July 3, 2023; Mizoram sawrkar flagship programme SEDP Family Oriented thawh hnihna (Phase II) chu tun July thla chhungin sem a ni dawn nia hriat a ni.

Mizoram sawrkar chuan kum 2022-23 khan Rs. Vbc. 350.00 chu Family Oriented SEDP atan bik liau liau a lo dah hrang tawh a, hemi hnuaiah hian trade hrang hrang kaltlangin chhungkaw 60,000 (Singruk) hnenah instalment in Rs. 50,000 theuh pek an lo ni tawh.

Tun kum kal mek atan chhungkaw 60,000 bawk thlan leh niin, chumi atan chuan budget ah Rs. Vbc. 300 dah leh a ni a, thudawn danin, tun July thla chhung hian a dawng turte hnen a sem hman turin hmalakna kalpui mek a ni.

SEDP thawh hnihna hi August ni 30, 2023 hma in a dawng turte hnenah pek vek hman tum a ni a, Rs. 50,000 dawn tura ruahman chu instalment hnihin an dawng ang.