Aizawl December 12, 2023 : SCERT-in kum 2011 atanga kum tina an hman thin Poetry Festival chu December 11&12, 2023 hian SCERT Auditorium-ah neih a ni. Vawiin khan zirlai titha te lawmman semna hun an hmang a, School Education Department Joint Secretary R. Lalbiakzuala chu khuallian a ni.

Khuallian chuan zirlai thu leh hla lama tuimi tam tak an awm hi lawmawm a tih thu a sawi a, kawng engkimah sap tawng thiam a pawimawh a, sawrkar hnathawhna kawngah pawh a tangkai em em a ni a ti a, hmanlai naupangten an neih ve loh talent pho chhuahna platform an nei chu tunlai naupangte vannei a tih thu a sawi.

He festival-ah hian Higher Secondary School naupangte tan bik 'On the Spot Poetry Writing Competition' buatsaih thin a ni a, hei hi zirlai naupangten thu leh hla lama tuina an neih theihna tur leh an talent pho chhuahsakna atana buatsaih a ni.

Intihsiakah hian lawmman pakhatna atanga pathumna siam thin niin, trophy, certificate leh tangkafai pek thin an ni. Kumina lawmman dawngtute chu -

1st Prize – Hunropuii, St. Joseph HSS

2nd Prize – K. Vanlalrohluna, Dawrpui School of Science and Technology

3rd Prize – Lalchawimawia, St. Joseph HSS

He festival-ah hian Proficiency in English Award sem thin a ni bawk a. Hetah hian HSLC leh HSSLC-a English subject-a ti thate hnenah chawimawina pek thin a ni. Kum 2011-a bul an tan atangin vawiina mi 33 hnena an hlan te nen, he chawimawina hi zirlai 369 te hnenah pek a ni tawh a ni. He chawimawina hian certificate bakah tangkafai a keng tel a ni.