ZALEN December 6, 2024 : International Paragliding Accuracy Championship & Airsports Festival 2024 FAI (Federation of Aeronoutique Internationale) Category -II, Bowngchawm, Serchhip a Mizoram Aero Sport Association (MASA) leh Paragliding site a awm tur leh Winter Festival neih turah vawiin khan Tourism Minister Lalrinpuii chuan a Office-ah chanchinthar lakhawmtute a kawm.

Minister chuan chuan nuai 73 senna tur chungchang hi sawiin, "December 9-14, 2024 chhunga International Paragliding Accuracy Championship 8 Aero sports Festival a participate tur hian ram hrang hrang 12 hengte - Saudi Arabia, Kosovo, Albania, South Korea, Spain, Singapore, Malaysia, Indonesia, Mongolia, Nepal. Kazakhstan leh ram chhung (India) atangin Paraglider 79 te an kalkhawm dawn a. Event pakhat a tel tur a, ram dang mi kan neih tam ber tum a ni hrih dawn a ni. China leh Germany atanga lo tel tur te hian VISA problem an la neih avangin an lo la thleng theih rih lo bawk," a ti.

He intihsiakna-a Pakhatna hian Euro 2000, pahnihna in Euro 1500 leh Pathumna in Euro 1000 hlawhin hmeichhia leh mipa a hrangin intihsiak tur a ni a. Heng intihsiak tur zingah hian Mizo 5 tel ve in, an zinga pakhat chu hmeichhia a ni.

Rinpuii chuan, "Mizoram-in Tourism sector a hma kan lakna tam tak zingah World Map a kan lan ve theihna awmchhun Paragliding a inelna kuminah kan buatsaih theih dawn avangin lawmawm kan ti a. Sum sen tur te kan neih loh laiin Chief Minister, Finance Minister ni bawk in Tourism lama hmasawnna awmze nei kan bawhzui theih nan sum mamawh te min ngaihtuahsak a, lawmawm kan ti hle a ni," a ti.

He Festival chhung hian mipui chhimtute tan Paragliding Joy ride Cheng 3,000 in a chuan theih dawn a, Cheng 1,000-in Hot air balloon joy ride a tih theih dawn bakah Nghakuaikhai (Angling) leh Air Riffle shooting te a awm dawn bawk. Zan lamah free concert hlung taka buatsaih tum a ni bawk.

Lalrinpuii chuan December 16 - 21, 2024 chhung hian Winter Festival Mizoram hmun thumah neih a nih dawn thu sawiin, a hmanna pui ber AR Lammual ah neih a ni dawn a, AR Lammual bakah hian December 17 hian Hmuifang leh December 19-ah Reiek-ah te winter festival hi neih a ni dawn bawk. December 21, 2021-a khar zanah hian Secondhand Senerade te chuan concert-in festival hi an khar dawn a, hei hi chu ticket awm tur a ni thung.