni. ‘Phaiah kan awm a, min ko thiam lo va, chuvang alawm,’ an ti thin, Mizoramah chuan an rawn put zel a ngai tawh lo. Mahni pi leh pute pawhin in hming in phuah kha a lam pawh an lam thiam loh kha. Kan Zosapte pawh Pu Hluia kan lo ti a, an ramah ‘Pu Hlui’ tiin an inkohtir kher lo. Mizo hming ropui tak hi chhuang ila, i ziak lang ngam tawh ang u. - SANGTEA AMC inthlan atanga ka lo hmuhchhuah ve mai mai chu - Aizawl mipui hi chu kan sorkar hrawn lai hian min bum fing zo tawh tih hi a ni a. Kan sorkar hrawn lai hi an vangpung a na a, an tawng pawh a na thin a; mahse, an thawh that sawi tur a tam lem bawk si lo va. Hei hi kan khawpui inthlana an tlawm chhan lian tak niin kei chuan ka ngai a. Mipuiin kan ring zo tawh lo va, hun remchang awm hmasa berah mi dang enchhin duhna kan lo nei ta ni maiah ka ngai a ni.