Aizawl April 23, 2024 : Earth Day lawmna chu nimin khan Department of Environment Forest & Climate Change (EF&CC) Govt of Mizoram huaihawt-a hman a ni he he hunah hian “SEL Foundation Award for Clean & Green Earth” chu Joseph Lalrinfela hnenah hlan a ni. Kumin Earth Day thupui atana hian 'Planet vrs Plastic' tih hman a ni.

SEL Foundation Award for Clean & Green Earth chawimawina an hlan Joseph Lalrinfela hi Hlimen khua niin kum 9 mi a ni a, a hunawlah nula tlangval lenkhawthawnna hmun hrang hranga plastics bawlhhlawh a chhar khawm thin a. Chu chu SEL Foundation, Chanmari hian lo hriatpuiin chawimawnna hi an pe a ni. Chawimawina hian tangkafai 25,000/- leh Citation a keng tel.

Chawimawina hlantu SEL Foundation neitu, Saizampuii Sailo, Environmentalist chuan Pathianin rem a tih chuan Mizoram Environment cheureu nasa lutuk siamthatna kawnga mipui awareness siam nan, kumtin Award chi li siam an tum thu a puang a.

Chungte chu:-

1. World Wildlife Day, March 3-ah nungcha humhalh tha khua hnenah tangka fai leh citation.

2. World Water Day, March 22-ah Tuihna humhalh lama thawk tha mimal emaw pawl emaw hnenah tangka fai leh citation

3. World Environment Day, June 05-ah Environment remchem leh humhalh lam thawk tha mimal emaw, pawl emaw hnenah tangka fai leh citation

4. Earth Day, April 22-ah Leilung humhim tura faina leh thianghlimna kawnga thawk tha mimal hnenah tangka fai leh citation.

Zampuii chuan “Heng Award dawngtu tur thlang tur hian Committee/Board pawh kan ruahman chho mek zel a. Kan dam khawchhuah theih nan leh kan tu leh fa, kan tuchhuan lo awm zel turte tana Environment lo humhim hi mi tin mawh a ni a, kan zavaia thawk ho turin mi zawng zawng ka sawm a ni,” a ti.