Aizawl; Finance minister hlui, Mizoram Pradesh Congress Committee (MPCC) vice president Lalsawta chuan sawrkarin thlatin a sum tam tak a sen mekna titawp a, pawisa a hum (save) theihna tur ni si chu sawrkarin a ti duh lo niin a sawi.

Finance minister hlui Lalsawta chuan ZALEN zawhna chhangin, sawrkarin Covid-19 vangin sum lamah harsatna nasa tak a tawk tih a sawi a, sum lut a tlem avangin sawrkar tan a tih theih awm chhun chu loh theih lova sum hman ngaihna tih lovah chuan a theihna kawng kawnga sum inrenchem a nih thu a sawi. "Sum harsa karah Covid-19 vangin sawrkar mawhphurhna a pung nasa em em bawk si a. Hnam angin Mizo hian damkhawchhuah kan sual a ni a, chuvangin sawrkarin a tih mai theih awlsam tak chu sum renchem hi a ni" a ti a. "Damlo leh Covid-19 vanga thi te, anmahni inenkawlna cheng nuai tel seng a, an thihsan an chhungte leiba hnutchhiah a mual liam ta te pawh hi sawrkar tan thlahthlam mai chi an ni lo," a ti bawk.

Inrenchemna kawng chu sawrkar tan thil harsa a ni lo tih Lalsawta chuan sawi bawkin, ni khat thil thu-ah pawh tih mai theih a nih thu a sawi. "Minister 12 baka department enkawlpuitu SEDP hnuaia board 14 lai leh sawrkar hnathawk lak leh promotion, service enpuitu MPSC a awm reng laia MSSS Board din te chu thla tin khel lova cheng nuai tam tak senna (recurring expenses) an ni," ti bawkin, sawrkarin thiat se, sum chu a hum (save) hnem tur thu leh an ti duh lo nia lang chu pawi a tih thu a sawi.

Mi inphal leh a thei thei te'n an theih ang ang sum an thawh mek thu leh thingtlanga kan unau te'n an neih ang zawng, thlai te khawpuia cheng mipuite an rawn pek mek thu sawi bawkin, "Hetih lai a 'Rawmi chi supply' leh cheng nuai tam tak senna tur, PAHOSS sawrkarin buaipui a, a la kalpui lui tlat te chu Mizo mipui min hmusitin, min ngainep tih loh rual a ni lo," a ti bawk.

Sawta chuan, sum chu thawh chhuah belh a harsa tih an hriat thu leh inrenchem erawh englaipawh a tih theih mai a nih thu sawiin, "Hnialkhan a an neih, 'Central sum min rawn pek hi chutia kawng danga hman theih a ni lo. Hmasawnna hi a kal reng tho a ngai,' an tih pawh tun dinhmuna pawimawh zual, kawng, electric & water supply etc. te a nih lem loh chuan ministry-ah Covid-19 do nan hman zuk dil se, an phal ngei ka ring," a ti a. "Sawrkar chu hripui hlauhawmna leh a daih rei theih dan tur chungchanga hmathlir nei fumfe lovah a ngaih thu a sawi bawk.

A tam thei ang ber test neih thuai thuai leh vaccine pek thuai thuai a tul thu leh Covid-19 vanga senso tam tak la batsak, la pek loh te chu pek vat vat a ngah thu sawi bawkin Lalsawta chuan, "Covid-19 vanga damlo leh thi te senso tam tak engemaw chen tal peksak te pawh sawrkar tan sum hmanna dik leh hmanhmawh thlak tak vek an ni," a ti bawk.