March 12, 2024; Chief minister Lalduhoma'n, thil tha ti turin tih luih kan ngai tih sawiin, "Pathian kan hlau si lo, a sual a piang min khawngaih kan ti bawk si, ramhuai kan hlau tawh bawk si lo, sawrkar tal kan hlauh loh chuan kan tha thei dawn lo," a ti.

Vawiin tlai a minister pahnih demand sawihona hmawr a bawkna ah he thu hi sawiin chief minister chuan, Right to Public Service kan mamawh ngawih ngawih tih a sawi a, chu chu an enforce dawn tih sawiin, thil tha ti turin tih luih kan ngai niin a sawi.

Weightbridge chungchang pawh a au pui zing hle tih sawiin, a that rei theih loh thu leh a hmangtuten an hawlh chhiat zel thu a sawi. "Kan thinlung hi dik phawt sela, bukna hi chu tih dik hram i tum ang u," a ti.

Ration card chungchang pawh sawiin, "Ration card ah te pawh a eng tur chu a eng ah, a var tur chu a var ah, a var tur a eng a awm tal tum chhungkua te khan lo hre rawh u, Pathian malsawmna in dawng chuang lovang, tiang hi Pathian malsawm dawnna emaw kan ti a, a nih loh zia kan hriat tawh hi kan ram hian kan tawrh nasat tawh hi, chuvangin kawng dik hi i zawh mai ang u," a ti bawk.