Aizawl March 15, 2024 : Vawiin khan Mizo Hnam Run chhung inkhawm neih a ni a. Hun hnihna political session-ah Er. R. Rohmingliana MLA chuan 9th Mizoram Assembly Budget Session report pein, tun tum Budget Session kha mipuiin an en nasat thu a sawi.

Rohmingliana chuan, Quiz ni ta se, MNF MLA-ten an chhan dik nasat tur thu leh ZPM MLA-ten an chhan dikloh nasat tur thu a sawi a. Budget kha kum 2024-2025 atan cheng vbc 14412 a ni a, hmuh tur leh hmanral tur zat a inang thlap tur a ni, a ti.

Sawrkar duh vang ringawta Zoram chhe lailet der anga inpuh hi sim ang u, thangtharte moral tihchhiatna a ni, sawrkar kal tawh ten theihtawp an chhuah vek a ni. Kan ram than chhohna turin dawtsawi mam tumte hi sim tawh ang u. Hniak phawi map lova dawtsawi house leader kan nei kha a zahthlak a. Kan Mizo pui IR police-te pawh 'kan ta a ni lo' tihte kha a pawi hle a ni. Home Minister-in House ah Jail tangte a sawi dan pawh kha a nuihzat thlak hle a ni, a ti bawk.

Lalrintluanga Sailo resolution putluh chungchang sawiin, "Mizoram sawrkar hian MSSSB thiah a tum hi ennawn ni rawh se' tih chu debate-ah chuan kan hneh a, vote-ah kan hneh lo a. Chutiang bawkin, 'Mizoram sorkarin ni 100 chhunga a thawh hi ropui kan ti' tih rulling lam put luh pawh debate-ah chuan kan hneh a, vote-ah kan hneh lo. Stamp Act amendment 3% a tihsan kha keini chuan kan duh lo a, sang over kan ti hle a ni," a ti bawk.

Rohminga chuan, "MNF sawrkarah khan CM-in Adviser 2 a nei a, ZPM sawrkar thar inrenchem sawi reng si hian CM-in Adviser 5 lai a nei a, sawi loh ang zelin an awm a ni. Sawrkar tharah mipuiin beiseina sang tak nen an thlir thup a, hmunphiah chungchangah a chingtute an tibeidawng nasa hle a. Cheng vbc 200 chiah thlai thar lei nan budget tharah an dah a, an flagship programme berah an dah tlem hle a. MNF sawrkar hnutchhiah thlai thar lei nan cheng vbc 110 leh health care-ah cheng vbc 40-te hi kan hotute kutchhuak vek a ni," a ti.

Mitthi ruang phurh nan cheng vbc 5 leh old age pension cheng 100 atanga 1000 ah an tipung erawh a lawmawm tiin, "Gender budget a hrana an dah hi chu Central-in ti tura a tih vang a ni. Sawrkar tirhah research team-te duan sa ang veka kal tur angin ZPM khan an in sawi a, tute nge research team te chu hriat an chakawm hle a ni," a ti bawk.