March 11, 2024; DP&AR changtu minister K. Sapdanga'n Mizoram sawrkar hnathawk aikal la zingah mitthi aikal kal te pawh an awm tih sawiin, school education department chu aikal la tamna ber department a ni tih a sawi.

Zanin (11.3.24) assembly budget session a a department chante sawihona hmawr a bawkna ah he thu hi sawiin, sawrkar hnathawk aikal late chu a mal malin chhui chhuah thawkhat tawh an ni tih a sawi a, aikal la ten an chhuanlam tam ber chu 'hriselna in a tlin loh vang,' a ni tih a tarlang.

Home minister tarlan danin, sawrkar department hrang hrang zinga aikal la tam zualte chu school education department ah 1,115, health & family welfare ah 624, P&E ah 253, GAD ah 239, PWD ah 119 leh RD ah 109 aikal la an awm.

Hetihlai hian sawrkar department pali (4), excise, ICT, DP&AR leh vigillance department ah te aikal la an awm lo.

Aikal lak chhuanlam hrang hrang zingah hriselna in a tlin loh vang 2070 an awm, chhungkaw harsatna vang 703 an awm a, mimal harsatna vanga 350, chhan sawi tur hrelo 90, hotu liante thupek vang 35, zirna sang zawk duh vang 43 leh tarlan tlak loh chhan nepnawi 74 an awm.