ZALEN Feb 24, 2025 : An hawi zawng inang chiah lo mah se, an inkar a hlat phah chuang lo. Gospel leh pel lo tih velah Feli Fanai nen an buai lo. Mahse, thihna avangin an inthen a tul a, a thih hnua vawi khat nan Sawmtea Chhangte pawh a zai ve thei ta!

   Thian inkalsan hi tawrhna a na, chu chu Sawmtea Chhangte pawhin a tuar a. A thian ngainat em em chu hmun pawimawh-ah a chan tir a. Feli Fanai boral lai vel khan zai tura sawmna a dawng nasa a. Mahse, a thiannu avangin an sawmna zawng zawng a ‘yes’ thei lo.

   Sawmtea Chhangte chuan Feli Fanai chu a sun a, an vuina Champhai thleng in a zui a. Ti hian a sawi a, “Gospel leh lengzem daih ni mah ila, kan inthian thatna hi a thuk reuh em em a. Amah Feli hian tihian a sawi fo, ‘Sawmte kan inthian thatna hi a thukin a ril ka ti. Kan hun tawn tam tak a in an vang pawh a niang. Inzui renglo mah ila, chhungrilah kan inpawh takzet, he kan inunauna nghet hi kan vawng nung zel ang a’ a ti fo a. He a thusawi hi ka bengah a cham reng. A sakruang an zalhna thlan thlenga ka zui hi min beisei ngeiin ka ring a. Ka thiannu Feli hian a tawp thlenga ka zui leh ka thlah hi a duhdan anih ngei ka ring a. Thian tha leh rinawm ka nihna hi a tawp thlengin lan tir ka duh a ni,” a ti.

   Sawi chhunzawm zelin, “Min kalsan hi ka sun em em a, ka eng-tihmah hi a phur lo, zai tura min sawmna pawh cancel ka nei nual mai a, keimahah zai boruak a awm theilo reng a. Feli ka sun zo thei lo a ni ber, min hriatthiamna pawh ka ngen mawlh mawlh. Tihian min kalsan atangin chawlhkar khat a liam ve ta reng mai a,” tiin Thalai Khawvel a hrilh.

   Feli awm loh hnua a zaina hmasa ber atan, 77th Chin National Day-ah khan a perform ve ta a.

   Sawmtea hian, Pathianin rem a tih chuan Feli Fanai pualin fam ngaihhla video siam ve a rilruk a, chu chu a thiannu tana a tih theih awmchhunah ngaiin, theihtawp chhuah a tum. Hemi hi a buatsaih thei a nih chuan a rilru pawh a nuam huai a inbeisei a ni.