Sawhkhawk of the day Mizoram leh Central sorkarte hi kawhmawhbawla Tripura transit camp-a la awm lui tlat Bru-hote tih leh sawi ang zela awm tur an ni tawh lo! Mizoram sorkar hi tang tlat ve tawh rawh se, mipuiin kawngzawhin kan lantir tawh a nih kha. Vawi tam thlem/sawm an ni tawh, hetiang chunga kawisawi tlat, dan leh thupek zawm duh lote chungah chuan rorelna a awm mai tur a ni. Duapkai a hun tawh lo, an chezua atang hian a dang an phut zel ang, tawpintai an nei lo vang tih a rin theih. Tripura-ah an awm thei tho va, awm mai rawh se. Chuti taka kan duat an ngai lo, Kan political party-te pawh hian an vote beiseiin tlawn lo hram teh u, kan hnam tan pawh a tlawmthlak lutuk e. - Zopa September 20, 2015 Zalen Editorial a tha kher mai. Eng party pawh lo sorkar se, sorkar hnathawk chuan a ruaitu sorkar thu zawm hi kan tih tur dik tak chu a ni. Office tan hun leh ban hun kan hre reng chunga kan zawm thei miah lo pawh hi a mak mai ni lovin, a zahthlak em em a ni. - 9862859675 Pathianni hmasaa Pu Chhuanliana thuziak khan beng a tivar khawp mai! Ama insawi dan takin, a thu ziah tam tak hi chu thenkhat tan chuan ninawm a ni mai thei a, chutih lai erawh chuan a ngaihlutu tan chuan a hlu a, thil hlui tha tak tak phawrh chhuah tur a hre thei riau zel mai. Chhut dik loh chungchangah pawh a vau na bawk cheu va, in chhu sual ta mang lo niin ka lo hre ve ringawt mai, tang zel rawh u. - Puipuii Lalthlamuana Ralte thu ziah chu a tha kher mai!! Tunlai hian Mizo, a bikin thalaite hian lehkha ziah leh chhiar hi kan thatchhe ta hlein ka lo hre ve a. Khawi khawi atangin emaw, thulakna belhchian dawl nge dawl lo pawh hriat loh hi kan thusawinaahte hian kan zep thla zen ringawt zel lehnghal a, hetiang hi chu sim chi niin ka hria. Thalaite hian tan kan lak zel a ngai khawp mai a, mi hmaa thu sawi leh ziak thin tan phei chuan source rintlak hi hmang thin ila, khawi lai emaw atanga phone vela kan dawn mai mai hi chu i au chhuahpui chul zel lo teh ang u. - Thansanga In chanchinbu hi a ngaihnawm thin khawp mai a, a bik takin Pu Chhuanliana awmna pheka mite hi a tangkai khawp mai. Article pheka mite pawh mi thiam tak tak ziah a ni zel bawk a, a chhiar a manhla thin. Chutih rual chuan in chhutna hawrawp hi a te mah mahin ka hria, keini kum upa deuh tan phei chuan a chhiar hleih theih loh, a chhut a lo fiah loh phei chuan ngaihruatin ka chhiar fo mai. Hei aia lian deuhva chhut dan hi a awm thei em? - Siami pi Kelkang Kohhran pawh hi Zoziaa harhna chu an la pawh pha lem lo naa revival-ah chuan an fakawm khawp mai a. Hmanni chu an zing tawngtai inkhawmah ka han kal ve a, an tleirawl zekhelte chu an maicham hmaah an muttir hmiah mai a, an la muhil a, programme an hman hnan mai. Kan ramin hun har a dai dawn a, Kelkang boruak pawh khi tawp hun a la awm ang. Pathianin thlarau centre a la siam ang a, hun thim an sawi fo a lo thlen pawhin himna hmun a ni ang a, Kelkangho ngei pawh himna zawngin an la kal darh ve ang a, tuna revival an dah centre thiamna leh mikhual chunga an thatna vang hian Pathianin mite thinlungah khawngaihna lian tak a neihtir ang a, an chibai luai luai ang a, chaw eiah an sawp sup sup ang a, chenna turte ngaihtuahsakin inte an sakpui vut vut ang. Chumi huna Pathian thlarau centre thar tur chu khawchhak lamah chuan North Vanlaiphai, Sialkawk leh Dungtlang hi a nih ngei ka ring. Kan hmabak leh chu Zoziaa harhna. - 8575222990 Assam Rifles sawn chhuah lah chu hmalak chhunzawmna a la awm si lo va, an duh chen chen an awm ang a, an duh hun hunah Lammual hman min khapsak thin dawn a nih hmel e! - 9774354495 Ei ruk tumte tan tam tham law law ei ruk a that a rinawm! Singhnih khat lek chu ei ru lo mai rawh, man i tawk palh hlauh dah ang e! - 9862372482 Kawng chhia chuan min van luah hneh deuh ve! Kan sorkar chak tak hi tang leh deuh teh se, khelmual tha min pe theitute hian kawng tha pawh min pek theih ka ring tlat mai. - 8794686442 Sualna hi a punlun zel dawn, ringtute kan inpeih a ngai a ni. Tunlaiin mi thenkhatin hrilhlawkna ang deuhva an puan tam tak hi a thlen dik hun a la awm dawn, ringtute huaisen takin i kal zel ang u. - Patea Mizoram Synod hnuaia inkhawmpui lian ber dawttu, Presbytery inkhawmpui tan a ni leh dawn hnai ta a. He inkhawmpui hi Synod-a rel tur tam tak sawiho hmasakna a ni a, a pawimawh hle. Synod hi sorkar nen an duh dan inang lovin inbauh deuh anga hriat chang nei mah ila, an thu tam tak hi kan ram kal dan tur a nihna chen a awm si a, mipuite pawhin tawngtaina nen inkhawmpui hlawhtling tak neih a nih theih nan kan tawngtaipui an ngai a ni. - Presbyterian em em-a Tunlai chu Kelkang, kawng chhia, Minister bâng tih vel ai chuan Kohhran Thianghlimin an Biak In, Solomona Temple an chei a langsar leh zawk ta daih mai. Mizote hian intihhlimna hmun tur hi kan mamawh ta hle niin ka hria. Biak In pawh ni se, hlim theihna hmun tur nia kan hriat chu kan pan ruak ruak zel mai chu a nih hi! - Muankima Anthurium Festival kan ti a, tun tum chu a hmun a hla deuh va, kal an tam tho vem ka hre lo. Ka rilrua lo awm daih chu he festival hian Mizote hian intihhlimna hmun tur, engthawl taka nuam kan chen ve theihna tur kan mamawh tih hi a ni daih mai. A hmun hla emaw, hnai emaw lam kan ngaihtuah teh vak lo, hlim taka kan awm theihna hmun tur chu kan pan sup sup zel mai a nih hi maw! Hetiang festival hi a tam lo va, khawpui chhungah phei chuan a awm lo, tu emaw hausa deuh hian, kumtluan daih intihhlimna hmun tur hi siam se, a hlawk ngawt ang tih hi ka rilru-ah a lo awm daih a ni. - MkSiama