Aizawl March 4, 2024 : Vawiin khan North Vanlaiphai Divisional Forest Officer hovin Sailulak khuaa Sazuk kapa puh East Lungdar tlangval pangnga te chu man an ni a, Court-a hruai an nih hnuah Serchhip District Jail, Chhiahtlang-ah khung nghal an ni.

North Vanlaiphai Divisional Forest Officer C. Lalkhawthanga hnen atanga ZALEN thudawn danin East Lungdar tlangval te hian Sailulak ramah hian sa an kap niin Sailulak atangin thu an dawng a, a kap tua puh te hi chuan satlaw an chhar niin an insawi thung. DFO chuan satlaw pawh ni mah se, sa humhalh bik an nih avangin leh India dan hnuaiah sawrkar ta a nih angin hma lak a nih thu a sawi.

C. Lalkhawthanga chuan dan angin an chungah hmalak nghal a nih thu a sawi. Vawiin khan Serchhip CJM-ah hruai an nih hnuah Wildlife Protection Act 1972 hnuaia section hrang hrang hmangin thubuai siamsak an ni a, Serchhip District Jail, Chhiahtlang-ah tlai dar 5:30 vel khan dahluh an nih thu a sawi a, Ulhbun pakhat leh a mu pakhat man tel a ni a. Sazuk sa hi Kg. 10 vel chu an lo rep hman tih a sawi bawk.