Gandhi-a laka thubuai hi BJP MLA pakhat, Purnesh Modi-a thehluh niin kum 2019-a Karnataka inthlan dawna a campaign-naa, “Engati nge rukrute hian hming inang, Modi tih an put vek mai? Nirav Modi, Lalit Modi, Narendra Modi tih an ni hlawm,” a ti a. Hei hian Modi tih hmingpu a tihmingchhia niin a puh a ni.

India-a court sang ber chuan eptu hruaitu, Rahul Gandhi-a’n mi tihhmingchhiat thubuaia hremna a tawrh tur tikhawtlai tura a ngenna a ngaihtuah mek.

Court hian Zirtawpni khan thubuai ngaihtuahin a thehluttu ber, BJP party hruaitu, Purnesh Modi pawh a ko va, August 4-ah ngaihtuah leh turin a ti.

Court hian Gandhi-a hi inthlanah a ding leh thei dawn em tih a tichiang dawn a ni.

Tun thla tirah khan Gujarat-a court chuan thubuai ngaihtuah tha tura a ngenna chu a lo hnawl tawh a, hremna an pek chu dik a tih thu thu a titlu.

Gandhi-a hi inthlan campaign-naa Prime Minister Narendra Modi-a hming a sawi dan avanga thubuai hi siamsak a ni.

Dan anga court sang zawka ngaihtuah tura a thlen kim vek hma chu man theih a ni rih lo.

Hremna pek a nih hnuah MP atang chuan hnawl nghal a ni a, court sang ber hian a thuremna angin dan siamtu zingah a telhtir leh thei bawk.

Gandhi-a hi March thlaa thiam loh chantir nia hremna puan a nih tukah parliament member a nihna hnawl nghal a ni a. A hmain Supreme Court-in dan siamtu zinga kum hnih leh a aia rei lung in tang tura tihte chu an nihna hlihsak turin thu a lo titlu tawh a ni.

Congress chuan Gandhi-a hremna pek hi nasa taka sawiselin rorel lai, Modi-a kaihhruai BJP sorkarin a lakah politics phuba lakna atan an hmang mai mai niin an sawi a. BJP erawh chuan chutiang a nih loh thu leh dan ang thlapa thil kalpui a nih thu an sawi.

Complaint a thehluhah Purnesh Modi-a hian Gandhi-a thu sawi hian Modi tih hming pu a tihmingchhia niin a sawi a. Modi tih hming pu hi a tam ber chu Rajasthan, Gujarat, Bihar, Chhattisgarh, Haryana, Madhya Pradesh, Jharkhand leh Uttar Pradesh-ah an cheng a ni.

Gandhi-a hian a thu sawiah hian ei rukna a sawi a ni mai a, tute hnam bik emaw a beihna a nih loh thu a sawi.

Court hniam zawk chuan Gandhi-a hi hremna pekah hian bail-a dil a phalsak a; mahse, MP a nihna atanga paih lohna tur erawh chuan court sang zawk a kal a ngai.