ZALEN September 6, 2026: Mizoram sawrkarin tun hnai kum hnih chhunga sawhthing support price atana sum a sen tawh zat chu Rs. 1,92,63,92,316 a tling.

Agriculture & Farmers’ Welfare department chhinchhiah danin, August 18, 2026 thlenga kumin chhunga sawrkarin kuthnathawktute sawhthing a leisak tawh zat chu quintal 2,00,481.55 a tling.

Sawrkarin sawhthing support price atana sum a pek tawh zat chu kum 2025-ah Rs. 1,41,50,74,578 leh kuminah Rs. 51,13,17,737, a vaiin Rs. 1,92,63,92,316 a ni. 

Sawrkarin support price zawng zawng a pe chhuak vek tawh a. DAMC account-ah thun luh tawh niin kuthnathawktute account-ah thun luh mek a ni.

Chief Minister Lalduhoma chuan sawhthing chu ram leilung tichhe tam lo zawng leh a hralhna lama hlawkpui zawk theih nan organic uar tul a tih thu a lo sawi tawh.

Lalduhoma hian May 15, 2026-a Samthang Community Hall-ah khawtlang mipuite buatsaih Sawhthing Kût a hmanpuinaah sawhthing market a that tial tial theih nan a hrisel thar a ngai a, ram leilung a tihchhiat nasat loh nan sustainable cultivation kalpui a ngai a. Chumi lam hawi zawnga kal hret hret a, engtikah emaw chuan organic state-a inpuan an duh tih a sawi.

“A pulunga kan hralh ngawt hian bothlau a tam a, a hlawk tawk lo a, a sawngbawlna hi hmun hrang hrangah neih chhoh zel kan tum,” a ti bawk.