SAWRKAR THARAH ZORAM THAR - Lalchhandama Colney Kohhrante leh mi thenkhatte tawngtaina azarah tluang takin sawrkar thar chu kan lo nei leh ta reng mai a, a lawmawm hle mai. Hetih lai karah hian Party tling zo ve ta lote, zuai leh inkuangkuah mai tum lovin, ram tan thawh tur tam zawk a awm dawn a ni, tiin insangmar sauh sauh zawk ila a tha hlein ka ring. Lal nei thin hnam kan ni a, tun hma chuan Lal leh Upaten ro an rel thin a; mahse, tunah chuan chutiang chu ni tawh lovin, mi mal tinten aiawh thlangin chung thlan chhuahte chuan ro an rel thin a ni. Indirect-in mipuiin ro kan rel a nih chu, kan duh leh loh chuan heng mite hi vote hmang bawkin kan paih thla leh thei a ni. Hetih kawng ringawtah pawh hian khawvel ram hrang hrang democracy lian berte zinga mi ram bung khat kan han ni ve hi chu kan vannei hlein ka hria. Awle, vawiinah theih ang tawk tawkin Mizoram dinhmun, ram than nana mipuite mawhphurhna, sawrkar lam mawhphurhna, engtin nge sawrkar chu hlawhtling a nih ang, etc. tihte han sawi chhuah tum dawn ila, phingphihlip arsi lak tum kan ang em lo vang chu maw? Kum 20 dawn lai chu state kan lo ni ve ta reng mai. Inthlan dawn apiangin party tinten an policy tha tak takte au chhuahpuiin ram tana thawh tak tak an tum thu an au chhuahpui thin a. Tichuan kan han thlang tling ta ngei a, eng nge kan hmuh thin tak le? Tun thlengin intodelh lo etc, kawng engkimah a ni deuh vek mai. Kum tinin central atangin intodelh nana hman tur, etc. sum nuai tam tak kan hmu ziah thin a; mahse, mipuiin kan ei zo thin nge, sawrkar lam hotuten, nge ni financial management kan thiam lo hrim hrim. State dang nena kan inkalpawhna kar khat a pin chuan kan buai reng tho mai si. In leh lo tha pui pui, lirthei man to tak tak, etc. kan nei a, changkang kan intiin ropui kan inti hle mai, a tha e. Mahse hnam dangte hian engtin nge min tih ang aw, Sakeiin Sakhi la thlamuang taka a hnim pet lai a veh dan dana, ‘Ka chaw tur,’ a tih ang deuh hi kan ni mai lo’ng maw? Nakin lawkah chuan min la zuanthlu ve mai lo’ng maw? Kumhlui tawp lama chanchinbu, TV, etc lamah chuan kawngchhe lutuk vanga mipuite thinrim insum thei lo chanchin tum eng emaw zah kan hmu chuai chuaiin ka ring, a mualphothlak hle mai. Kawlphetha lam pawh hi han thlir leh ila, Mizoramin a mawmawh zat chu Mw 80 vel bawr a ni a; mahse, kan thar chhuah ve erawh chu tui tam laiin Mw 10 vel awrh chauh a ni. Kan ram hi a chhe ve hrim hrim nge ni a hmantlak loh ni ang aw. . ? ti dawn ila kan pi pute kha hnam intodelh an ni lawi si a. Hetiang renga Zoram mipui leh sawrkar kan kal chuan rih artui phur pawh kan tluk zo lo ngei ang. Sawrkar tha leh chak nei tur hian mipui lamte pawhin kan zir ve hle a ngai a. Roreltute, thuneitute kan zar buai nasat lutuk te, tul kan ngah lutuk te hian thlemnaah kan hruai lut thei a, chu chuan dik lo takin thil a tihtir thei a ni. Department hrang hranga kut hnathawktute chawikanna tur atana sum leh bungrua an sem thinte a dawngtuten a hmanna tur dik takah zel hman tum ila. Kut hnathawktu lian (contractor) te pawh uchuak taka ei neih tum lovin, tha tak leh fel takin kan hna thawh tum ila a tha hle ang. Sawrkar hnathawkte pawhin kan hna theuhte ram tana thawk, kan eizawnna leh Pathian rawng kan bawlnaah ngai thei ila. Chutiang bawkin sumdawngte pawhin kan hna theuhte rinawm taka kan thawha hlep pawh uchuak taka insiam chu Bible pawhin a ti meuh lo tihte pawh hriat a pawimawh hle awm e. Tunlaiah chuan kan sawrkar hian sawrkar tha leh chak nih a tum khawp a, chumi atan chuan RTI Act te siamin he dan hmang hian sawrkar office hrang hrang leh sawrkar ni kher loa mite pawhin i duh document/information a tha lam emaw, a chhe lam emaw i duh phawt chuan i dilchhuak thei a ni. Ram intodelh leh intodelh lo hmasawn leh hmasawn lo chungchangah hian ram hruaituten nasa takin mawh an phur a ni kan ti lo thei lo vang. Dept. hrang hrangte hmasawnna hnathawh chungchang thu-ah a changtu Minister-ten mawh an phur a, a chhan chu anni hi a hnarkaitu ber, engkim buatsaiha ruahmantute an ni. Buh leh balah kan intodelh lo hle a Vai kan tih thinte thawhchhuahsa tel lo chuan thla 3/4 vel bak kan khawsa thei lo. Engvang nge ni ang le? Kan lo neitute an taima tawk lo em ni ang le? Hei pawh hi a bul berah chuan hruaitute mawh bawk kan ti lo thei lo vang. Zirna lam hi i’n thlir leh teh ang. Sawrkar sikul, sum leh bungrua tha pui puia thuam, zirtirtute pawh train leh qualification tha tak tak; mahse, tunlai hian naupang lut tur an hmu zo mang tlat lo. Hei ai chuan private sikul pawisa tam tak insen ngai,zirtirtute pawh (tu huatthu suhah) train chu sawi loh, qualified pawh qualified mang lo zawkte mipuiin kan bawh ta ruih ruih mai. Hei pawh hi inenfiah ngai tak chu niin a hriat. Inkalpawhna lamte pawh thlawhtheihna service kan nei tawh a, Rel kan nei tawh bawk a; mahse, heng kan neihho hi a beithamin a la fahrah hle. Ram hruaitute kan chet vat vat a la ngai hle. Hriselna lam hi ram changkang zia deuh a ni a; mahse, Mizo mipuite kan hniam hle. Ram zim tê-a mi cheng pawh 10 Lack vel bawr chauh kan ni a; mahse, India ram leh khawvelah Cancer natnaah kan sang ber tlat mai. Hemi avang hian zuk leh hmuam chungchangah te awareness campaign tha thlah lova kan kalpui tlut tlut a tul hle mai. State intodelh chu engtin nge kan lo nih ve theih ang le? Tunah mai chuan tihngaihna a awm miah lo tih chu mi tinte hriat a ni si a. An va awhawm ve aw..., intodelh leh delh lo kar chu a hla hle si a, hetia chawmhlawm state han nih ngawt mai chu!! A hmasa berin kan rilru put dan theuhte i han bihchiang teh ang. Chumi Dept.-ah chuan contract hna kan dil a ang a; tichuan, ka lo nei deuh deuh dawn a ni. Graduate ka ni a, chumi Minister hnenah chuan hna kan dil teh ang, Party worker ka ni bawk a, duhtawkin hna kan dil teh ang, etc, nia a dik alawm, sawrkar hnenah chuan kan dil a thiang em em, kan mamawh phuhru tura kan chet kha a ngai ve tlat. America President pakhat chuan heti hian a sawi a, “Ka ramin eng nge min tihsak theih tih aiin, ka ram tan eng nge ka tih ve theih tih hi inzawt zawk ila..,” a ti. Adik khawp mai, mahni tanghma ringawt kan ngaihtuah hi chuan a fel thei lo. Miin ram tan nunna hial an chân laia keiniin a rawkna tur ringawt kan lo ngaihtuah kha chuan ramin hma a sawn thei lo vang a, engtikah mah Vai chhia kan tihte hi kan tluk thei lo vang. Chuvang chuan kan rilru put hmang kan tihdanglam a ngai a, engkim mai hi Pathian rawngbawl hnaah kan ngaih theih zel a pawimawh hle mai. Sawrkar hnathawkte pawh dan pangngai anga kan kal reng chuan a dik thei lo vang. Kan ei zawnna a ni tih kan hriat a, hun kan vawn dik a, kan taimaka kan fel a pawimawh hle mai. Kan Officer rual MLA leh Minister te pawh engkim inhuama dik lo taka thiltih ai chuan chân, mualpho, mi hmuhsit, etc, te pawh thlang ngam ila,ti chuan reilo teah kan vanduai viaute a nih loh chuan kan ram hi a intodelh ngei ang. Aw le, Bible-ah pawh hian kan hmuh thin kha, a tira ringtu tha leh rinawm tak tak; mahse, malsawmna dawnte hmang thiam leh si lo an awm hlawm hi. Chutiang bawkin kan thlan Lal takte pawh hi reilo teah an awm mai zawngin kan vanduai hle ang. Hemi avang hian kohhrante leh mi mal tinte an mahni tan thahnemngai taka kan tawngtai a tul hle mai. Tichuan, Zoram thar kan beisei thin chu min hruai kai thei ngei ang.