ZALEN September 07, 2026 : Mizoram chhunga passenger phur chi lirtheite passenger-te hnen atanga sawrkar rate ruahman aia sang lak ching leh chhuanlam hrang hrang siama tlan duh lohna nei thin te lakah Transport Department chuan na takin hma a la dawn. 

Lirthei neitute chuan permit an lak dawnin sorkar approved rate-a tlan leh tlan duh lohna nei lo tura an lo intiam tawh angin, sorkar rate zawm lova tlan lui te chu a vawikhatnaah an permit suspend a ni ang a, a vawihnihnaah an permit cancel thlengin hremna lek a ni ang.

Transport Department chuan passenger phur lirthei neitu thenkhat sawrkar rate zawm lo leh an domain chhunga tlan duh lo te avangin mipui tan harsatna a thlen bakah hnam dang lakah pawh hmai a timawk hle tih an sawi.

Tun dinhmuna sawrkar fare rate chu Auto Rickshaw atan km khatah Rs 35 leh km dawt leh zelah Rs 25, Two Wheeler Taxi atan km khatah Rs 30 leh km dawt leh zelah Rs 20, leh Four Wheeler Taxi atan km khatah Rs 55 leh km dawt leh zelah Rs 45 te a ni.

Sawrkar chuan passenger phur chi lirthei neitu zawng zawng te pawh permit an lak tirha an intiamna te zawm turin a chah a. Mipuite pawh sawrkar rate zawm duh lo lirthei an awm a nih chuan Directorate of Transport contact number (0389) 2316080 emaw, mobile number 8369729905 leh 9862142241 ah te report zel turin an hriattir bawk.