Mizoram Assembly neih mek a ni a, sawrkar hnathawk sulhnu fel tawk loh avangin zawhna leh chhanna inmillo a awm a, hei hian sawi zui a hlawh a, Chief Minister-in bawhzui a nih tur thu a sawi tawh bawk. Sawrkar hnathawk thubuai nei laite hming, nihna leh a chhan sawichhuah a ni bawk. Kan rama hna pe tam thei bertu chu sawrkar a ni a, hemi vang hian hlut a hlawh a ni. Kan ‘budget’ pawh sawrkar hnathawk leh sawrkar enkawl nan a kal ral deuh vek a, hmasawnna tur (development) atan sum a tam vak ngai lo. Department thenkhatte chu Central sawrkar-a zawm pui nei fumfe lem lo an ni tawh a, Central sawrkarin scheme a siamsa hmanga department nawr kal an awm ta nual mai. Prime Minister Narendra Modi a chuan sawrkarin hna a thawh that theih nan sawrkar tih tet a, mimal (private) kuta hna thenkhat dah a duh hial tawh a ni. Hetiang a nih laia rorelna sang ber Assembly-ah meuh hnathawk inthlahdahna rah a lang hi a pawi hle a, ‘action’ lakzui ngei a nih beisei ila. Eiruk emaw hnathawh that loh emaw vanga thubuai neih phei chu zahthlak tawp a ni. Sawrkar hnathawkte hnathawh danah siamthat ngai a awm nuala, mahni inthununna an tlachhama, hnathawh dan kalphung a mumal lo tlangpui bawk a ni. Taima taka thawkte awm bawk mahse tam tak hi chuan an nawr liam mai mai deuh niin a lang thin. Hetiang ang hian rei tak an lo kal tawh a, hnathawk tharte pawhin tihdan pangngaiah an neih ve mai thin. Department hotu thenkhat te chuan ‘work ethics’ a awm theihna turin hma an la tawh thin a, mahse thawhpui harsa a sawi an ni daih thung a, a letlingin thil a kal a ni ta der mai. A huna pisa thlen, tha taka thawh a, a huna haw leh mai hi thil har niin a lang tehchiam lo. Hnathawkte inthlahdahna hi suma chawi tur ni se chu Mizoram hi a chawi hnem pawl a ni ngei ang. Kan ramah mihring kan la tam lo a, thu chhia a tha inhriatpui tawn tham lek kan nih avangin inhriat thiamna thui tak Mizo rilruah a awm sa a. Sawrkar hnathawkte’n hetiang hi an seng lut a nih chuan ‘work culture’ tha neih a har khawp ang. Chutih rualin kan hnamin a ken tel, Mizo te chhuan em em ‘phut let nei loa midang tana malsawmna nih tlawmngaihna’ hi sawrkar hnathawk te’n an eizawnna lamah an hlamchhiah leh si a nih chuan Mizo ze dik tak an phawrh kim lo tihna a ni a, duh lai reh buna a remchang lai lak vawng ngawt zawng thil tih rei chi a ni lo. Sawrkar hnathawkte hian Mizo-na zephung hi eizawnnaah keng tlang sela ‘work ethic’ tha tak a pian mai a rinawm a. Hnam nihphung piah lamah taima taka mahni eizawnna thawh hi mihring nun phung pangngai a ni hrim hrim. Sawrkar hnathawkte’n inthununna (discipline) an tlakchhamna chhan pakhat chu a lu berin a zir loh vang a ni fo thin. Sawrkar hnathawkte hi danin a phuar thui hle a, thawk tha lo emaw dan bawhchhiate chu hremna awm sa a ni a; thil tisual te chu hrem lohin an awm fo thin a. Hei hian a thawk mek leh thawk zel turte ah ngaihzamna a siam thin niin a lang a ni. Hnathawk tam zawkin ‘property return’ an tarlang lo ringawt pawh hi hmalakna lian tham a tling der a. Inhriatthiamnaa department hnathawkte an kal zel chuan tih dan phung tha lo a piang zel dawn a, chu chuan a chhe zawngin nghawng a nei bawk ang a, thang tharte hma hun a chhiat phah thei bawk. Inthunnuna lek ngam hruai tu emaw hotu kan mamawh ta hle mai a, department hotu leh ram hruaitute pawhin kengkawh sela mipui hian an dem dawn loa, an thlawp zawk dawn a ni.