- Ngurdingpuia Pachuau Chanmari, AIzawl Zalen Chanchinbu September 4, 2016 (Pathianni) chhuakah khan “Supply Department-in Rs. Nuai 196 hloh” tih kha Front page ding lam pangah a rawn lang kulh mai a. Ka rilrua lo lang hmasa berah chuan, Supply Minister chak tak leh fit takin min enkawl a, a hnuaiah buhfai leh gas, diesel leh petrol te kan hnianghnar viau mai si a, a lehlamah hian a lo pawp ru ve deuh emaw ni dawn le tih a lo lut hmasa a. Kan chhiar thlak erawh chuan C&AG Audit report 2015 March kha lo niin, sum hloh pawh Supply Centre/Godown hrang hranga Store Keeper te charge inhlan laia sum leh bungraw hloh te an lo ni a. A rawn tarlan zel dan chuan hetianga Rs. Nuai 214.04 an hloh atang hian Official atangin Rs. Nuai 17.79 chu hmuh let a lo ni tawh a. Mi mala laklet leh hmuh lette pawh tarlan a ni. Store Keeper, buhfai tihchingpen avanga an hlawh atanga rul mek an awm hi a pawi ngawt mai. Engvangin nge a hunlai khan bân an nih loh? Thil sual ti nia a chhuituten an hriat chian hi chu an chungah an phu tawk hremna lek a, ban tir zel mai hi a tha ber ang. Nge ni, insawipui hnam kan ni a, hremna lek dawnin tute emaw hmelhriat thiltithei deuh hmatheh a, a phutawk aia tenau deuha hremna tawk kan awm zawk? Tlem lai deuh khan Kolasib DCSO kha a thil tih (buhfai hralh ruk) avang khan an chhui a, an ban ta niin ka hria, a lawmawm hle. DCSO kha a mimal takin ka hre lo, mahse kan sorkarin mi mal tih dikloh a hrem ngam kha lawmawm dangdai khawp mai. Department dang pawh hian ti ngam ve se a tha ngawt ang. Zoram purchawkna ber rail kawng danchah (Mega Block) vanga harsatna: Han sawi zel ila, buhfai kan chawkluhna kawng ber Bairabi Rail kawng siam dawn laia Mega Road Block hun te kha ka ngaihtuah a, kan Supply Minister kha mualpho thei dinhmunah dingin ka lo hria a, “Theihtawp kan chhuah ang a, harsatna kan tawk lovang, lungngai suh u,” a tih te khan a zam aw khan ka lo hre deuh a; mahse, keimah zawk hi ka lo zam vang a ni ang te ka ti leh hnuhnawh. Rail kawng siam chhunga Buhfai Andra Pradesh atanga Bangladesh kaltlanga Lawnga an han late kha ka rilruah a la awm reng mai. Tripura kaltlanga tih zel a rem tak loh khan Tahan (Myanmar) thleng thleng khan buhfai nghei loh dan tur ngaihtuah khan mawngvawmba ang sek khan an tlan kual kha a ni a. Zoram mipuiin chaw kan nghei ang tih hlau reng renga kan Supply changtute an vir sek avang khan Mega Block vanga harsatna kan nei ta lote kha a lawmawm hle a ni. Eptu Party Thalaite puhna chungchanga thudik chu: May 6, 2016 khan MNYF te hian Press Statement siamin, Buhfai Supply chungchangah thil dik lo tam tak awma an rinnate an tarlang a, chungte chu: Supply tura Tender aiin Supply pek tam a ni tih te, Buhfai tha ni lo Supply a ni tih te, Endikna khawl awm lo tih te, Zuangtui Godown a buhfai aiin Bazara mi malin an zawrh a tha zawk tih te, Tender tharah dahkham tur tam tih te leh an khel ber zinga mi Supply tender chhang ve lo MIZOFED te supply-tir an ni tih te avangin Supply Minister chu bâng ngei turin an phut. Sorkar lam thuah chuan Supply tura tender aia supply tam ta hi a aia tam emaw, a aia tlem emaw ni thei turin Term & Condition ah tarlan sa diam a ni. State Purchase Advisory Board (SPAB) approved vek niin, SPAB hi Chief Secretary Chairman-na hnuaia Board a ni. Buhfai that leh that loh chungchangah chuan mipuite eitlak ngei tur, Godown/Kudam-ah uluk taka lo check thin niin, thawktuten tha lo an tih chuan return (thleng) leh a nih theih sawi a ni bawk. Godown-a mi aia bazara zawrh a that zawk chungchangah chuan, buhfai supply hi mipui atanga a chhiat thu complain an dawn loh thu Deprtment lam chuan an sawi a ni. Tender thara dahkham a tam lutuk tih chungchangah chuan mi tam takin buhfai supply hi an dil a; mahse, department lam chuan tlema dinhmun ngialnghet deuh, sorkara bill lak theih loh pawha chatlak lova buhfai mipuiin kan nghei loh nana supply char char tur duhna avang a nih bakah, Financial Soundness Vaibelchhia 5 tih pawh hi a pawisa fai ni lovin, a thil neih zawng zawng Vaibelchhe 5 tihna a ni. Hei hi Minister Press Conference-ah khan sorkar lam hian an lo tarlang tawh a ni. Tin, Supply tender chhang ve lo MIZOFED te supply-tir tih hi eptu lam thalaite chuan an sawi uar hle. Sorkar lam thu ka hriatdan chuan tender chhang lova MIZOFED supply pek chungchangah hian sorkar thiam lohna pakhatmah a nei lo va. Tender chhuah a niha a chhang hniam ber hnena pekin, an chhanna rate anga an supply leh theih tak si loh avangin, SPAB Chief Secretary Chairman-na hnuaiah buhfai rate siamin an rate siam ang hian MIZOFED chu a supply-tir ta a ni. MIZOFED hi sorkar Agency a nih avangin tender chhang lo pawhin supply hi pek theih a ni. Chu chu FCS&CA Manual Chapter 2, Para 2.3 ah chiangtakin tarlan a ni. Tender chhangtu dang L-2 (Lowest), L-3 te hian engmah buhfai supply tura claim theihna rights hi an nei lo niin sawi a ni. Tin, sorkar lam thuah hian L-1 in supply thei lo se a chhangtu dang (tenderer) te koh tur tih a awm lem lo. A chhang hniam ber hnena an pek tawh, an supply theih tak si lovah thuneituten tul an tih dan anga an rel kha pawm mai tur a nih hmel. Kan ram dinchhuahnan sum renchem thiam a pawimawh: Mizoram Chief Minister-in sorkar sum indaih loh chungchang sum ren a ngaihzia a sawi fo a. Hemi kawngah hian Supply Minister a che tha hle. Special Permit, VIP Quata te tihtawp a nih tak avang leh Ration Card dik lo paihbo a, buhfai lei ngai lo tlem ta te hi a huaisen thlakin sum renchema kawng dik tak a ni. Buhfai Quintal 80,000 SPAB-in lei a phalsak zat lei ngai tawh lovin, a aia tlem sorkarin a lei ta zel te hi a va ropui em! SPAB-in lei a phalzat hi Nov, 2014-April 2016 inkar chhung khan lei ta zel ila, avaia lei tur zat chu quintal 13,60,000 a ni a; mahse, Minister hmalakna avangin quintal 9,92,597 chiah lei a ni a. A tlemna hi Quintal 3,67,403 a ni. Lei tlem tak avanga sum hum zat chu Kg khat zelah Rs. 25.75 a chhutin Rs. 94,60,62,725 a ni a, FCI a Economic cost Kg 1 Rs. 29.81-a chhut phei chuan Rs. 109,52,28,343 daih a tling a ni. Tun hma zawng khan FCI-ah Economic Cost (EC)-in lak a ni thin a, EC hian Oct 2014 vel khan Kg 1 Rs. 29.81 a ni. Kan Minister hian EC a la lovin, mi mal atangin a supply-tir khan Kg 1-ah Rs. 25.75 a ni a, Quintal 1-a sorkar hum (safe) zat chu Rs. 406 zel a ni. FCI Economic Cost hi a hnuah Kg 1-ah Rs. 31.34-in a chho va; mahse, mi mala lakna rate ngai Rs. 25.75 kha hman zui zel a ni. October, 2014 atanga April 2016 chhunga buhfai leina kha Economic Cost (FCI) nena khaikhinin, sorkarin Rs. 55,48,61,723 ngawt mai a hum thei a ni. Tunah hian thla tin Quintal 65,000 supply turin MIZOFED thlan an ni leh a, anni hian sorkarah Kg 1 Rs. 25.00-in an pe dawn a ni. Tunah hian FCI-ah Kg 1 Rs. 32.66 a ni a, kg 1-ah Rs. 7.66 kan hlep dawn tihna a ni. FCI atangin la ila thla 1-ah Rs. 21,22,90,000 zet tur a nih laiin, MIZOFED-in an supply hian Rs. 16,25,00,000 sen a ni dawn a, thla khata sum hum tur chu Rs. 4,97,90,000 lai a ni dawn a, kum khat tluang takin kal se, Rs. 59,74,80,000 (Vaibelchhe sawmnga pakua, nuai sawmsarih pali leh singriat) zet mai sorkarin mipui pawisa a hum dawn a ni. Kan Supply changtupa hian beih a tawk nasa a, Court lam thleng pawh an awm a ni awm e; mahse, an zuzisan leh mai thin. Hei hi kei chuan a chak em avangah ka ngai lo thei lo. Thil chiang tak chu, a hun chhung hian buhfai lamah harsatna lian tham tak kan la tawk lo tih hi a ni. Kan tawk lo mai pawh ni lovin, sum tam tak sorkar tan a hum tih hi a ni. “Min sawisel nasa em mai, hahdam deuhvin awm ve tawh teh ang,” tiin FCI hi Economic Cost-in tun hmaa an lo kal angin dawr sela, a hahdam thei. Mahse, sorkar chuan sum kan hloh leh hle dawn tih a chiang a ni. Sum renchem thiam, nachang hria leh chak bawk si hi a ni lawm ni Supply Minister atana kan duhthusam thin kha.