ZALEN, June 29, 2026: Boxing tuipuitute leh Mizo boxer-te dinhmun thlir chungin a vawi 12 nan LPS Pro Fight buatsaih a ni dawn a, September 8 hian LPS Arena, Falkland, Aizawlah tan a ni ang.

Thawhtanni khan Chairman Lalsawmliana Pachuau hovin LPS Office, Zarkawtah Organising Committee an thu khawm a, boxing gym intel khawm hruaitute leh boxer thahnemngaite ngenna ngai pawimawhin kum 2024 hnua a vawi khat nan Pro Fight buatsaih turin thutlukna an siam.

Nikum khan Pro Fight huaihawt a ni lo va, chuti chungin championship hnuhnung ber chhunzawmin weight hrang panga - fly, bantam, light, welter leh middle-ah boxer-ten champion laite kut atangin title chuhsak an tum dawn a ni.

September 8 zanah LPS Arena-ah an inhnek tan dawn a, September 4-ah tel turte inbukin kum 17 atanga 40 inkar, Mizoram chhung leh pawn atangin mahni insensoin a duh apiang an tel thei ang.

Professional boxing chhinchhiahna, boxrec-ah ziak lut lovin a tir atanga a tawp thlengin Pro Fight kalphung pangngai anga kalpui a ni dawn a. Chutih rualin Pro Fight a zawh hnuah a hranpain zan khat awh professional inhnek, LPS Fight Night buatsaih chhunzawm a ni ang.

Pro Fight hnuhnung ber, kum 2024 khan weight hrang pangaah boxer 286 an tel a, a vawi hnih nan bantamweight-ah Ramthar, Lunglei boxer Laldinsanga a champion a, champion lai zinga title humhim awm chhun a ni nghe nghe a. Flyweight-ah Lalrinngheta, Tuipui; lightweight-ah Lalkhawngaiha, Venghlui, Aizawl; welterweight-ah Lallawmawma, Tuipui leh middleweight-ah F Lalthanliana Junior, Electric Veng Lunglei an champion a ni.