Sept. ah GAWS Phase III hawn hman tum
Tualchhung
Jun 04, 2023
ad
ad
Aizawl: Aizawl khawpui tui lakna thar Greater Aizawl Water Supply Scheme Phase III chu September thla hmaa hawn hman tum a ni.
 
Public Health Engineering department thawktu te sawi danin Setlak lui chhuaha Aizawl tui lakna tur phase III ah hian hna engemaw zat chu thawh zawh a ni tawh a. Mahse a panna kawngah min a awm avang leh Hunthar veng ah leimin avanga harsatna a awm avangin tunah hian ngawr taka hna chhunzawm mek a ni a, hun rei vak lo ah chuan hna hi zawh hman beisei a ni tih an sawi. Greater Aizawl Water Supply Scheme Phase III hi ni khata tui litre maktaduai 37 pump chhuak thei tura duan a niin he hna hi zawh anih hun chuan Laipuitlang a tanky ah chhunglutin Aizawl hmarlam te chawm tura duan a ni.
 
Aizawl khawpui chawmtu Greater Aizawl Water Supply Scheme Phase-I hi mi 80,000 chawm zo tura duan a ni a, kum 1988 khan hawn a ni. Tlawng lui leh Serlui infinna thlang atanga tui dawtin, nitin tui litre maktaduai 10.8 pump chhuak thei tura duan niin, hlawhtling taka la kalpui mek zel a ni.
 
Greater Aizawl Water Supply Scheme Phase-II hi kum 2007 a hawn niin GAWSS-I nena tangkawp tura duan a ni. Mi 3,10,000 chawm zo tura duan a ni a, nitin tui litre maktaduai 24 pump chhuak thei tura duan niin, Tlawng lui leh Serlui infinna chhak atanga tui a dawt ve thung.

Latest News & Chhiar Hlawh