December 22, 2023; Tunkar Nilaini zan a Mamit a Taxation office rawktute chu vawiin khan man an ni.

Taxation Office rawktute hi Alex R. Vanlalhruaia (27) Lepanchhawng, Myanmar tuna Mamit Bazar Veng-a khawsa mek leh Zothanpuia (18) Mamit Vengthar te an ni a. An pahnih hian Nilaini zan khan Mamit Taxation Office hi rawkin, pawisa dahthatna thir thingrem an la chhuak a. Taxation office bul-a Scooty inhung an ruk hmangin pawisa dahna bawm hi hmun dangah an phur chhuak a, hnam dang enkawl Motor Workshop atanga bungrua an dil chhuah hmangin thir thingrem hi tichhiain, a chhunga pawisa cheng nuai 11 vel an tlanbo pui a ni.

Office rawktute hian nimin khan Taxi Hire-in Aizawl lam an pan a, kawngkhar kar chhiatna atana an hman chem chu an hnutchhiah avangin hemi hmang hian pawikhawihtute hi chhui chhuah an ni a. Vawiin khan Aizawl-a Hotel pakhat atangin man an ni a. Mamit lam-a phurh thlak nghal an ni.