Sawhkhawk of the day IMA Mizoram bultuma doctor chhuanawm tak tak rualten hmun hla leh kilkhawr tak, Farkawnah tihdam hna in han thawk tih hi tih Zalen dt, 1.11.15 issue-ah Dr. Hrekima titi atangin ka lo hre ve a, ropui ka tiin lawmawm ka ti takzet a ni. Farkawn pa ka nihna atangin lawm thu sawi ba vein ka inhria a. Mahni inseng rala Farkawn leh a bul hnai khaw mi tam tak tana malsawmna thlentute ke chu a va mawi em! Zahna chibai ka buk che u a, Pathianin a let tam takin malsawm che u rawh se. In zaa chungah thinlung takin Zalen Sawhkhawk kaltlangin ka han sawi a nih e, dam reng rawh u! - B.Lal Chhawntluanga, Venghlui, Aizawl Zalen chanchinbu hi ka lo la ve a, selna anka pawh lawm takin in dawng zel a, chhiar pawh a manhla hle mai. In kal zelna turah duhsakna ka hlan a che u, tang fan fan! - 9862329830 Chhiartute aw huangah hian vawi thum thu ka thawn ve tawh, vawi khat mah a lo la chhuak ve miah lo, chhuah tlakah an ngai lote pawh a nia nge!! Mahse, an rawn tihchhuah tam tak ka chhiar hian ka thu rawn thawn vete nena khaikhinin a that lohna bik leh thu ho lutuk a ni bik lo tih erawh ka hre chiang khawp mai. Ka la beidawng dawn lo va, ka rawn thawn zel tho vang. Bei la, bei nawn rawh. - Ralte Boyz’ NLUP Serthlu, kum li emaw awrh chauhva upa rah teuh thei hi serthlum mak danglam tak a nih hi maw le! Kan lo neih ve thinte hi chuan tha taka a thanin kum 8 velah a tuai rah hmasa tlem te, chhiar tham lek a chhuah ve hram a ni ber a, NLUP serthlum nge nge, a tha danglam hle zawng a nih hi! A ram khahin khat mai se a tha khawp ang. - Zopa Pu chhuanliana hi thalaite tan kan hriat tur pawimawh tak tak te, hmanlai Aizawl chanchin te leh kan mi hmasate leh MUP-ah te, chanchinbu dang Mipui Aw-ah te thil pawimawh tak takte a kum upat tawh tehreng nen a la rawn tichhuak peih reng a. Zalen nise amah avanga la kan tam bawk si a, chawimawi hi a phu a ni. - SANGTEA MSV Zoram mipuiten harhna kan chang, kan hlim; mahse, kan nunah simna, tuarna, chânna te kan neih takzet a ngai. Hnam dangte pawhin he ramah hian Pathian a awm ngei tih an lo hria ang. - 8014133932 Sorkar dik lohna leh fel lohna tam tak House-a tar langa timualphotu MLA fel, fing leh taima, ‘Mi rilru kawi’ tih daih mai hi a titu hi a rilru a kawi hle a ni zawk lo maw? Han ti ta bawl bawl ila, heti khawpa sorkar zing leh rei tawh si hian ram hmasawnna, ama irawm chhuak, chhuanvawr tlak, zawl awmsaa hnimlem phah tihte mai loh chu ‘Tihpuitlin’ sawi tur a van viau lo maw le? Tum, ruahman, paltul, chhuanlam tih velah a tawp a nih ber hi maw! Chutih laiin Lal thisen zawmpuiten sum tam tham tak sorkar atanga an siam/dawn thu, tar lan tur a awm fo thung! NLUP lah hi ‘dawt’-a bul tan, PM Special Package nia sawi, ni si lo kha a ni a. Vervek taka mipui suma lalthutthleng leina - kawngchhia, hlawh lak theih loh etc. zawng zawng thlentu, policy thatchhe tak a ni zawk lo’m ni? A hlawhtlinna an tih pawh hi a dikin a tak a ni ang em? Hetiang kaihhruainaa kan tal rei lutuk hi Mizoramin kan leikan loh phah a ni zawk lo maw? - Citizen Damdawi in hi ka lut kim deuhthaw tawh a, Aizawl Hospital anga nurse fel leh damlote ngaihsak leh mi inpe zo hi ka la hre ngai lo. Damdawi in danga nurse-te hian entawn se ka ti hle mai. - SANGTEA He Mizoram, Kristian ramah hian ka rilru tina em em thintu chu, Kohhran bel ngai lo leh inmkhawm ve zeuh zeuhte leh ei ru thin leh zu in thinte ang maia Rev. Dr Pastor, Kohhran Upa, Revival Speaker leh Missionary-te leh Kohhran bel tlatten kawngpui nekchep em em maia in an sa thin leh, ADA inthlahdah avanga an duh ang anga kawngpui leh thenawmte an nek chep mai hi chu...!! Eng ang Kristian nge maw kan nih tak le? Khawnge Kohhrana kan nihna leh Pathian tana kan inserhhranna chu le? Bible-in awm dan tur min hrilh hi tute tih dik tur nge ni le? Tute nge Pathian thu awih chu le? Mizo Kristiante Kristian dan hi a va rapthlak tak em! Kan inkhawmpui rorel thinte hian ram leh khawtlang, Kohhran leh mi mal nun thleng phak tawh sela aw... - Tea, Azl Kan Media-te hian India hmarchhak state Chief Minister-ten helicopter an hman zat leh an state sum dehchhuah theuhte hriat tum ula, mipui hriat atan han tarlang teh u. - 9774354495 Kohhran upa (ordained) ngeiin thahnemngai tak maia Bible duh loh zu zawrh an han sawi mawi hliam hliam thei kha chu a rapthlakin hmulthi a ding sung sung thei alawm le!! - 9774354495 Kan ramah hian kut hnathawk kan sawimawi a; mahse, kut hnathawk mi chu kan ngaisang leh si lo. Kut hnathawh sawi mawi kan ram hruaitute hia makpa atan an iai leh si lo vang maw? - 9856606371 Eng harsatna pawh i chungah a lo thleng a nih pawhin beidawng mai lo la, englai maha beidawng ve ngai lo Isua Krista chu pan la, a lo pui dawn che a nia. - Angaihtei Lungsum AMC inthlan hun a hnai a, party hrang hrangte pawh an inbuatsaih mup mup mai a. A mak khawp mai a, mipuite hian kan ram hi hmangaih awm deuh hian kan tawng a, kan hruaitute hi hmangaih ve lo, mahni tanghma chauh ngai niin kan chhuah chamchi a; mahse, mak tak maiin chung mahni chauh inhmangaih nia kan ngaihte bawk chu kan thlang leh thin tho niin ka hria. AMC inthlanah pawh hian ‘mahni veng mi nge nge’ tih tawngkam a ri zing leh dawn a, tam tak chuan an thlan phah ngei bawk ang; mahse, mi tha tur nia kan rin hi inthlan a hnai tak tak a, thiam tak maia an insawi mawi hi chuan rilru hi a party zawng bawk hian a kal leh zel tho mai nia maw le! Tun tumah pawh hian hetia kan ral thlir ngawt ai hian a hun a hnaih tak takah chuan mahni party bawk a nia kan tan leh hlur dawn ni. A hmaa tha kan tihte kha kan sel leh sup sup mai ang. - MkSiama