Aizawl March 19, 2021 : Vawiin khan Congress Bhavan Golden Hall-ah Congress Party chuan Friday Political Session hun an hmanga a, he huna thu sawitu MPCC President Lal Thanhawla chuan, Serchhip bialah chak piah lamah an bial mi leh sa nge an neih theihna turin Serchhip tlangval ngei an vawrhchhuak tih a sawi. 

Lal Thanhawla chuan, "Serchhip By-election neih turah Congress Party chuan chak ringawt kan tum a ni lova, Serchhip bialin an bial mi leh sa ngei an neih kan duhsak avangin Serchhip tlangval Pu PC Laltlansanga, bial tana mi chak tur mi kan dah a ni. Bial hrechiangtu leh theihna zawng zawng pe thin Pu Laltlansanga chu bial mipuite tana mi rintlak, Upa te leh thalai zawk te tan pawha thawhpui theih tur mi a ni", a ti. 

He huna thusawitu dang, MPCC Vice President Pu Lalsawta pawhin, "Party aiawh MLA-te hian invawnna tha tak kan neih a, kalphung mumal tak zawh a nih theih nan thununtu neih a ngai a. Chutiang tur hian sorkarna chelhtu leh eptu party-ten mahni MLA thununtu tur Chief Whip leh Deputy Chief Whip kan nei thin. Mahni chanvo leh nihna hi hriat loh palh theih a ni a, chutiang a awm lohna tura inzir leh inthunun hi a tul a ni", a ti a. "Kan nihna hi midang harsatna thlentu atan ni lovin thil tha tihna tura hmanrua atan kan hman hi kan mawhphurhna a ni", tiin inthununa tha pawimawh a tih thu a sawi. 

Hachhek bialtu MLA Pu Lalrindika Ralte pawhin Political session-ah hian thu sawiin, "Politics-ah kawng tawi te chauh la zawh mah ila, ka tum ber chu Mizoram mipuite hnena sorkar tha pek a ni. Congress Party-ah hian ka tel ringawt lova, Congress Party a ka tel chuan Congress Party hian ram mipuite tan hmasawnna kawng khat tal a zawh ngei tur a ni. Congress Party-ah hian mi tha leh rintlak tam tak an awm a ni tih hi Mizoram mipui hnena lantir hi ka tum a ni," tiin a thil tum te a sawi.