Aizawl: Aizawl South I bialtu MLA C.Lalsawivunga chuan, “Sawrkar nen inpawh leh tha takin kan thawhho theih ngei ka beisei,” a ti.   Nimin khan a bial chhunga sawrkar in hmasawnna hrang hrang a thawh mek leh ruahmanna awm thei turte thlirin a enfiah a. Thu sawiin, "Aizawl South I mipuite kan sawrkar lakah kan pangchang viau dawn a, sawrkar lam pawhin in enhranna tel lovin opposition bial ni mahse, hmasawnna atan chuan tha takin min dawng sawng ang tih pawh ka ring nghet tlat a ni," a ti.   MLA hian Upper Republic pengthuam, College veng panna PWD in black topping hna an thawh mekte a hmunah en in, UD&PA Dept in Retainning Wall Metre 52 zeta thui leh Meter 6 chuang zet a sang te a enfiah nghal bawk. He hunah hian Upper Republic Local Council Chairman Hrangkunga Fanai ho in Local Council member dangte bakah PWD SDO F. Lalengmawia ten an tawiawm a ni. PWD hmalakna in Upper Republic via Governor Gate Road pawh zau zawk leh lirthei awlsam zawk a kual luh theih nan siam tha a tihzauh leh rawt hniam hna thawh tum a ni a. Thanglaikawn Road, Upper Republic Vengchung atanga Venghlun panna Metre 372 a thui chu RCC a siam tum a ni bawk.